މިއަދު ފާހަގަ ކުރާ ބޮލީވުޑްގެ ތަރި ޝާހްރުކް ޚާންގެ 58 ވަނަ އުފަން ދުވަހާ ދިމާކޮށް އޭނަގެ އެންމެ ފަހުގެ ފިލްމު "ޖަވާން" ނެޓްފްލިކްސް އިން ސްޓްރީމް ކުރަން މިއަދު ފަށައިފި އެވެ.
މިއަދަކީ ޝާހުގެ 58 ވަނަ އުފަންދުވަހެވެ. ނެޓްފްލިކްސް އިން ގެނެސްދިން ޝާހުގެ އުފަންދުވަހަށް ހާއްސަ ވީޑިއޯއެއް މެދުވެރިކޮށް ރޭގައި ވަނީ "ޖަވާން" އެ ޕްލެޓްފޯމްގައި ސްޓްރީމް ކުރަން ފެށިކަން ޝާހު އިއުލާންކޮށްފަ އެވެ.
ސިނަމާގައި ދެއްކި އިރުގައި އެ ފިލްމުގެ ދިގުމިނަކީ ދެ ގަޑިއިރާ 45 މިނެޓެވެ. މިހާރު އެ ފިލްމުގައި ވަނީ އިތުރު ފަސް މިނެޓުގެ މަންޒަރުތައް ހިމަނައިފަ އެވެ. އެހެން ކަމުން ސިނަމާއިން ނުފެންނަ ފިލްމް ގެ ބައެއް ނެޓްފްލިކްސް އިން ފެނިގެންދާނެއެވެ.
View this post on Instagram
މި ފިލްމަކީ މި އަހަރު އިންޑިއާގެ އެންމެ ކާމިޔާބު ފިލްމެވެ. ސެޕްޓެމްބަރު މަހުގެ 7 ގައި ރިލީޒްކުރި ގޮތަށް އަދިވެސް "ޖަވާން" ގެ ފޯރި ސިނަމާތަކުގައި ކެނޑިގެން ނުދާ އިރު، މި ފިލްމަށް މިހާތަނަށް ބޮކްސް އޮފީހުގައި އާމްދަނީގެ ގޮތުގައި 140 މިލިއަން ޑޮލަރު ލިބިފައިވެ އެވެ.
ޝާހްރުކްގެ އަމިއްލަ ފިލްމު ކުންފުނި، ރެޑް ޗިލީސް އެންޓަޓައިންމަންޓްގެ މި އެކްޝަން ތުރިލާ، ތަމަޅަ ޑައިރެކްޓަރު އެޓްލީ ހެދީ 38 މިލިއަން ޑޮލަރުގެ ބަޖެޓަކުންނެވެ.
މި ފިލްމުގައި ޝާހުއާ އެކު ލީޑު ރޯލުތައް ކުޅުނީ، ދެކުނު އިންޑިއާގައި މަޝްހޫރު ތަރިން ކަމަށްވާ ނަޔަންތާރާ އާއި ވިޖޭ ސެތޫޕަތީ އަދި ސަންޔާ މަލްހޯތުރާ އެވެ. އަދި ހާއްސަ ފެނިލުމަކުން ދީޕިކާ ޕަދުކޯން ވެސް ފެނުނެވެ.
"ޖަވާން" އަކީ މި އަހަރު ރިލީޒްވި ޝާހްރުކްގެ ދެވަނަ ފިލްމެވެ. ފުރަތަމަ ފިލްމަކީ ޖެނުއަރީގައި ރިލީޒްކުރި އެކްޝަން ތުރިލާ "ޕަތާން" އެވެ.
