ރާއްޖެއަށް މިހާރު ކުރަމުންދާ ވިއްސާރައިގައި އައްޑޫ ސިޓީއަށް ބޯކޮށް ވާރޭ ބައެއް ގެތަކުގައި ފެންބޮޑުވެއްޖެއެވެ.
ގުގުރުމާއެކު ބޯކޮށް ވާރޭވެހި، ފެން ބޮޑުވާނެކަމަށް ލަފާކޮށް ފުވައްމުލަކާއި އައްޑުއަށް މެޓް އޮފީހުން މިއަދުވަނީ އޮރޭންޖް އެލާރޓްވެސް ނެރެފައެވެ.
މެޓް އޮފީހުން ބުނެފައިވަނީ ފުވައްމުލަކު ސިޓީން ފެށިގެން އައްޑޫ ސިޓީއާއި ހަމައަށް މިއަދު 13:20 އިން 15:20 އަށް ގުރުރުމާއެކު ބޯކަށް ވާރޭވެހި ފެންބޮޑުވާނެކަމަށް ލަފާ ކުރެވޭނެކަމަށެވެ.
އައްޑޫ ސިޓީން މައުލޫމާތު ދިން ގޮތުގައި އެ ސިޓީގެ ރަށްތަކަށް ބޯކޮށްދަނީ ވާރޭ ވެހެމުންނެވެ. އަދި ދެކުނުގެ ބައެއް ރަށްތަކަށްވެސް ބޯކޮށް ވާރޭ ވެހެމުންދާ ކަމަށް މެޓް އޮފީހުން ބުނެފައި ވެއެވެ.
ނެޝަނަލް ޑިސާސްޓާ މެނޭޖުމަންޓު އޮތޯރިޓީ (އެންޑީއެމްއޭ)އިން ބުނެފައިވަނީ ބޯކޮށް ވާރޭ ވެހެން ފެށުމުގެ ކުރިން ކަމާގުޅޭ އިދާރާތަކާއި ގުޅިގެން ވަރަށް ބޮޑަށް ތައްޔާރުވެފައިވާ ކަމުގައެވެ.
އެ އިދާރާއިން ބުނެފައިވަނީ މިހާރުކުރަމުންދާ ވިއްސާރައިގައި އައްޑޫ ސިޓީ ފޭދޫ އާއި ހުޅުމީދޫގައި ފެންބޮޑުވެގެން ރިޕޯޓުކޮށްފައިވާކަމަށާއި، މިހާތަނަށް ފޭދޫގެ 21 ގެއެއްގައި ފެންބޮޑުވެފައިވާ ކަމުގައެވެ.
އަދި އައްޑޫ ސިޓީ މީދޫ ގައި ފެންބޮޑުވެ 10 ގެއަކާއި ބައެއް ގެސްޓްހައުސްތަކާއި ފިހާރަތަކަށް އެކިވަރުގެ ގެއްލުން ލިބިފައިވާކަމަށްވެސް އެންޑީއެމްއޭއިން ބުނެފައި ވެއެވެ. އެ އިދާރާއިން ބުނެފައިވަނީ ސިފައިންނާއި އެެހެނިހެން ފަރާތްތައް ގުޅިގެން ފެން ހިއްކުމާއި ވެލިބަސްތާ ޖެހުމުގައި ހަރަކާތްތެރިވަމުން އަންނަ ކަމަށެވެ.
