"ޓެރަރިސްޓް ހަމަލާއެއް" ދީފާނެ ކަމަށް ބުނެ އިޒްރޭލުން އިންޑިއާއަށް ޓްރެވަލް އެލާރޓު ނެރެފިއެވެ.
އިންޑިއާގެ ވެރިރަށް ނިއުދިއްލީގައި ހުންނަ އިސްރާއީލުގެ އެމްބަސީ ކައިރީގައި އަންގާރަ ދުވަހު އެއްޗެއް ގޮއްވާލުމަކީ ޓެރަރިސްޓް ހަމަލާއެއް ކަމަށް ބެލެވޭތީ އިޒްރޭލުގެ ނޭޝަނަލް ސެކިއުރިޓީ ކައުންސިލުން އިންޑިއާގައި ތިބި އެގައުމުގެ ރައްޔިތުންނަށް ޓްރެވަލް އެޑްވައިޒަރީއެއް ވަނީ ނެރެފައެވެ.
އިންޑިއާގެ ވެރިރަށް ނިއު ދިއްލީގައި ހުންނަ ޗަންކްޔާޕޫރީ ޑިޕްލޮމެޓިކް ކޮމްޕައުންޑުގައި ހުންނަ އިސްރާއީލު އެމްބަސީ ކައިރީގައި އަންގާރަ ދުވަހުގެ ރޭ ދިން ބޮމުގެ ހަމަލާގައި އެއްވެސް މީހަކަށް ގެއްލުމެއް ލިބިފައެއް ނުވެއެވެ. އިޒްރޭލު އެމްބަސީގެ ތަރުޖަމާނު ގައިނީރަ ވިދާޅުވީ އިއްޔެ ހަވީރު 5:48 އެހާކަންހާއިރު އެމްބަސީ ކައިރީގައި ބޮމެއް ގޮއްވާލާފައިވާކަން ޔަގީން ކުރެވޭ ކަމަށެވެ. "ދިއްލީ ފުލުހުންނާއި ސެކިއުރިޓީ ޓީމުން އަދިވެސް ދަނީ އެ މައްސަލަ ބަލަމުން." އޭނާ ވިދާޅުވިއެވެ.
އިޒްރޭލުގެ ނޭޝަނަލް ސެކިއުރިޓީ ކައުންސިލް (އެންއެސްސީ) އިން އަންގާރަ ދުވަހު ނެރުނު ރިކޮމެންޑޭޝަންތަކަކީ "ހާދިސާތައް ތަކުރާރުވެދާނެ" ކަމުގެ ކަންބޮޑުވުންތަކާ އެކު، ހާއްސަކޮށް ނިއު ދިއްލީއަށް އަމަލުކުރާ ރިކޮމެންޑޭޝަންތަކެކެވެ. އިޒްރޭލުގެ ރައްޔިތުން އެއްވެ އުޅޭ ތަންތަނަށް (މޯލްތަކާއި މާރުކޭޓުތައް) އަދި ހުޅަނގުގެ މީހުން/ޔަހޫދީންނާއި އިސްރާއީލަށް ހިދުމަތް ދޭ ކަމަށް ކަނޑައަޅާފައިވާ ތަންތަނަށް ނުދިއުމަށް ވަނީ އިލްތިމާސްކޮށްފަ އެވެ. އަދި އާންމު ތަންތަނުގައި (ރެސްޓޯރެންޓް، ހޮޓާ، ޕަބް ފަދަ ތަންތަން) އިތުރަށް ސަމާލުވުމަށް ވެސް ވަނީ އިލްތިމާސްކޮށްފަ އެވެ.
މީގެ އިތުރުން އިސްރާއީލުގެ ނިޝާންތައް ފާޅުގައި ނުދެއްކުމާއި، ނުރައްކާތެރި ބޮޑެތި އިވެންޓްތަކުގައި ބައިވެރިނުވުމާއި، ސޯޝަލް މީޑިއާގެ އިތުރުން ރިއަލް ޓައިމްގައި ޒިޔާރަތްތަކުގެ ފޮޓޯތަކާއި ތަފްސީލުތައް އާންމު ނުކުރުމަށް ވެސް އެ ރެކޮމެންޑޭޝަންތަކުގައި ވަނީ ލަފާދީފަ އެވެ.
އިސްރާއީލުގެ ޚާރިޖީ ވުޒާރާއިން މީގެ ކުރިން ނެރުނު ނޫސް ބަޔާނެއްގައި ބުނެފައިވަނީ އިންޑިއާގައި ހުންނަ އެގައުމުގެ އެމްބަސީ ކައިރީގައި ހިނގި ބޮމުގެ ހަމަލާގައި އެއްވެސް މީހަކަށް ގެއްލުމެއް ލިބިފައި ނުވާ ކަމަށެވެ.
އެމްބަސީ ކައިރީގައި ހުންނަ ސެންޓްރަލް ހިންދީ ޓްރެއިނިން އިންސްޓިޓިއުޓްގެ ބޭރުގައި ހުންނަ ގްރީން ބެލްޓް ސަރަހައްދުގައި އެއްޗެއް ގޮއްވާލިތާ މާ ގިނަ އިރުތަކެއް ނުވަނީސް ދިއްލީ ފުލުހުންގެ ސްޕެޝަލް ސެލް އާއި ބޮމް ޑިސްޕޯސަލް ސްކޮޑާއި ފަޔާ ޑިޕާޓްމަންޓުގެ ޓީމުތައް ވަނީ އެ ސަރަހައްދަށް ގޮސްފަ އެވެ. ގާތްގަނޑަކަށް ތިން ގަޑިއިރަށް ވުރެ ދިގު މުއްދަތަކަށް އެ ސަރަހައްދު ބަލައި ފާސްކުރުމުގެ އޮޕަރޭޝަނެއް ކުރިއަށް ގެންގޮސްފައިވެ އެވެ.
ނޭޝަނަލް އިންވެސްޓިގޭޝަން އެޖެންސީ (އެންއައިއޭ) ގެ ޓީމަކުން ވެސް އެ ތަން ބެލި ކަމަށް ނިއު ދިއްލީގެ ފުލުހުންގެ އިސް އޮފިޝަލަކު ވިދާޅުވި އެވެ. މި ހާދިސާއާ ގުޅިގެން އެމްބަސީ އާއި އިޒްރޭލުގެ އެހެނިހެން ތަންތަނުގެ ވަށައިގެން ސެކިއުރިޓީ އިތުރަށް ވަރުގަދަކޮށްފައިވާ ކަމަށް އޮފިޝަލުން ބުނެ އެވެ.
މީގެ ކުރިންވެސް އިސްރާއީލު އެމްބަސީއާއި އެތަނުގެ މުވައްޒަފުންނަށް ނިއުދިއްލީގައި ވަނީ ހަމަލާތައް ދީފައެވެ. އިޒްރޭލު އެމްބަސީ ގެ ބޭރުގައި 2021 ވަނަ އަހަރު އެއްޗެއް ގޮއްވާލައި ކާރުތަކަށް ބޮޑެތި ގެއްލުންތަކެއް ލިބުނު ނަމަވެސް އެއްވެސް މީހަކަށް ގެއްލުމެއް ލިބިފައެއް ނުވެއެވެ. 2012 ވަނަ އަހަރުގެ ފެބްރުއަރީ މަހުގެ ތެރޭގައި ނިއުދިއްލީގައި އެމްބަސީގައި ހުރި އިސްރާއީލުގެ ސެކިއުރިޓީ މުވައްޒަފެއްގެ އަނބިކަނބަލުންގެ ކާރަށް ދިން ހަމަލާއެއްގައި ޒަހަމްވި އެވެ.
