ފުޓުބޯޅަ އެސޯސިއޭޝަންގެ ރައީސް ބައްސާމް އަދީލް ޖަލީލުގެ ޕާސްޕޯޓު ހިފަހައްޓައިފިއެވެ.
މައުލޫމާތު ލިބިފައިވާ ގޮތުގައި އޭނާގެ ޕާސްޕޯޓު ހިފަހައްޓާފައިވަނީ އޭނަ ރާއްޖެއިން ފުރައިގެން ދާން އުޅޭކަމުގެ މައުލޫމާތު ފުލުހުންނަށް ލިބިގެން، ފުލުހުން އެދިގެންނެވެ.
އޭނާގެ ޕާސްޕޯޓު ހިފަހައްޓާފައިވަނީ 6 މަސްދުވަހުގެ މުއްދަތަށްކަމަށްވެސް ވަނީ މައުލޫމާތު ލިބިފައެވެ.
ބައްސާމްގެ ޕާސްޕޯޓު ފުލުހުން ހިފެއްހެއްޓިއިރު، އޭނާ އެފްއޭއެމްގެ ރައީސްކަމުގައި ހުރެ އެ މުވައްސަސާގެ ފައިސާއަށް ޚިޔާނާތްތެރި ވެފައިވާކަމުގެ ތުހުމަތުގައި ފުލުހުން ވަނީ ޖިނާއީ ތަހުގީގެއް އޭނާގެ މައްޗަށް ހިންގާފައެވެ.
ދާދިފަހުން ޕީޖީ އޮފީހުން ބޭއްވި ނޫސްވެރިންގެ ބައްދަލުވުމެއްގައި ޕީޖީ ޝަމީމް ވިދާޅުވެފައިވަނީ އެފްއޭއެމްގެ ވެރިންގެ މައްޗަށް ކުރެވޭ ހިޔާނާތުގެ ތުހުމަތުގައި، އެ އިދާރާގެ ރައީސް ބައްސާމް އަދީލް ޖަލީލަކީ އެންމެ އިސްކޮށް ތުހުމަތުކުރެވޭ ފަރާތް ކަމުގައެވެ. އަދި އޭނާގެ މައްޗަށް ދައުވާކުރުމަށް ފާއިތުވެދިޔަ ހަފްތާގައި ފޮނުވާނެ ކަމަށް ޕްރޮސިކިއުޓާ ޖެނަރަލް ހުސައިން ޝަމީމް ވަނީ ވިދާޅުވެފައެވެ.
ބައްސާމްގެ މައްޗަށް ކުރެވިފައިވަނީ ބޭރުގެ އިދާރާތަކުން ފޮނުވާފައިވާ ގިނަ އަދަދެއްގެ ފައިސާއަށް ޚިޔާނާތްތެރި ވެފައިވާކަމުގެ ތުހުމަތެވެ. މިތުހުމަތަކާއި ގުޅޭގޮތުން ހިންގުނު ތަހުގީގަށް ފުލުހުން ވަނީ ފާއިތުވި ނޮވެމްބަރުމަހުގެ 22 ވަނަ ދުވަހު އެފްއޭއެމް ރެއިޑްވެސް ކޮށްފައެވެ.
އެއަށްފަހު ފުލުހުން ބުނެފައިވަނީ ބައްސާމްގެ މައްޗަށް ޖިނާއީ ދައުވާކުރެވޭވަރުގެ ހެއްކާއި ގަރީނާތައް ހުރި ކަމުގައެވެ.
ފާއިތުވި ހަފްތާގައި އޮތް ނޫސްވެރިންގެ ބައްދަލުވުމުގައި ޕީޖީ ޝަމީމް ވިދާޅުވެފައިވަނީ ބޭރުގެ އިދާރާތަކުން ފޮނުވާ ފައިސާއާ މެދު އަމަލުކުރާނެ އުސޫލުތަކެއް ރާއްޖޭގައި ހުންނަ ކަމަށާއި، އެ ފައިސާ ނަހަމަގޮތުގައި ބޭނުންކުރާކަމުގެ ތުހުމަތު އެފްއޭއެމްގެ ވެރިންގެ މައްޗަށް ކުރެވޭ ކަމުގައެވެ.
އެ މައްސަލައިގައި ތުހުމަތު ކުރެވެނީ އެފްއޭއެމްގެ ހިންގެވުމާ ހަވާލުވެ ތިއްބެވި ބޭފުޅުންނަށް. ޕްރައިމް ސަސްޕެކްޓަކަށް އަޅުގަނޑުމެންނަށް މިހާތަނަށް ފެންނަން އޮތީ އެފްްއޭއެމްގެ ރައީސް ބައްސާމް.
ޝަމީމް ވިދާޅުވެފައި ވެއެވެ.
ޝަމީމް ވިދާޅުވެފަައިވަނީ ފީފާއިން އެފްއޭއެމްއަށް ދެ އެހީ ރާއްޖޭގެ ގާނޫނުތަކާއި ޚިލާފަށް އެފްއޭއެމްގެ ވެރީން ކޮށްފައިވާކަމަށް ތުހުމަތު ކުރެވޭ ކަަމަށާއި، އެފައިސާއަކީ ފީފާއިން ދޭ އެހީމަށްވި ނަމަވެސް އެފައިސާ ފޮނުވަނީ ދިވެހި ރައްޔިތުންނަށް ކަމުގައެވެ.
އެހެންވީމާ ރައްޔިތުންނަށް ދޭ ފައިސާ ވަކި ބަޔަކާ އަމާނާތްތެރިކަމާ އެކު ހަވާލުކޮށްފައި މިއޮތީ އެކަން ކުރަން.
ޝަމީމް ވިދާޅުވެފައި ވެއެވެ.
ޝަމީމް ވިދާޅުވެފައިވަނީ މާލީ އިދާރާތަކުން އެއްކޮށްފައި ހުރި މައުލޫމާތުތަކަށް ބަލާއިރު ބައްސާމްގެ މައްޗަށް ދައުވާ ކުރެވޭވަރަށް މައުލޫމާތު ހުރި ކަމުގައެވެ.
