ރާއްޖޭގެ ތަރައްޤީގެ ތަޞައްވުރަކީ އެންގޭޖްމަންޓް، ޕާޓްނަރޝިޕް ބިލްޑިންގ، އަދި ފޯކަސްޑް ޑެލިވަރީގެ އެއް ތަޞައްވުރު ކަމުގައި، ރައީސުލްޖުމްހޫރިއްޔާ ޑޮކްޓަރ މުޢިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ޗައިނާގެ ފުޒޫގައި ހުންނަ ފުޒޫ ސްޓްރޭޓް އިންޓަނޭޝަނަލް ކޮންވެންޝަން އެންޑް އެގްޒިބިޝަން ސެންޓަރުގައި ކުރިއަށްދާ އިންވެސްޓް މޯލްޑިވްސް ފޯރަމްގައި ވާހަކަފުޅު ދައްކަވަމުންނެވެ. ރައީސުލްޖުމްހޫރިއްޔާ ޑޮކްޓަރ މުޙަންމަދު މުޢިއްޒު ވިދާޅުވީ، މި ސަރުކާރުގެ ތަޞައްވުރަކީ، އެންގޭޖްމަންޓް، ޕާޓްނަރޝިޕް ބިލްޑިންގ އަދި ފޯކަސްޑް ޑެލިވަރީގެ ތަޞައްވުރު ކަމަށެވެ.
ރައީސް މުޢިއްޒު ދެއްކެވި ވާހަކަފުޅުގައި، ޗައިނާއަށް ކުރައްވާ މި ދަތުރުފުޅަކީ ބޭރު ޤައުމަކަށް ކުރައްވާ ފުރަތަމަ ފުރަމާނަ ދަތުރުފުޅަށްވާތީ، ޗައިނާއަށް ކުރައްވާ ދަތުރުފުޅުގެ މުހިންމުކަމުގެ މައްޗަށް އަލިއަޅުއްވާލެއްވިއެވެ. މި ފޯރަމްގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، މި ފޯރަމްގައި ޗައިނާ އާއި ދިވެހި ވިޔަފާރިވެރިން ތިއްބެވިކަމަށްޓަކައި އުފާކުރައްވާ ކަމުގައި ވިދާޅުވިއެވެ.
އޭގެ އިތުރުން ރައީސުލްޖުމްހޫރިއްޔާދެއްކެވި ވާހަކަފުޅުގައި، ރާއްޖެއާއި ޗައިނާއާ ދެމެދު އޮތް ޒަމާންވީ ގުޅުމުގެ މައްޗަށް އަލިއަޅުއްވާލެއްވިއެވެ. އަދި ޗައިނާއަކީ ރާއްޖޭގެ ތަރައްޤީގެ އެންމެ ގާތް އެއް ބައިވެރިޔާކަން ފާހަގަ ކުރައްވަމުން، 2014 ވަނަ އަހަރު ރައީސް ޝީ ޖިންޕިންގެ ބެލްޓް އެންޑް ރޯޑް އިނިޝިއޭޓިވްގެ ބައިވެރިއަކަށް ރާއްޖެ ވެގެން ދިޔައިރު، އެ ކުންފުނިން ރާއްޖޭގައި އުމްރާނީ ތަރައްގީގެ ބޮޑެތި މަޝްރޫއުތައް ހިންގާފައިވާކަމަށް ވިދާޅުވިއެވެ.
ރައީސުލްޖުމްހޫރިއްޔާ ޑޮކްޓަރ މުޢިއްޒު ދެއްކެވި ވާހަކަފުޅުގައި، ސެންޓްރަލް އެއަރޕޯޓާއި ވިޔަފާރި ބަނދަރު ފުޅާކުރެއްވުމަށް އެމަނިކުފާނު ގެންގުޅުއްވާ ތަޞައްވުރުގެ މައްޗަށް އަލިއަޅުއްވާލައްވަމުން، ބެލްޓް އެންޑް ރޯޑް އިނިޝިއޭޓިވްގެ އޮނިގަނޑުގެ ދަށުން ޕާޓްނަރޝިޕްތައް ހޯއްދެވުމަށް ސަރުކާރުން ވަރަށް ބޮޑަށް ބޭނުންފުޅުވާކަމުގައި ވިދާޅުވިއެވެ.
އެގޮތުން، ޗައިނާއާއި ރާއްޖެއާ ދެމެދު ސޮއިކުރެވުނު މިނިވަން ވިޔަފާރީގެ އެއްބަސްވުމުގެ މައްޗަށް އަލިއަޅުއްވާލައްވަމުން ރައީސުލްޖުމްހޫރިއްޔާ ދެއްކެވި ވާހަކަފުޅުގައި، އެފްޓީއޭގެ ސަބަބުން ދެޤައުމުގެ ދެމެދުގައި ވިޔަފާރީގެ ދާއިރާއާއި އިންވެސްޓްމަންޓްތައް އިތުރުވެގެންދާނެކަމަށާއި، ޚާއްޞަކޮށް، ޗައިނާއަށް މަހުގެ ބާވަތްތައް އެކްސްޕޯޓްކުރުން އިތުރުކޮށް، އެއީ އެފްޓީއޭގެ ތެރެއިން އެންމެ ބޮޑު އިސްކަމެއް ދީގެން ކުރިއަށްގެންދިއުމަށް ބޭނުން ވިޔަފާރީގެ އެއް ދާއިރާކަން ފާހަގަކުރެއްވިއެވެ.
ރައީސުލްޖުމްހޫރިއްޔާގެ ދެކަނބަލުން ޗައިނާއަށް ކުރައްވަމުން ގެންދަވާ ރަސްމީ ދަތުރުފުޅަކީ ޗައިނާގެ ރައީސް ޝީ ޖިންޕިންގެ ދައުވަތަކަށް ކުރައްވާ ފުރަމާނަ ދަތުރުފުޅެކެވެ. މި ދަތުރުފުޅުގައި ރައީސުލްޖުމްހޫރިއްޔާގެ ދެކަނބަލުންގެ އަރިހުގައި ދިވެހި ސަރުކާރުގެ މަތީ ފަންތީގެ ވަފުދެއް ބައިވެރިވެވަޑައިގަންނަވައެވެ.
