މިސަރުކާރުގައިވެސް ތިބީ 719 ސިޔާސީ މުވައްޒަފުންކަމަށް ރައީސް އޮފީހުގެ މިނިސްޓަރ އިބްރާހީމް ވަހީދު ވިދާޅުވެއްޖެއެވެ. އިބްރާހީމް ވަހީދު މިހެން ވިދާޅުވީ، އަލަށް އުފެދޭ ޑރ. މުހައްމަދު މުއިއްޒުގެ ސަރުކާރުގައި ސިޔާސީ މަޤާމުތަކަށް އައްޔަންކުރާ ބޭފުޅުންގެ އަދަދު 700 އަށްވުރެ އިތުރު ނުކުރުމަށް ޑރ. މުއިއްޒު ނިންމަވާފައިވާކަމަށް އިންތިޚާބީ ރައީސްގެ އޮފީހުން ބުނެފައި ވަނިކޮށެވެ.

ރައީސް އޮފީހުގެ ހުރިހާ މަޤާމްތަކަކީ ސިޔާސީ މަޤާމް ތަކެއް. ރައީސް އޮފީސް ނުހިމަނާ މި ސަރުކާރުގަވެސް ތިބީ 719 ސިޔާސީ މުވައްޒަފުން.

– އިބްރާހީމް ވަޙީދު ވިދާޅުވިއެވެ.

މިސަރުކާރު އައީ ރައީސް ޔާމީންގެ ސަރުކާރަށްވުރެ ސިޔާސީ މަޤާމުތައް މަދުކުރާނެކަމުގެ ވަޢުދާއެކުއެވެ. ނަމަވެސް މިސަރުކާރުގައި ކުރީ ސަރުކާރަށްވުރެ ސިޔާސީ މަޤާމުތައް ގިނަކަމަށްބުނެ ބައެއް ފަރާތްތަކުގެ ފާޑުކިޔުން ވަނީ އަމާޒުވެފައެވެ.

އިންތިޚާބީ ރައީސްގެ އޮފީހުންވެސް ބުނެފައިވަނީ 700އަށްވުރެ ސިޔާސީ މަޤާމުތައް އިތުރު ނުވާނެކަމަށެވެ.

މިއަދު ބޭއްވި ނޫސްވެރިންގެ ބައްދަލުވުމުގައި އިންތިޚާބީ ރައީސްގެ ތަރުޖަމާން މުޙައްމަދު ފިރުޒުލް ވިދާޅުވީ އިންތިޚާބީ ރައީސް ޑރ. މުއިއްޒު ވަނީ އަލަށް އުފެދޭ ސަރުކާރުގެ ސިޔާސި މަޤާމުތައް 700 ގައި ހިފެހެއްޓެވުން ކަމަށެވެ. މިއީ މިހާރު އޮތް ސަރުކާރުގެ 1،063 ސިޔާސީ މަޤާމަށްވުރެ މާބޮޑު ތަނުންވެސް މަދު އަދެއް ކަމަށެވެ.

އަދި މިއީ މިސަރުކާރުން ހާމަކުރެއްވި ކުރީގެ ރައީސް ޔާމީންގެ ވެރިކަމުގެ ސިޔާސީ މަޤަމުތައް ކަމަށްވާ 8004 ސިޔާސީ މަޤާމަށްވުރެވެސް މަދު އަދަދެއް ކަމަށެވެ. ފިރުޒުލް ވިދާޅުވީ މުއިއްޒު ނިންމަވާފައިވަނީ މަތިބަރު ސަރުކާރަކަށް އެމަނިކުފާނުގެ ސަރުކާރު ނުވުންކަމަށެވެ. އެމަނިކުފާނުގެ 700 ސިޔާސީ މަޤާމަކީ، ރައީސުލްޖުމްހޫރިއްޔާގެ އޮފީހާއި، ގެކޮޅާއި، ނައިބް ރައީސްގެ ގެކޮޅާއި، ވަޒީރުންނާއި ކުންފުނިތައް ހިމެނޭހެން އެތަންތަނަށް އައްޔަން ކުރާ ސިޔަސީ ބޭފުޅުންގެ އަދަދު ކަމަށެވެ.

ފެހި ގާނޫނުއަސާސީގެ ދަށުން މިހާތަނަށް އައިއިރު، ހަތަރު ސަރުކާރެއް ދިވެހިން ތަޖުރިބާ ކުރިއެވެ. އެއީ ކުރީގެ ރައީސް މުހައްމަދު ނަޝީދުގެ ސަރުކާރާއި ކުރީގެ ރައީސް ޑރ. މުހައްމަދު ވަހީދުގެ ސަރުކާރާއި ކުރީގެ ރައީސް ޔާމީންގެ ސަރުކާރު އަދި ރައީސް އިބްރާހިމް މުހައްމަދު ސޯލިހްގެ ސަރުކާރެވެ.