ގެމްބިއާގެ ކުރީގެ ރައީސް، ޔަހުޔާ ޖަމޭއާ ދެކޮޅަށް އިގިރޭސިވިލާތުން ދަތިކުރުމުގެ ފިޔަވަޅުތައް އަޅާއިފިއެވެ. މިއީ އިންސާނީ ހައްގުތަކަށް އަރައިގެންފައިވާ ފަރާތްތަކާ ދެކޮޅަށް އިގިރޭސިވިލާތުން އަޅަމުންދާ ފިޔަވަޅުތައް ފުޅާކޮށް އިތުރަށް ވަރުގަދަކުރުމަށް އެގައުމުން ކުރަމުންދާ މަސައްކަތްތަކުގެ ތެރޭގައި ހިމެނޭ އިތުރު ފިޔަވަޅެކެވެ.
2016 ވަނަ އަހަރު ގެމްބިއާގައި ބޭއްވުނު އާންމު އިންތިޚާބުގައި، އަދަމާ ބަރޯއާއި ވާދަކޮށް ބަލިވުމާއެކު ޔަހުޔާ ވަނީ ގައުމުދޫކޮށް ގޮސްފައެވެ. ޔަހުޔާ ޖަމޭ ހިމެނިގެން ދިޔައީ، އިގިރޭސިވިލާތުން އަލަށް ދަތިކުރުމުގެ ފިޔަވަޅުތައް އެޅި ހުޅަގު އެފްރިކާގެ 3 ގައުމެއްގެ މީހުންގެ ތެރޭގައި ހިމެނޭ އެއް ބޭފުޅާ ކަމުގައެވެ. ދުނިޔޭގެ އެކި ކަންކޮޅުތަކުގައި، އިންސާނީ ހައްގުތަކާ ޚިލާފު ބޮޑެތި ޖަރީމާތައް ހިންގާފައިވާ 10 މީހަކު، އިގިރޭސިވިލާތުން އެކުލަވާލާފައިވާ މިލިސްޓުގައި މިހާރު ހިމެނެއެވެ.
"އިންސާނިއްޔަތާ ޚިލާފު އަމަލުތައް ހިންގާފައިވާ ފަރާތްތަކަށް އަހަރުމެން މިއަދު މި ފޯރުކޮށްދޭ މެސެޖަކީ، އިންސާނިއްޔާތާ ޚިލާފް އަމަލުތައް ހިންގުމަށްފަހުމ އިންސާފަށް ފިލައިގެން އުޅުމުގެ ފުރުސަތު ދީގެން، އިގިރޭސިވިލާތުން ބަލަހައްޓައިގެން ނޯންނެކަމުގެ މެސެޖު،" އިގިރޭސި ފޮރިން ސެކެޓްރީ ޑޮމިނިކް ރާބް ބުރާސްފަތި ދުވަހު ވިދާޅުވެފައިވެއެވެ.
ލަންޑަނުން ބުނެފައިވަނީ، 1994 ވަނަ އަހަރު ގެނެވުނު ބައާވާތެއްގައި ވެރިކަމަށް ވަޑައިގެންނެވި، ޔަހުޔާވަނީ، މީހުން މެރުމަށް ހިތްވަރުދީ، އެކަމަށް އޯޑަރުކޮށް އަދި ސީދާގޮތުން މީހުން މެރުމުގައި ބައިވެރިވެފައެވެ. އަދި މީގެއިތުރުން، މީހުން ގެއްލުވާލުމާއި، ކިޑްނެޕް ކުރުމާއި، ރޭޕްކުރުމާއި، މީހުންނަށް ބޮޑެތި އަނިޔާކުރުންފަދަ އިންސާނިއްތާ ޚިލާފު އެތަކެއް ޖަރީމާތަކެއް ހިންގުމުގައި އޭނާ ބައިވެރިވެފައިވާކަމަށްވެސް އިގިރޭސިވިލާތުން ބުނެފައި ވެއެވެ.
ޔަހުޔާ ޖަމޭގެ އަބިކަބަލުން ޒައިނަބު ޖަމޭގެ މައްޗަށްވެސް މިތުހުމަތުތައް ކުރެވި، ވަނީ ދަތުކުރުމުގެ ފިޔަވަޅުތައް އަޅާފައެވެ. އަދި މީގެއިތުރުން، ޒައިނަބު ޖަމޭގެ މައްޗަށްވަނީ، ހިލޭ ސާބަހަށް މަސައްކަތްކުރާ ފައުންޑޭޝަންތައް ބޭނުންކޮށްގެން، ފިރިކަލުންނާއެކު ފައިސާގެ މުއާމަލާތްތައް ކުރިކަމުގެ ތުހުމަތުވެސް ކުރެވިފައެވެ.
މިދެމަފިރިންނާއި ދެކޮޅަށް ކުރެވޭ މިތުހުމަތުތަކާގުޅިގެން އެމެރިކާއިންވެސް ވަނީ ދަތިކުރުމުގެ ފިޔަވަޅުތައް އަޅާފައެވެ.
އިގުރޭސިވިލާތުން ދަތިކުރުމުގެ ފިޔަވަޅުތައް އަޅާފައިވާ މީހުންގެ ލިސްޓުގައި ހިމެނޭ އިތުރު މީހުންނަކީ، ވެނެޒުއޭލާގެ މިލިޓަރީގައި ހިމެނޭ އިސްއޮފިސަރުންނާއި، ރަޝިޔާގެ ސަރަހައްދެއްކަމުގައިވާ ޗެޗްނިޔާގެ ގާނޫނު ހަދާ މަޖިލީހުގެ ރައީސްގެ އިތުރުން، މި ރީޖަންގެ ޓެރެކް ސްޕެޝަލް ރެޕިޑް ރެސްޕޮންސް ޔުނިޓް މެމްބަރުންނެވެ.
މީގެ އިތުރުން، ޕާކިސްތާނުގެ ކަރާޗީގެ ކުރީގެ ޕޮލިސް "އެންކައުންޓަރ ސްޕަޝަލިސްޓެއް" ކަމުގައިވާ އަންވަރު އަހުމަދު ޚާންވެސް މިލިސްޓުގައި ހިމެނެއެވެ. އޭނާގެ މައްޗަށް ތުހުމަތު ކުރެވިފައިވަނީ، އޭނާ އިސްވެހުރެ ދެވުނު 190 ހަމަލާއެއްގައި 400 އަށްވުރެ ގިނަ މީހުން މަރުވެފައިވާ ކަމުގެ ތުހުމަތެވެ.
މިއަހަރުގެ ޖެނުއަރީ މަހު ޔޫރަޕިއަން ޔޫނިއަންއިން ވަކިވެފައިވާ އިގިރޭސިވިލާތުން ވަނީ، އިންސާނީ ހައްގުތަކާ ޚިލާފް ޖަރީމާތައް ހިންގާ ފަރާތްތަކާ ދެކޮޅަށް ދަތިކުރުމުގެ ފިޔަވަޅުތައް އަޅާނެ އެގައުމުގެ އަމިއްލަ އުސޫލުތަކެއް މިއަހަރުގެ ޖުލައިމަހު ގާއިމް ކޮށްފައެވެ. އަދި މިހާތަނަށް އެގައުމުން ވަނީ، އިންސާނިއްޔަތާއި ޚިލާފު ބޮޑެތި ޖަރީމާތައް ހިންގާފައިވާ 49 ފަރާތަކާ ދެކޮޅަށް ދަތި ކުރުކުރުމުގެ ފިޔަވަޅުތައް އަޅާފައެވެ.
މީގެތެރޭގައި ހިމެނޭ ފުރަތަމަ 25 މީހުންނަކީ، މަރާލެވިފައިވާ ރަޝިއާގެ ލޯޔަރު ސާގީ މެގްނިސްކީ މަރާލުމުގައި ބައިވެރިވެފައިވާ ކަމަށް ތުހުމަތުކުރެވޭ މީހުންނާއި އަދި 2018 ވަނަ އަހަރު ތުރުކީގައި މަރާލެވުނު ޖަމާލް ހަޝޯގީ މަރާލިކަމަށް ތުހުމަރުކުރެވޭ ސައުދީ އަރަބިއާގެ ރައްޔިތުންނެވެ.
މީގެއިތުރުން އިގިރޭސިވިލާތުން ފާއިތުވެދި ސެޕްޓެމްބަރު މަހުވަނީ، މިލިސްޓަށް، ބެލަރުސްގެ މިހާރުގެ ރައީސް އެލްގްޒެންޑަރ ލުކަޝަންކޯގެ ނަންވެސް އިތުރުކޮށްފައެވެ. އޭނާ މިލިސްޓުގައި ހިމެނިގެންދިޔައީ، ދާދިފަހުން އެގައުމުގައި ބޭއްވުނު، އިންތިޚާބަށްފަހު އެގައުމުގައި އުފެދިގެންދިޔަ ހަމަނުޖެހުންތަކުގައި، އާންމު ރައްޔިތުންނާ ދެކޮޅަށް އިންސާނިއްޔަތާ ޚިލާފު އަމަލްތައް ހިންގާފައިވާ ކަމަށް ކުރެވޭ ތުހުމަތުތަކާ ގުޅިގެންނެވެ.
އިގިރޭސިވިލާތުން އެކުލަވާލާފައިވާ މިލިސްޓުގައި މިހާރު، 65 މީހެއްގެ އިތުރުން، 3 ޖަމާއަތެއްވެސް ހިމެނެއެވެ.
