އަންނަ އަހަރަށް ލަފާކޮށް ހުށައަޅާފައިވާ ބަޖެޓު ދިރާސާކުރާ ކޮމިޓީގެ. މުގައްރިރަކަށް ކިނބިދޫ ދާއިރާގެ މެންބަރު މުޙައްމަދު ނާޝިޒް އަދި ނާއިބު މުގައްރިރަކަށް އަލިފުށީ ދާއިރާގެ މެންބަރު މުޙައްމަދު ރަޝީދު ހުސައިން (ބިގޭ) އައްޔަންކޮށްފިއެވެ.
މިއީ ބަޖެޓު ކޮމިޓީގެ މުގައްރިރަށާއި، ނާއިބު މުގައްރިރުކަމަށް މި ދެބޭފުޅުން އައްޔަންކުރި 4 ވަނަ ފަހަރެވެ.
ބަޖެޓު ދިރާސާކުރަން ބޭއްވި ކޮމިޓީ ބައްދަލުވުމުގައި މުގައްރިރުކަމަށް ނާޝިޒްގެ ނަން ހުށައެޅީ ދާންދޫ ދާއިރާގެ މެންބަރު ޔައުގޫބް ޢަބްދުﷲއެވެ. ެ މަޤާމަށް ނާޝިޒް އައްޔަންކުރީ 15 މެންބަރުންގެ ވޯޓުންނެވެ.
ނާއިބު މުގައްރިރަކަށް ބިގޭގެ ނަން ހުށައެޅީ ނާޝިޒެވެ. ބިގޭވެސް އެ މަޤާމަށް އައްޔަންކުރީ 15 މެންބަރުންގެ ވޯޓުންނެވެ.
ބަޖެޓު ކޮމިޓީއަކީ މަޖިލީހުގެ މާލިއްޔަތު ކޮމިޓީއާއި އިޤްތިޞާދީ ކޮމިޓީގެ ޖޮއިންޓް ކޮމިޓީއެކެވެ. މާލިއްޔަތު ކޮމިޓީގެ މުގައްރިރަކީ ނާޝިޒެވެ. އަދި އިޤްތިޞާދީ ކޮމިޓީގެ މުގައްރިރަކީ ބިގޭއެވެ.
މަޖިލީހުގެ ރައީސްކަމުން ނަޝީދު ދުރުކުރުމުގެ މަސައްކަތް ދިގުލައިގެންގޮސް ބަޖެޓުގެ މަސައްކަތްވެސް ވަނީ ލަސްވެފައެވެ. މިމަސް ނިމުމުގެ ކުރިން ބަޖެޓު މަޖިލީހުން ނިންމާ ފާސްކުރަންޖެހެއެވެ.
