ރިޔާސީ އިންތިޚާބުގެ ދެވަނަ ބުރުގައި ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުއިއްޒަށް އިންތިޚާބު ކާމިޔާބު ކުރުމަށް ހައްދުން މަތިން އެންމެ ބޮޑު ޔަގީންކަމެއް ދިން ބަޔަކަށް އެމްޑީޕީގެ ބޭފުޅުން ވެއްޖެއެވެ.
ވަރަށް ގިނަ އަދަދެއްގެ ބަޔަކާއިއެކު މިރޭ ލ.ގަމުގައި ބޭއްވި ހައްދުން މަތީ ބޮޑު ޖަލްސާގައި މުއިއްޒަށް ތާއީދުކޮށް ޕީޕީއެމްއާއި ގުޅުނު މެމްބަރުންގެ ތެރޭގައި ގިނައީ އެމްޑީޕީގައި މީގެ ކުރިން އެތައް އަހަރަކު އުޅެފައިވާ އެމްޑީޕީގެ ޚިދުމަތްތެރީންނެވެ. ލ. އަތޮޅުގެ އެކި އަވަށްތަކުން ގުޅުނު މީހުންގެ ތެރޭގައި އެމްޑީޕީގައި 18 އަހަރާއި، 15 އަހަރާއިި އަދި އެތަކެއް އަހަރުތަކެއް ވަންދެން އުޅުނު ޚިދުމަތް ތެރިން ހިމެނެއެވެ.
ހައްދުން މަތިން ގުޅުނު މީހުންގެ ތެރޭގައި ގިނަ އަދަދެއްގެ ޒުވާނުންވެސް ހިމެނެއެވެ. އެމްޑީޕީގެ އިިތުރުން ހައްދުން މަތީ ޖޭޕީގައި އިސްކޮށް ހަރަކާތްތެރިވާ ބޭފުޅުންވެސް ވަނީ މުއިއްޒުއަށް ތާއީދުކޮށް ޕީޕީއެމްއަށް ސޮއިކޮށްފައެވެ.
މިރޭ ސޮއިކުރި އެންމެ ޚާއްސަ ބޭފުޅުންގެ ތެރޭގައި ފޮނަދޫ ދާއިރާގެ މެމްބަރު މޫސާ ސިޔާޖާއި، ލ. އަތޮޅު ކައުންސިލް ރައީސް އިސްމާއިލް އަލީ ހިމެނެއެވެ. މިބޭފުޅުންގެ ތެރެއިން އިސްމާއިލް ވަނީ މިރޭގެ ޖަލްސާގައި ވާހަކަ ދައްކަވާފައެވެ. އޭނާ ވިދާޅުވީ ލ. އަތޮޅަށް މިސަރުން ވީ ވައުދުތައް ނުފުއްދުނު ކަމަށެވެ. އަދި އެކަންކަމާއިގެން ރައީސް ޞާލިހާއި ބައްދަލު ކުރަން އުޅޭތާ 3 އަހަރު ވެއްޖެ ކަމަށާއި އަދިވެސް އެކަން ކާމިޔާބު ނުވާކަމަށެވެ.
އިސްމާއިލް ވިދާޅުވީ މިއިންތިޚާބުގައި ޑރ. މުއިއްޒަށް ހައްދުން މަތިން ވަރަށް ސާފު އައުލަބިއްޔަތަކުން ކާމިޔާބު ކޮށްދެއްވާނެކަމަށެވެ. އަދި އެކަން ކުރުމުގައި ސާބިތު ކަމާއިއެކު ކުރަންޖެހުނު ކޮންމެ ކަމެއް ކުރައްވަން ތައްޔާރަށް ހުންނެވި ކަމަށް އިސްމާއިލް ވިދާޅުވިއެވެ.
