ގައުމުގެ މަސްލަހަތު އިސްކުރާ ހުރިހާ ބޭފުޅުންނާއެކީވެސް މަސައްކަތް ކުރަން ތައްޔާރަށް ހުންނެވިކަމަށާއި، ބޭނުންފުޅުވަނީ އެންމެންނަކީ އެކަތިގަޑެއްގެ ގޮތުގައި ކުރިޔަށް ދާން ކަމުގައި ރައީސް މުއިއްޒު ވިދާޅުވެއްޖެއެވެ.
ރައީސް މިހެން ވިދާޅުވީ އެމަނިކުފާނުގެ ކެބިނެޓާއެކީ މިއަދު ބޭއްވި ނުސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.
މިއަދުގެ ނޫސްވެރިންގެ ބައްދަލުވުމުގައި ވާހަކަދައްކަވަމުން ރައީސް ވިދާޅުވީ އެއްވެސް ބޭފުޅާކާމެދި ޒާތީ މައްސަލައެއް ނެތްކަމަށާއި، ގައުމު ކުރިޔަށް ގެންދިއުމުގައި ހުރިހާ ސިޔާސީ ލީޑަރުންވެސް އެމަނިކުފާނަށް މުހިންމު ކަމުގައެވެ.
އަޅުގަޑު ގަބޫލެއް ނުކުރަން އެއްވެސް ސިޔާސީ ލީޑަރަކީ ގައުމު އިސްނުކުރާނެ ބޭފުޅަކަށް ވާނެކަމަށް. އެހެންވީމަ އަޅުގަޑަކަށް ނެތް އެއްވެސް މައްސަލައެއް އެއްވެސް ބޭފުޅަކާއެކީ މަސައްކަތް ކުރުމުގައެއް. އަޅުގަޑު ދެންނެވިން އަޅުގަޑު ބޭނުންވަނީ އަޅުގަޑުމެންނަކީ އެކަތިގަޑަކަށްވެގެން އެކުވެރިވެގެން ރިވެތި އުސޫލުގަ ވާހަކަ ދެކެވިގެން ކުރިޔަށްދާ ބަޔަކަށް ވާށޭ. އެހެންވީމަ އަޅުގަޑަކަށް ނުފެނޭ އެއްވެސް މަސަލައެއް ދިމާވާނެ ތަނެއް އެއްވެސް ބޭފުޅާކާއެކީ. އެހެންވީމަ އަޅުގަޑު ބަލަނީ ކުރިޔަށް. އަޅުގަޑުގެ ހިތަކު ނޯންނާނެ އެއްވެސް މީހަކާދޭތެރޭ ޒާތީ މައްސަލައެއް. ހިންހަމަނުޖެހުމެއްވެސް. އަޅުގަޑަށް ހަމަ ވަަރަށް މުހިންމު ހުރިހާ ސިޔާސީ ލީޑަރުންވެސް ގައުމު ކުރިޔަށް ގެންދިއުމުގަ.
ރައީސް ވިދާޅުވިއެވެ.
ނޫސްވެރިންގެ ބައްދަލުވުމުގައި އެމަނިކުފާނުގެ ކެބިނެޓާއި ގުޅޭގޮތުން ވާހަކަދައްކަވަމުން ރައީސް ވިދާޅުވީ އެމަނިކުފާނުގެ ކެބިނެޓް ޖަޖް ކުރާނީ ރައްޔިތުންކަމަށާއި، ބޭނުންފުޅުވަނީ ރެއާދުވާލު ވަރަށް ހީވާގިކަމާއެކު އެކީ މަސައްކަތް ކުރާނެ ޓީމެއްކަމުގައެވެ. އަދި ކެބިނެޓާ ދޭތެރޭ ފަޚުރުވެރިވާކަމަށްވެސް ރައީސް ވިދާޅުވިއެވެ.
ރައީސް މުއިއްޒު ވިދާޅުވީ ރައްޔިތުން ވަޒަންކުރަންވީ ކެބިނެޓްގެ މަސައްކަތްތައް ކަމަށާއި، ސަރުކާރުގެ ހުރިހާ އިސްވެރިންވެސް މަސައްކަތް ކުރާނީ ދެފުށް ފެންނަ ގޮތަށްކަމަށެވެ. އަދި ޖަވާބުދާރީ ނުވެވޭވަރުގެ ކަމެއް ނޯންނާނެ ކަމަށް ވިދާޅުވަމުން ރައީސް ވިދާޅުވީ ކޮންމެ މިނިސްޓްރީއެއްގެ މަސައްކަތްތައްވެސް ދާނީ ހާމަކުރަމުން ކަމަށާއި، މީޑިއާ ކުޑަ ޔުނިޓެއްވެސް ކޮންމެ މިނިސްޓްރީއެއްގަ އެކުލަވާލެވޭނެ ކަމުގައެވެ.
އެގޮތުން ރައީސް މުއިއްޒު ވިދާޅުވީ އެމަނިކުފާނުގެ ޓީމަކީ ރައްޔިތުންގެ ޓީމެއް ކަމަށާއި، ވައުދުވީ ގޮތަށް ރައްޔިތުންގެ ގާތަށް ދަތުރުތައްވެސް ވަރަށް އަހަށް ފަށާނެ ކަމަށެވެ. ރައީސް ވިދާޅުވީ ހަފްތާއެއްހާ ދުވަސްފަހުން ދަތުރުތައް ރަށްރަށް ފަށާނެކަމަށާއި، މީޑިއާއެކީ ގާތުން މަސައްކަތް ކުރަން އެމަނިކުފާނު ވަރަށް ބޮޑަށް ބޭނުންފުޅުވާކަމުގައެވެ.
ކޮމެންޓު ފޮނުވާ