ތަލާ ކަންގަނާ ރަނާވަތު ޑައިރެކްޓްކޮށް، ކުޅުނު ފިލްމު "އިމަޖެންސީ" އަންނަ އަހަރަށް ފަސްކޮށްފި އެވެ.
ސޯޝަލް މީޑިއާގައި މިކަން ހިއްސާކޮށް ހުނަރުވެރި ބަތަލާ ބުނީ އަންނަ މަހުގެ 24 ގައި ބެލުންތެރިންނަށް ދޫކޮށްލާ ގޮތަށް އޮތް ފިލްމު މި އަހަރު ނުގެނެސްދޭން ނިންމި ސަބަބަކީ ފުލުފުލުގައި އޭނަގެ ފިލްމުތަކެއް އަންނަ ގޮތަށް ހުރުމުން ކަމަށެވެ.
އޭނާ މިކަން އިއުލާން ކުރި އިރުގައި އެންމެ ފަހުން ރިލިޒް ކުރި ކަންގަނާގެ ފިލްމް "ތޭޖަސް" ބަލާނެ ބަޔަކު ނުވެގެން މިހާރު އޮތީ ސިނަމާއިން ނަގާ ހާލަތުގައިއެވެ. ފިލްމް އަށް މިހާރު އުންމީދު ކުރި ވަރާއި ގާތަށްވެސް ތަރުހީބު ނުލިބޭނަކަން އޮތީ ކަށަވަރު ވެފައިއެވެ.
"އިމަޖެންސީ" އަންނަ އަހަރަށް ފަސްކުރި ނަމަވެސް މި ފިލްމު ގެނެސްދޭނެ ވަކި ތާރީހެއް އަދި ނުނިންމަ އެވެ. "އިމަޖެންސީ" ގެ ލީޑުން ކަންގަނާ ރަނާވަތު ފެނިގެންދާއިރުގައި މި ފިލްމްގެ ކާސްޓްގައި އަނޫޕަމް ކޭރް، މަހީމާ ޗައުދަރީ، މިލިންދު ސޯމަން އަދި ޝްރެޔަސް ތަލްޕަޅޭ އަދި މަރުވެފައިވާ އެކްޓަރު ސަތިޝް ކޯޝިކް ވެސް ހިމެނެ އެވެ.
"އިމަޖެންސީ" އަކީ ކަންގަނާގެ ޕްރޮޑަކްޝަން ހައުސް، މަނިކަރްނިކާގެ ދަށުން އޭނާ ޕްރޮޑިއުސްކޮށް އަދި ޑައިރެކްޓުވެސް ކުރާ ފިލްމެކެވެ. މިއީ ކަންގަނާގެ ދެވަނަ ޑައިރެކްޝަނަށެވެ.
View this post on Instagram
"އިމަޖެންސީ" ގެ ވާހަކަ ބިނާކޮށްފައި ވަނީ އެކަމަނާގެ ވެރިކަމުގައި ޖޫން 25، 1975 ގައި ގައުމުގައި އިއުލާންކުރި ކުއްލި ހާލަތާއި އޭގެ ސަބަބުން އުފެދުނު ސިޔާސީ ކޯޅުންތަކާ އެކީ އިންޑިއާގެ މަސްރަހު ހޫނުވެގެން ދިއުމުގެ މައްޗަަށެވެ. މި ފިލްމްގެ ޕޯސްޓަރު ތަށް ވެސް މިހާރު ވަނީ ދައްކައިލައިފައިއެވެ.
