އެމެރިކާގެ ރައީސް ޖޯ ބައިޑްންއަށްފަހު، އިނގިރޭސި ބޮޑުވަޒީރު ރިޝީ ސުނަކްވެސް އިސްރާއީލަށް ވަޑައިގަންނަވާގޮތަށް ހަމަ ޖެހިއްޖެއެވެ.
ފަލަސްތީނުގެ ހަމާސް ޖަމާއަތުން އިސްރާއިލަށް ދިން ކުއްލި ހަމަލާއަށްފަހު، އިސްރާއީލުން ފަލަސްތީނުގެ ގާޒާއާއި ދެކޮޅަށް ފަށާފައިވާ އުދުވާނަށް ތާއީދު ކުރާކަން ހާމަކޮށް އިސްރާއީލާއެކު ތިބިކަން ދުނިޔެއަށް ދެއްކުމަށް ހުޅަނގުގެ ގައުމުތަކުން މިހާރު ގެންދަވަނީ އިސްރާއީލަށް ވަޑައިގެން އެގަމުމުގެ އިސްވެރިންނާ ބައްދަލު ކުރަމުންނެވެ.
އިނގިރޭސި ވިލާތުގެ ބޮޑުވަޒީރު ރިޝީ ސުނަކް އިސްރާއީލަށް ވަޑައިގަތުމަށް ހަމަޖެހިފައިވަނީ ބުރާސްފަތި ދުވަހުގެ ފަތިހުއެވެ. އޭނާގެ މި ދަތުރުފުޅުގައި އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އާއި އިޒްރޭލުގެ ރައީސް އައިޒަކް ހަރްޒޮގްއާ ބައްދަލު ކުރައްވާނެ ކަމަށް ބެލެވެ އެވެ.
ފަލަސްތީނުގެ ޣައްޒާގެ ހޮސްޕިޓަލަކަށް އިސްރާއީލުގެ އަސްކަރިއްޔާއިން ދިން ބޮމުގެ ހަމަލާއެއްގައި ފަލަސްތީނުގެ 500 އަށްވުރެ ގިނަ މީުން ޝަހީދުވުމާއި ގުޅިގެން މުޅި އަރަބި ދުނިޔޭގައި ދަނީ އިސްރާއީލާ ދެކޮޅަށް މުޒާހިރާތައް ކުރަމުންނެވެ. އެހެންނަމަވެސް އިސްރާއީލުން ވަނީ މިހަމަލާއަކީ އެގައުމުގެ އަސްކަރިއްޔާގެ ހަމަލާއެއް ނޫންކަމަށް ބުނެ، މިއީ ފަލަސްތީނުގެ އިސްލާމިކް ޖިހާދުން އެގައުމަށް ފޮނުވާލި ރޮކެޓެއް ފެއިލްވެގެން، ހޮސްޕިޓަލަށް އަމާޒުވެގެން ހިގި ގޮވުމެއްކަމަށް ބުނެފައެވެ. ނަމަވެސް އެ ޖަމާއަތުން ވަނީ އެކަން ދޮގުކޮށްފަ އެވެ.
އިސްރާއީލުން ގާޒާއަށްދިން މި އަނިޔާވެރި ހަމަލާއަށް ފަހު އުރުދުންއިން ވަނީ އެމެރިކާ އާއި މިސްރުގެ ރައީސުންނާ އެކު ބޭއްވުމަށް ހަމަޖެހުނު ސަމިޓް ކެންސަލްކޮށްފަ އެވެ. އަދި ފަލަސްތީނުގެ ރައީސް މަހްމޫދު އައްބާސް މީގެ ކުރިން ވަނީ އެ ބައްދަލުވުމުން ވަކިވެވަޑައިގެންފަ އެވެ. އެމެރިކާގެ ރައީސް އިސްރާއިލަށް ވަޑައިގަތުމަށް އެނބުރި ގައުމަށް ވަޑައިގަންނަވަން ޖެހިވަޑައިގަތީ އަރަބި ގައުމުތަކުގެ އެއްވެސް ވެރިއަކާ ބައްދަލުކުރުމުގެ ފުރުސަތު ނުލިބިއެވެ.
އިސްރާއީލުން ގާޒާގެ ހޮސްޕިޓަލަށް ދިން ހަމަލާ ދުނިޔޭގެ ލީޑަރުން ކުށްވެރިކުރައްވަމުން ގެންދަވާއިރު، "ވަގުތުން ހަނގުރާމަ ހުއްޓާލުމަށް" އދ.ގެ ސެކެޓްރީ ޖެނެރަލް ވަނީ ގޮވާލައްވާފައެވެ. އަދި މިހަމަލާ ކުށްވެރިކޮށް މެދުއިރުމައްޗާއި އެހެން ހިސާބުތަކުގައި ވެސް މުޒާހަރާތައް ދަނީ ކުރަމުންނެވެ.
މިދިޔަ އޮކްޓޯބަރު މަހުގެ ހަތްވަނަ ދުވަހު އިސްރާއީލުގެ އެތެރޭގައި ހަމާސް ޖަމާއަތުން ދިން ހަމަލާގައި 1،400 އަށް ވުރެ ގިނަ މީހުން މަރުވުމަށް ފަހުން އިސްރާއީލުން ޣައްޒާއަށް ދިން ހަމަލާތަކުގައި ފަލަސްތީނުގެ 3،300 އަށް ވުރެ ގިނަ މީހުން ވަނީ ޝަހީދުވެފަ އެވެ.
