ޣައްޒާގައި ހިނގަމުންދާ ހަމަނުޖެހުންތަކުގެ ފުރަތަމަ ހަތް ދުވަހުގެ ތެރޭގައި ގާތްގަނޑަކަށް އެއް މިލިއަން މީހުން ގެދޮރު ގެއްލިފައިވާ ކަމަށް ފަލަސްތީނުގެ ރެފިއުޖީންނަށް އެހީތެރިކަން ފޯރުކޮށްދޭ އދ.ގެ އެޖެންސީން ބުނެފިއެވެ.
ޔޫއެންއާރްޑަބްލިއުއޭގެ ޑިރެކްޓާ އޮފް ކޮމިއުނިކޭޝަންސް ޖޫލިއަޓް ޓޫމާ އޭއެފްޕީއަށް މައުލޫމާތު ދެއްވަމުން ވިދާޅުވީ ޣައްޒާގައި ހިނގަމުންދާ ހަނގުރާމައިގެ ފުރަތަމަ ހަތް ދުވަހުގެ ތެރޭގައި ގާތްގަނޑަކަށް އެއް މިލިއަން މީހުން ގެދޮރު ގެއްލިފައިވާ ކަމަށެވެ. "އަދިވެސް މީހުން ގެދޮރު ދޫކޮށް ދާތީ މި އަދަދު އިތުރުވުމަކީ އެކަށީގެންވާ ކަމެއް."
އިސްރާއީލުން ޣައްޒާގެ ހަމާސްގެ އަމާޒުތަކަށް ހަމަލާދެމުން ދަނީ މިދިޔަ އޮކްޓޯބަރު މަހުގެ ހަތްވަނަ ދުވަހު ފަލަސްތީނުގެ ހަނގުރާމަވެރިން އިސްރާއީލުގެ ދެކުނުގެ ސަރަހައްދަށް ދިން ނުރައްކާތެރި ހަމަލާއެއްގައި 1،300 އަށް ވުރެ ގިނަ މީހުން މަރުވުމާ ގުޅިގެންނެވެ. ޣައްޒާގެ އައްސޭރިފަށުގެ އެންކްލޭވްގައި ހަމާސްގެ ލީޑަރުންނާއި ހަނގުރާމަވެރިންނާއި އެމީހުން ތިބޭ ތަންތަނަށް އަމާޒުކޮށް އިސްރާއީލުން ދިން ވައިގެ ހަމަލާތަކުގައި ވެސް 2،300 އަށް ވުރެ ގިނަ މީހުން ވަނީ ޝަހީދުވެފަ އެވެ.
އިސްރާއީލުން މިހާރު ތައްޔާރުވަމުން ދަނީ އެއްގަމުމަގުން ޣައްޒާއަށް އަރައިގަތުމަށެވެ. އަދި އޭގެ ކުރިން ޣައްޒާގެ އުތުރުގައި ދިރިއުޅެމުންދާ ފަލަސްތީނުގެ 1.1 މިލިއަން މީހުން އެސަރަހައްދު ދޫކޮށް، ޣައްޒާގެ ދެކުނަށް ހިޖުރަ ކުރުމަށް އިސްރާއީލުން ވަނީ އިންޒާރު ކޮށްފައެވެ.
