ގޯއްޗާއި ފްލެޓް ލިބުނު ފަރާތްތަކަށް މި ހަފްތާ އިން ފެށިގެން ހަވާލު ކުރުމުގެ މަސައްކަތް ފައްޓަވާނެ ކަމަށް ރައީސް، ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
ރައީސް މުއިއްޒު ކުރެއްވި އެކްސް ޕޯސްޓެއްގައި ވިދާޅުވީ، ކުރީ ސަރުކާރުން ގޯއްޗާއި ފްލެޓް ލިބޭނެ ކަމަށް ނިންމައި ގެޒެޓް ކުރި ލިސްޓުގައިވާ މީހުންނަށް ރިޔާސީ އިންތިހާބުގެ ކެމްޕޭނުގައި ވައުދު ވެވަޑައިގެންނެވި ގޮތަށް އެތަންތަން ހަވާލު ކުރައްވާނެ ކަމުގައެވެ.
ގޯއްޗާއި އަދި ފްލެޓް ލިބިނޭ ކަމަށް ފައިނަލް ލިސްޓް ގައި ހިމެނި ގެޒެޓް ކޮށްފައިވާ ފަރައިތަކަށް ރަޖިސްޓްރީ ހަދައިދީ ގޯތި/ފްލެޓް ހަވާލު ކުރުމަކީ އަޅުގަނޑު ވައުދު ވީ ގޯތަށް ކުރިއްޔަށް ދާނޭ ކަމެއް. މި ހަފްތާ އާ މިއަންނަ ހަފްތާ ތެރޭގައި ރަޖިސްޓްރީ ހަވާލުކޮށް ނިއްމުމުގެ މަސައްކަތް ހައުސިން މިނިސްޓްރީ އިން ކުރިއްޔާ ގެންދާނެ. ގޯރި ދީފައިވާ ބައެއް ތަންތަނަކީ ނުހިއްކާ ހުރި ތަންތަން ކަމުން، އެ ތަންތަން ހިއްކުމުގެ މަސަކަތް ބާރާ ކުރިއްޔާ ދަކަންވެސް ފަހަގަ ކޮއްލަން. އަދި ގުޅީފަޅާ ގިރާވަރު ފަޅުން އިތުރު ބިން ހިކުމަށްވެސް ތަޔާރު ވަމުން ދަކަން ދަނަވާލަން.
ދިވެހިންނަށް ބޯހިޔާވަހިކަން ހޯދައި ދިނުމަށް މި ސަރުކާރުން ވަނީ ރަސްމާލެ ނަމުގައި ބޮޑު މަޝްރޫއެއް ފަށައިފައެވެ. މާލޭގެ ދެކުނަށް އޮންނަ ފުށިދިއްގަރުފަޅު ހިއްކައިގެން ތަރައްގީ ކުރާ ރަސްމާލޭގެ މަސައްކަތް މިދިޔަ މަހު ފެށިއިރު، އެ މަޝްރޫއުގެ ދަށުން 1،153 ހެކްޓަރުގެ ބިން ހިއްކުމަށް ހަމަޖެހިފައިވެއެވެ. އެ މަސައްކަތް ކުރުމަށް އާބަންކޯ އިން ހަވާލުކޮށްފައި ވަނީ ސްރީ ލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީސީ) އާއެވެ. މިހާތަނަށް އައިއިރު، ރަސްމާލޭގެ 10 ހެކްޓަރުގެ ބިން ހިއްކައި ވަނީ ނިންމައިފައެވެ.
ފުށިދިއްގަރުފަޅުން ހިއްކުމަށް ހަމަޖެހިފައިވާ ޖުމްލަ ބިމަކީ ހުޅުމާލޭގެ ދެ ފިޔަވަހި އެއްކޮލުމުން ވާވަރުގެ ތިން ގުނައެވެ. މި ބިން ހިއްކުމުގެ މަސައްކަތް ނިންމާލުމަށް ހަމަޖެހިފައި ވަނީ ކުރިއަށް އޮތް އަށް މަސް ތެރޭގައެވެ. މިއީ ރައްޔިތުންނަށް ދިމާވެފައިވާ މި ބޮޑު މައްސަލަ އަށް ޖުމްލަ ހައްލެއް ގެނެސްދޭނެ މަޝްރޫއެއް ކަމުގައި މި ސަރުކާރުން ގަބޫލު ކުރެއެވެ.
