އަންނަ ހޮނިހިރު ދުވަހު އޮންނަ އިންތިހާބުގައި އޭނާއަށާއި އޭނާގެ ޓީމަށް ވޯޓު ދޭންވީ ގައުމު ދެކެ ލޯބިވާ ބަޔަކަށްވާތީ ކަމަށް ޕީއެންސީގެ ޓިކެޓުގައި މާލޭގެ މޭޔަރު ކަމަށް ވާދަކުރައްވާ ކުރީގެ ބަންޑާރަ ނައިބު އައިޝަތު އާޒިމާ ޝުކޫރު މިރޭ ވިދާޅުވެއްޖެއެވެ.
މާލޭގައި ބޭއްވި ކެމްޕެއިން އެއްވުމެއްގައި އާޒިމާ ވިދާޅުވީ އޭނާގެ ޓީމު އޮތީ ދިވެހިންގެ ދިވެހި ރާއްޖެ ކަށަވަރުކޮށް، ރާއްޖޭގެ މިނިވަންކަމާއި ދިވެހި ގައުމިއްޔަތުގެ ގައުމިއްޔަތު ހިފަހައްޓައި ޅަ ކުދިންގެ މުސްތަގްބަލް ޔަގީންކޮށް ދިނުމަށްޓަކައި ތައްޔާރަށް ކަމަށެވެ.
އެހެންވެ، މި ސަރުކާރުން ފަށާފައި އޮތް ތަރައްގީ އާއި ގައުމިއްޔަތުގެ ދަތުރު ދެބައިވެ، ދެކަފިވުމުގެ ފުރުސަތު ނުދެއްވުމަށް އެދިވަޑައިގަންނަވާ ކަމަށް ވެސް އާޒިމާ ވިދާޅުވިއެވެ.
"މާލެ އެއް ދިމާލަށް، ގައުމު އަނެއް ދިމާލަށް ގެންގޮސްގެން އަޅުގަނޑުމެންގެ މައްސަލަތައް ހައްލު ނުވާނެ. ގަބޫލު ކުރައްވާ މި ގައުމުގެ މިނިވަންކަމުގެ ވާހަކައަކީ ސީރިއަސް ވާހަކައެއް. އަޅުގަނޑުމެން މި ހީކުރާ ވަރަށް ވުރެ ސީރިއަސް ވާހަކައެއް." އާޒިމާ ވިދާޅުވިއެވެ.
އާޒިމާ ވިދާޅުވީ އޭނާ އާއި ދެން ތިއްބެވި ޕީއެންސީގެ ކެންޑިޑޭޓުން ނުކުންނެވީ ސަރުކާރުގެ ކެންޑިޑޭޓުންގެ ގޮތުގައެވެ. އަދި ޕީއެންސީގެ ކެންޑިޑޭޓުންނަށް ވޯޓު ދޭން ޖެހޭނީ ގައުމުގެ ހައްގުގައި ތިބޭނެތީ ކަމަށް ވެސް އާޒިމާ ވިދާޅުވިއެވެ.
"އަޅުގަނޑު ގާތުގައި އަހަމުން އަންނަ ވާހަކައެއް ކީއްވެހޭ ސަރުކާރު ކެންޑިޑޭޓަކަށް ވޯޓު ދޭންވީ. ސަރުކާރުގެ ކެންޑިޑޭޓަކަށް ވޯޓު ދޭންވީ އަޅުގަނޑުމެންނަކީ ގައުމު ދެކެ ލޯބިވާ މީހުންނަށް ވާތީ. އަޅުގަނޑުމެން ނުނިކުންނާނެ ގައުމު ހަލާކު ކުރާކަށް." އާޒިމާ ވިދާޅުވިއެވެ.
"އަޅުގަނޑުމެން ނުނިކުންނާނެ ގައުމުގެ ހަރު މުދާ ވިއްކާކަށް. އަޅުގަނޑުމެން ނުނިކުންނާނެ ގައުމުގެ ގައުމިއްޔަތު ވިއްކާކަށް."
