ޣައްޒާގައި ކުށެއް ނެތް އާންމުންނާ ދެކޮޅަށް އިސްރާއީލުން ހިންގަމުންދާ އަސްކަރީ ޙަމަލާތަކާއި، ޣައްޒާގެ އުތުރުގައި ދިރިއުޅޭ 1.2 މިލިއަން އާންމުން 24 ގަޑިއިރުގެ ތެރޭގައި އެޤައުމުގެ ދެކުނުގައި ބަދަލުކުރުމަށް އިސްރާއީލުގެ އަސްކަރިއްޔާއިން ގޮވާލުމުން ދިވެހި ސަރުކާރުން އަނެއްކާވެސް ހަރުކަށި އިބާރާތުން ކުށްވެރިކޮށްފިއެވެ.
އިސްރާއީލުގެ އުދުވާން ކުއްވެރިކޮށް ދިވެހި ސަރުކާރުން ނެރުނު ބަޔާނުގައި ވިދާޅުވެފައިވަނީ، ސަލާމަތާއި ރައްކާތެރިކަމުގެ އެއްވެސް ޔަގީންކަމެއް ނުދިނުމަކީ ނުވަތަ އެފަރާތްތަކަށް އެނބުރި ގެދޮރަށް އަދެވޭނެ ކަމުގެ ޔަގީންކަމެއްނެތި، މަޖުބޫރުކޮށްގެން ގެދޮރުން ނެރެލުމަކީ ހަނގުރާމައިގެ ޖަރީމާއެއް ކަމުގައެވެ.
މި ބަޔާނުގައި އިތުރަށް ވިދާޅުވެފައިވަނީ، މި ނުރައްކާތެރި ޙަމަލާތަކުގެ ސަބަބުން މިހާރުވެސް ފަލަސްޠީނުގެ އެތައް ސަތޭކަ ކުށެއްނެތް އާންމު ރައްޔިތުންގެ ފުރާނަ ގެއްލި، އެތައް ހާސް ބަޔަކު އަނިޔާވަމުންދާކަމުގައެވެ.
މި ހަމަލާތަކުގެ ސަބަބުން ހޮސްޕިޓަލްތަކާއި ސްކޫލްތަކާއި އދ.ގެ ފެސިލިޓީތަކާއި މީހުން ދިރިއުޅޭ އިމާރާތްތަކާއި އަޅުކަންކުރާ ތަންތަން ފަދަ މުހިންމު އުމްރާނީ ވަސީލަތްތައް ވަނީ އިތުރަށް ހަލާކުވެފައެވެ. ފަލަސްޠީނުގެ ކުށެއްނެތް އާންމުންނާއި ދެކޮޅަށް، ހިންގަމުންދާ މި ޙަމަލާތަކަކީ، ބައިނަލްއަޤްވާމީ އިންސާނީ ޤާނޫނަށް އިހުމާލުވެ، ބައިނަލްއަޤްވާމީ އިންސާނީ ޤާނޫނާ ޚިލާފު ޢަމަލުތަކެއް ކަމުގައި ދިވެހި ސަރުކާރުން ދެކެއެވެ.
ދިވެހި ސަރުކާރުގެ ބަޔާނުގައި ވިދާޅުވެފައި ވެއެވެ.
ފަލަސްޠީނުގައި ކުށެއްނެތް ޢާންމުންނާ ދެކޮޅަށް މިހާރު ދެމުންދާ ލާއިންސާނީ ޙަމަލާތައް ހުއްޓުވުމަށާއި، ޣައްޒާއަށް ބޭނުންވާ ބޭހާއި، ކާބޯތަކެތީގެ ބާވަތްތަކާއި، އަސާސީ ބޭނުންތައް ވަގުތުން ފޯރުކޮށްދިނުމަށް މަގުފަހިކުރުމަށް ޓަކައި އިންސާނީ އެހީގެ ކޮރިޑޯތައް ހުޅުވުމަށް ބައިނަލްއަޤްވާމީ މުޖުތަމަޢަށް ދިވެހި ސަރުކާރުން ވަނީ ގޮވާލައެވެ.
ފަލަސްޠީނުގެ ރައްޔިތުންނަށް ލިބިދޭ ޙައްޤުތަކުގެ ތެރޭގައި، އަމިއްލަ އިޚްތިޔާރުގެ ޙައްޤުތައް ޙާޞިލުކުރުމުގައި ފަލަސްޠީނުގެ ރައްޔިތުންނަށް އެއްވެސް ޝަރުތެއްނެތި ތާއީދުކޮށް އެއްބާރުލުން ދޭނެކަމުގެ ޔަޤީންކަން ދިވެހި ސަރުކާރާއި ރައްޔިތުން ވަނީ ތަކުރާރުކުރައްވާފައިވާކަން މި ބަޔާނުގައި ފާހަގަ ކުރައްވާފައި ވެއެވެ.
މި ބަޔާނުގައި އިތުރަށް ވިދާޅުވެފައިވަނީ، ދިވެހި ސަރުކާރުން ދެކޭ ގޮތުގައި، މި ހަމަނުޖެހުންތަކަށް ދެމެހެއްޓެނިވި އަދި ދެމެހެއްޓެނިވި ހައްލެއް ގެނެވޭނީ، 1967 ގެ ކުރިން އޮތް ބޯޑަރުތަކުގެ މައްޗަށް ބިނާކޮށް، އިރުމަތީ ގުދުސް އަކީ ފަލަސްތީނުގެ ވެރިރަށް ކަމުގައި ކަނޑައަޅައި، މިނިވަން އަދި ސިޔާދަތީ ފަލަސްތީނު ދައުލަތެއް އުފައްދައިގެން ކަމުގައެވެ.
