ކުރީގެ ޓޫރިޒަމް މިނިސްޓަރު, އަދި ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ސްޕެޝަލް އެޑްވައިޒަރ ޑރ. މަހުމޫދު ޝައުގީ ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުޢިއްޒަށް ތާއިދު ކުރައްވައިފިއެވެ.

ޝައުގީ ވިދާޅުވީ، ޑރ. މުޢިއްޒާއީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހާއި ދެމެދުން ވަކި ބޭފުޅަކަށް ތާއީދު ކުރައްވަން ނިންމެވުމުގެ ކުރިން ދެ ކަމަކަށް ބެއްލެވި ކަމަށެވެ. އެގޮތުން އޭނާ ގަބޫލު ކުރައްވާ އުސޫލުތަކާއި ސިޔާސަތު ބޮޑަށް ގެންގުޅުއްވަނީ ކޮން ބޭފުޅެއްތޯ ބެއްލެވި ކަމަށެވެ. އަދި ރިޔާސީ އިންތިހާބުގެ ފުރަތަމަ ބުރުގައި ގާސިމާއިއެކު މަސައްކަތް ކުރެއްވި އިރު، އެމަނިކުފާނު ވެސް އެންމެ ބޮޑަށް ދައްވަކަވަމުން ދިޔައީ ރާއްޖޭގެ މިނިވަން ކަމަށް އޮތް ނުރައްކަލާއި ރާއްޖޭގެ ދަރަނީގެ ވާހަކަ ކަން ޝައުގީ ފާހަގަކުރެއްވިއެވެ.

ޝައުގީ ވިދާޅުވީ ދެ ކެންޑިޑޭޓުންގެ ތެރެއިން ގާސިމްގެ ސިޔާސަތާއި ވިސްނުމާއި، އަދި އޭނާގެވެސް ވިސްނުމާއި އެންމެ އެއްގޮތް ކެންޑިޑޭޓެއް ބެއްލެވި ކަމަށާ، އެގޮތުން ބެއްލެވުމަށްފަހު މުޢިއްޒު އިޚްތިޔާރު ކުރެއްވީ ކަމަށެވެ.

މީގެ އިތުރުން ދެން މުޢިއްޒަށް ތާއީދު ކުރައްވަން ނިންމެވި ސަބަބަކީ ވަރަށް ޕާސަނަލް ސަބަބެއް ކަމަށާ، އެގޮތުން ޑރ. މުޢިއްޒަކީ ރަނގަޅަށް ކިޔަވައިގެން ހުންނެވި ޢިލްމީ ގާބިލު ބޭފުޅެއް ކަމަށާ، މީގެ ކުރިންވެސް ސަރުކާރުގެ މަގާމުތައް ފުރުއްވާފައި ހުރި އިރު އެމަނިކުފާނު ވަނީ ނަތީޖާ ނެރެދެއްވާފައި ކަން ޝައުގީ ފަހަގަކުރެއްވިއެވެ.

ރާއްޖޭގެ ޓޫރިޒަމް މިނިސްޓަރުކަން ކުރައްވާފައިވާ ޑރ. ޝައުގީ ޕީއެޗްޑީ ހައްދަވާފައިވާވަނީ ކެނެޑާގެ ޔުނިވާސިޓީ އޮފް ޓޮރޮންޓޯ އިންނެވެ.