އެމެރިކާގެ ފިޒާ ކުންފުންނާ އަދި އެކުންފުނީގެ ޕާޓްނަރ ކުންފުނި ކަމުގައިވާ ޖަރުމަނު ވިލާތުގެ ބައޯއެންޓެކް ކުންފުނިން ތައްޔާރު ކޮށްފައިވާ ކޯވިޑް19 ވެކްސިން އެމެރިކާގައި ބޭނުންކުރުމުގެ އެމަޖެންސީ ހުއްދަ، އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަން (އެފްޑީއޭ) އިން ދީފިއެވެ.
މިއީ ކޯވިޑް19 ވެކްސިން އެމެރިކާގެ ރައްޔިތުންނަށް ދިނުމުގެ ހުއްދަ އެގައުމުގެ ސަރުކާރުން ދިން ފުރަތަމަ ފަހަރެވެ.
"ކޯވިޑް19 އިން ރައްކާތެރި ވުމަށްޓަކާ، ފިޒާ/ބައޯއެންޓެކްގެ ވެކްސިން އެމަޖެންސީކޮށް ބޭނުން ކުރުމުގެ ހުއްދަ ދީފިން،" ފިޒާގެ އެގްޒެކެޓިވްއަށް ފޮނުވި ސިޓީއެއްގައި، ފުޑް އެންޑް ޑްރަގް އެޑްމިނިސްޓްރޭޝަންގެ ޗީފް ސައިންޓިސްޓް ޑެނިސް ހިންޓަން ލިޔުއްވާފައި ވެއެވެ.
އެފްޑީއޭގެ ޗީފް ސައިންޓުގެ މިނިންމުން މިއައީ، ވެކްސިންއާއި ގުޅުން ހުރި މާހިރުން ހިމެނޭ މިނިވަން ޕެނަލަކުން، ވްކެސިންގެ ރައްކާތެރިކަމާ ގުޅޭގޮތުން ހެދި ދިރާސާތަކާ، ބެލި ބެލުންތަކަށް ފަހުއެވެ. ފިޒާ/ބައޯއެންޓެކްގެ ފަރާތުން ކޯވިޑް19 ވެކްސިން، އުމުރުން 16 އަހަރުން މަތީގެ މީހުންނަށް އެމެރިކާގައި ބޭނުން ކުރުމުގެ ހުއްދައަށް އެދިފައިވަނީ މީގެ 3 ހަފްތާ ކުރިންނެވެ.
ކޯވިޑް19 ވެކްސިން އެމެރިކާގައި ބޭނުން ކުރެވެން ފެށުމާއެކު، ސިއްޙީ މާހިރުން ގަބޫލުކުރާގޮތުގައި، އެމެރިކާގައި މިހާތަނަށް 292،000 މީހުން މަރުވެ، 15.8 މިލިއަން މީހުންނަށް ޖެހިފައިވާ މިބަލީގެ ނުރައްކާތެރިކަމުން، އެމެރިކާ ސަލާމަތް ކުރެވޭނެއެވެ.
އެމެރިކާއަކީ މުޅި ދުނިޔޭގައިވެސް، މިބަލީ ނުރައްކާތެރިކަން އެންމެ ބޮޑުވެގެން ދިޔަ ގައުމެވެ.
ޖޯން ހޮޕްކިންގ ޔުނިވަރސިޓީން އާންމު ކޮށްފައިވާ ހިސާބުތަކަށް ބަލާއިރު، ހުކުރު ދުވަހު އެކަނިވެސް، އެމެރިކާގައި ކޯވިޑް19 އަށް ޕޮޒިޓިވް ވެގެން 2،700 މީހުން މަރުވެފައި ވެއެވެ.
އެމެރިކާގައި ކޯވިޑް19 ވެކްސިން ބޭނުން ކުރުމުގެ އެމަޖެންސީ ހުއްދަ ދޫކުރުމާ ގުޅޭގޮތުން ނެރުނު ބަޔާނެއްގައި، އެފްޑީއޭއިން ބުނެފައިވަނީ، އެ އޭޖެންސީން މިހާރުވަނީ، ޔޫއެސް ސެންޓަރސް ފޯރ ޑިސީސް ކޮންޓްރޯލް އެންޑް ޕްރިވެންޝަން (CDC) އަދި، ވެކްސިން ދިނުމުގެ ހުރިހާ ކަމެއް ކުރިޔަށް ގެންދިއުމަށް ޓަރަމްޕް އެކުލަވާލައްވާފައިވާ، "އޮޕަރޭޝަން ރެޕް ސްޕީޑް"އަށްވެސް، އެމެރިކާގެ ރައްޔިތުންނަށް ވެކްސިން ޖެހުމުގެ މައްސައްކަތް އަވަހަށް ފެށުމަށް އިލްތިމާސް ކޮށްފައެވެ.
އެފްޑީއޭއިން ކޯވިޑް19 ވެކްސިންގެ އެމަޖެންސީ ހުއްދަ ދޫކުރުމާ ގުޅޭގޮތުން މީޑިއާގައި ވާހަކަ ދައްކަވަމުން، އެމެރިކާގެ ހެލްތު އެންޑް ހިއުމަން ސާވިސަސް ސެކެޓްރީ ވިދާޅުވެފައިވަނީ، ގިނަބަޔަކަށް ވެކްސިން ދިނުމަށް އަންނަ ހޯމަ ދުވަހު ނޫނީ އަންގާރަ ދުވަހު ފެށިގެންދާނެ ކަމަށެވެ.
އެމެރިކާގެ ސަރުކާރުން ބުނެފައިވަނީ، އެފްޑީއޭއިން ހުއްދަ ދޫކުރުމާއެކު، އެންމެ ފުރަތަމަވެސް، ވެކްސިންގެ 2.9 މިލިއަން ޑޯޒް ދޫކުރެވެނޭއެވެ. މިއީ ވެކްސިން ބޭނުން ކުރުމުގެ ހުއްދަ ލިބޭ ހަފްތާގައި ފިޒާ/ބައޯއެންޓެކްއިން ތައްޔާރު ކުރުމަށް ހަމަޖެހިފައިވާ އަދަދުގެ %50އެވެ. އަނެއް %50 ރައްކާ ކުރެވޭނީ، ފުރަތަމަ ވެކްސިން ދޭ މީނުންނަށް 3 ހަފްތާފަހުން ދޭންޖެހޭ ދެވަނަ ޑޯޒް އެއްވެސް ދަތިކަމަކާ ނުލާ ދެވޭނެކަން ޔަގީން ކުރުމަށްޓަކައެވެ.
ފިޒާއިން ބުނެފައިވަނީ، އެކުންފުނިން އީޖާދު ކޮށްފައިވާ ވެކްސިނަކީ %95 ރައްކާތެރި ވެކްސިނެއް ކަމުގައެވެ. އަދި، ތަހުލީލުތަކުން ދައްކާފައިވާ ގޮތުގައި، ވެކްސިންގެ ފުރަތަމަ ޑޯޒަށްފަހުވެސް، ވެކްސިން ޖަހާ މީހުން %85 ކޯވިޑް19 އިން ރައްކާތެރި ކޮށްދެއެވެ.
އެހެންނަމަވެސް، ތަފާތު ބޭސްތަކަށާއި އަދި، ވެކްސިންތަކަށް އެކާޖިކްވާ ފަރާތްތަކަށް ކޯވިޑް19 ވެކްސިން ދިނުން ރައްކާތެރި ނޫންކަމުގެ އިންޒާރު އިގިރޭސިވިލާތުން ވަނީ މިހަފްތާގައި ދީފިއެވެ.
އިގިރޭސިވިލާތުގެ ނޭޝަނަލް ހެލްތު އޭޖެންސީން މިއިންޒާރު ދީފައިވަނީ، އިގިރޭސިވިލާތުގައި މިވެކްސިން އެންމެ ފުރަތަމައަށް ދިން މީހުންގެ ތެރޭގައި ހިމެނޭ ދެމީހެއްގެ ކިބައިން ފެންނަން ނުޖެހޭ ބާވަރުގެ ސީރިއަސް އަލާމާތަތްކެއް ފެނުމާއި ގުޅިގެންނެވެ.
އެއޭޖެންސީން ނެރުނު ބަޔާނެއްގައި ބުނެފައިވަނީ، ކޯވިޑް19 ވެކްސިން ދީގެން، އެގައުމުގެ ދެ ސިއްޙީއެހީތެރިއަކަށް އުދަގޫތަކެއް ކުރިމަތިވެފައިވާ ކަމަށާއި، އަދި މި ދެމީހުންނަކީވެސް، އެލާޖިކް ވުމުގެ ރިކޯޑް އޮތް ދެމީހުންކަމަށެވެ. އެހެންމަވެސް، ފަރުވާ ދިނުމަށްފަހު، މިހާރެ ދެމީހުންވެސް ރަގަޅުވެފައިވާ ކަމަށްވެސް މިބަޔާނުގައި ބުނެފައި ވެއެވެ.
