އަންނަ މަހު ރިލީޒް ކުރުމަށް އިއުލާން ކޮށްފައިވާ ސްޕަސްޓާރު ޝާހުރުކް ހާންގެ މި އަހަރުގެ ތިންވަނަ ފިލްމް "ޑަންކީ" ގެ ފުރަތަމަ ލަވަ ބެލުންތެރިންނަށް ދޫކޮށްލައިފިއެވެ.
ޕްރިތަމްގެ މިއުޒިކަށް މި ލަވަ ކިޔާފައި ވަނީ މިހާރުގެ އެންމެ މަގުބޫލު ފިރިހެން އަޑު ކަމަށްވާ އަރިޖިތު ސިންގު އެވެ. މި އަހަރުގެ އެންމެ އުންމީދީ ފިލްމުތަކުގެ ތެރޭގައި ހިމެނޭ "ޑަންކީ" އިން ލަވައެއް ދައްކައިލި އިރު، ފިލްމުގެ ޓްރެއިލާ އަށް ގިނަ ބަޔަކު އަންނަނީ އިންތިޒާކުރަމުންނެވެ.
"މުންނާބާއީ" އާއި 3 އިޑިއަޓްސް" އާއި ޕީކޭ" އަދި "ސަންޖޫ" ގެ ޑައިރެކްޓަރު ރާޖްކުމާރު ހިރާނީ ހަދާފައިވާ މި ފިލްމުން ބެލުންތެރިިންނަށް ދޫކޮށްލި ފުރަތަމަ ލަވަ އަކީ ޝާހްރުކްގެ ނެށުންތަކެއް ފެނިގެންދާ އަދި ބަތަލާ ތާޕްސީ ޕައްނޫގެ ހަރަކާތްތަކެއް ވެސް ފެންނަ "ލުޓް ޕުޓް ގަޔާ" އެވެ.
"ޑަންކީ" އަކީ މިއަހަރުގެ ޑިސެމްބަރު މަހުގެ 22 ވަނަ ދުވަހުގައި ރިލީޒް ކުރުމަށް ތާވަލު ކޮށްފައިވާ ފިލްމްއެކެވެ. މި ފިލްމް އަކީ ސްޕަސްޓާރު ޝާހުރުކް ހާން ލީޑުން ފެނިގެންދާނެ ފިލްމްއެކެވެ. ޝާހު އާއި އެކުގައި ދެން ފެނިގެން ދާނީ ތާޕްސީ ޕަންނޫއެވެ.
"ޑަންކީ" އަކީ ހިޖުރަކުރުމާ ގުޅޭ ގޮތުން ހަދާފައިވާ ސޯޝަލް ކޮމެޑީއެކެވެ. "ޑަންކީ" ގެ ކާސްޓްގައި ތާޕްސީ ޕައްނޫ، ބޮމަން އިރާނީ، ސަތިޝް ޝާހްގެ އިތުރުން ހާއްސަ ފެނިލުންތަކުގައި ވިކީ ކޯޝަލް އާއި ދަރުމެންދުރާ ވެސް ހިމެނެ އެވެ.
