މިފްކޯގެ ބޯޑުގައި ސީދާ މަސްވެރީން ބައިވެރިވެ މަސްވެރީން އެ ބޯޑު ތަމްސީލުކުރާނެ ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިކަން ހާމަ ކުރެއްވީ ދިވެހިރާއްޖޭގެ 43 ވަނަ މަސްވެރިންގެ ދުވަހުގެ މުނާސަބަތުގައި މިރޭ ދަރުބާރުގޭ ރަންނަބަނޑޭރި މާލަމުގައި ބޭއްވި ޚާއްޞަ ހަފުލާގައި ވާހަކަފުޅު ދައްކަވަމުންނެވެ.
ރޭގެ ޖަލްސާގައި ވާހަކަ ދައްކަވަމުން ރައީސް ވިދާޅުވއެމަނިކުފާނުގެ ކެބިނެޓުން އެންމެ ފުރަތަމަ ކަންތައްތަކެއް ނިންމީ މި ދިޔަ ހަފުތާގައި ކަމަށާއި، މި ނިންމުންތަކުގައި ވެސް ދިވެހި މަސްވެރީންނަށް ވެފައިވާ ވަޢުދުތައް ހަނދާން ނައްތާލާފައި ނުވާނެ ކަމުގައެވެ.
އެ ގޮތުން ވަރަށް ޚާއްޞަ ނިންމުމެއް މިހާރު ވާނީ ނިންމާފާ. އެއީ މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އަކީ މީގެ ފަހުން ދިވެހި މަސްވެރީންގެ ބައިވެރިވުމާއެކު ހިންގާ ސައްތައިންސައްތަ ދިވެހި ސަރުކާރުގެ ޤައުމީ ކުންފުންޏަކަށް ބަދަލުކުރުމުގެ މަސައްކަތް ފެށުން. މި ކަން ޙަޤީޤަތަކަށްވުމުން މިފްކޯ ވާނީ މުސްތަޤިއްލު ވަކި ކުންފުންޏަކަށް. މި ބަދަލު ގެނައުމުގެ އެންމެ ބޮޑު އެއް ބޭނުމަކީ މިފްކޯގެ ބޯޑުން ކަންކަން ނިންމޭ އިރު، މަސްވެރީންގެ ބަސް މަސްވެރީންގެ އަޑު އެ ކަމުގައި ހިމެނުން.
ރޭގެ ޖަލްސާގައި ވާހަކަ ދައްކަވަމުން ރައީސް މުއިއްޒު ވިދާޅުވިއެވެ.
ރޭގެ ހަފުލާގައި އިތުރަށް ވާހަކަފުޅު ދައްކަވަމުން ރައީސް މުއިއްޒު ވިދާޅުވީ މި ބަދަލު ގެނައުމުގެ އެންމެ ބޮޑު އެއް ބޭނުމަކީ މިފްކޯގެ ބޯޑުން ކަންކަން ނިންމޭ އިރު، މަސްވެރީންގެ ބަސް މަސްވެރީންގެ އަޑު އެ ކަމުގައި ހިމެނުން ކަމުގައެވެ.
މިފްކޯ ތަރައްޤީ ކުރުމުގައި އަދި މިފްކޯގެ ސިޔާސަތުތައް ކަނޑައެޅުމުގައި އަދި މިފްކޯގެ ޕްރޮގްރާމުތައް ހިންގުމުގައި މަސްވެރީން ސީދާ ބަސްކިޔައި، މަސްވެރީންގެ ޙައްޤުތައް ހޯދުމުގައި މަސްވެރިން ބާރުވެރިކުރެވޭނެ. ސަބަބަކީ އަޅުގަނޑު ގަބޫލުކުރާ ގޮތުގައި އެ ފަންނަކަށް ގެންނަން ޖެހޭ އެންމެ ރަނގަޅު ބަދަލުތައް އެންމެ ރަނގަޅަށް އެނގޭނީ ސީދާ އެ ފަންނެއްގެ އަމަލީ ތަޖުރިބާ ލިބިފައިވާ ބަޔަކަށް. އެހެންކަމުން އަޅުގަނޑުގެ ގާތުގައި މަސްވެރީންނަކީ ވަރަށް އަގުހުރި ބައެއް. އެއީ ރާއްޖޭގެ ކަނޑުފަޅުގެ ޙަޤީޤީ ޢިލްމުވެރީން. އާދަޔާ ޚިލާފު ހުނަރުވެރީން.
ރައީސް މުއިއްޒު ވިދާޅުވިއެވެ.
ރައީސް ވިދާޅުވީ އެމަނިކުފާނުގެ ރިޔާސީ ދައުރުގައި އެންމެ ފުރަތަމަ ރަސްމީ ދަތުރެއް މި ކުރީ ތުރުކިޔޭއަށް ކަމަށާއި، މި ދަތުރުރުގައި އެއް މައުޟޫޢެއްކަމުގައި ކަނޑައެޅީ ދިވެހި މަސްވެރިކަން ކަމަށެވެ. އެގޮތުން މަސްވެރީންގެ އުދާސްތަކަށް އުއްމީދެއް ލިބުނުކަމަށް ވިދާޅުވަމުން ރައީސް ވިދާޅުވީ ލަހެއް ނުވެ ދިވެހި މަސްވެރިކަމުގެ އުފެއްދުންތަކަށް ތުރުކިޔޭގެ މާރުކޭޓު ތަނަވަސްކަމާއެކު ހުޅުވިގެންދާނެ ކަމުގައެވެ.
ރޭގެ ޖަލްސާގައި ރައީސުލްޖުމްހޫރިއްޔާގެ އަރިހުގައި އެމަނިކުފާނުގެ އަނބިކަނބަލުން ސާޖިދާ މުޙައްމަދުވެސް ބައިވެރިވެވަޑައިގެންނެވިއެވެ.
މަސްވެރިންގެ ދުވަސް ފާހަގަކުރުމަށް ރޭ ބޭއްވި ޚާއްޞަ ހަފުލާގައި ވަނީ ފާއިތުވި އަހަރު މަސްވެރިކަމުގެ ސިނާޢަތުގައި އަދި މަސްވެރިކަމާ ގުޅުންހުރި ކަންކަމުގައި ފާހަގަކޮށްލެވޭ ކާމިޔާބީތައް ހޯއްދަވާފައިވާ ފަރާތްތަކަށާއި މަސްވެރިކަމުގެ ދާއިރާއަށް ފާހަގަކޮށްލެވޭ އެކިއެކި ޚިދުމަތްތައް ކުރައްވާފައިވާ 19 ފަރާތަކަށް މަސްވެރިންގެ ދުވަހުގެ ޚާއްޞަ އިނާމުތައް ހަވާލުކޮށްދެއްވާފައެވެ. މި ފަރާތްތަކާ އިނާމުތައް ހަވާލުކޮށްދެއްވީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒެވެ.
ކޮމެންޓު ފޮނުވާ