އިސްރާއީލުން ހިފާފައިވާ ހުޅަނގު އައްސޭރީގެ މިސްކިތަކަށް ބޮން އަޅައިފިއެވެ. އިސްރާއީލުން ބުނެފައިވަނީ، މި މިސްކިތުގެ ދަށުގައި ހުރި ބިންގަރާހަކީ ހަނގުރާމަވެރިން ހަމަލާތައް އިންތިޒާމުކުރުމަށް ބޭނުންކުރާ ތަނެއް ކަމަށެވެ. ފަލަސްތީނުގެ ޑޮކްޓަރުން ބުނެފައިވަނީ މި ހަމަލާގައި އެކަކު މަރުވެފައިވާ ކަމަށެވެ.
އިސްރާއީލުން ދިން ވައިގެ ހަމަލާއަކީ ޣައްޒާގެ ހަމާސް ޖަމާއަތުގެ ހަތިޔާރުއެޅި މުޖާހިދުން އޮކްޓޯބަރު މަހުގެ 7 ވަނަ ދުވަހު އިސްރާއީލަށް ދިން ނުރައްކާތެރި ހަމަލާއަށްފަހު، ހަމަނުޖެހުން އިތުރުވެފައިވާ ހުޅަނގު އައްސޭރިއަށް ފާއިތުވި ދުވަސްތަކުގައި އިސްރާއީލުގެ އަސްކަރިއްޔާއިން ދިން ދެވަނަ ހަމަލާއެވެ.
އިސްރާއީލުން ބުނެފައިވަނީ ޖެނިން ރެފިއުޖީ ކޭމްޕްގައި ހުންނަ އަލް އަންސާރު މިސްކިތުގެ ތިރީގައި ވާ ކޮމްޕައުންޑަކީ އެގައުމަށް ދިން ހަމަލާތަކުގެ ޒިންމާ އުފުލަން ޖެހޭ ހަމާސް ޖަމާއަތާއި ފަލަސްތީނު އިސްލާމިކް ޖިހާދުގެ ހަނގުރާމަވެރިންގެ ކޮމްޕައުންޑެއް ކަމަށެވެ. "ދާދި ފަހުން އިންޓެލްއަށް ލިބުނީ ޓެރަރިސްޓުން، ޓެރަރިސްޓް ހަމަލާއެއް ދޭން އުޅޭ ކަމުގެ އިޝާރާތެއް،" އަސްކަރިއްޔާއިން ނެރުނު ބަޔާނެއްގައި ބުނެފައިވެ އެވެ.
އިސްރާއީލުގެ އަސްކަރިއްޔާއިން އާންމުކުރި ފޮޓޯތަކުން ފެންނަކަމަށް އެގައުމުން ބުނެފައިވަނީ މިސްކިތުގެ ދަށުގައި ހުރި ބަންކަރަކަށް ވަންނަ ދިމާލުގެ މަންޒަރެވެ. އަދި އެތަނުގައި ހަނގުރާމަވެރިން ހަތިޔާރު ރައްކާކޮށްފައި ހުރި ތަން ދައްކުވައިދޭ ޑައިގްރާމެއް ވެސް ވަނީ އާންމުކޮށްފަ އެވެ.
އިސްރާއީލް ޣައްޒާއަށާއި ހުލަނގު އައްސޭރިއަށް ދެމުންދާ ހަމަލާތަކުގައި ފަލަސްތީނުން މިހާތަނަށް 4،385 މީހުން ޝަހީދުވެފައިވާ އިރު، އޭގެ ތެރޭގައި 1،661 ކުޑަކުދިން ހިމެނެއެވެ. އަދި 13،00 އަށްވުރެ ގިނަ މީހުން ޒަޚަމްވެފައިވާ ކަމަށް ފަލަސްތީނުން ބުނެފައިވެއެވެ. ހަމާސްގެ ހަމަލާތަކުގައި އިސްރާއީލުން މަރާލާފައި ވަނީ 1،403 މީހުންނެވެ. އަދި 4،932 މީހުން ވަނީ ޒަހަމްކޮށްލައިފައެވެ.
