މިމަހުގެ 30 ވަނަ ދުވަހު އޮންނަ ރިޔާސީ އިންތިޚާބުގެ ދެވަނަ ބުރު ރައްޔިތުން ވެރިކަމުގެ އަމާނާތް ހަވާލު ކުރައްވައިފިނަމަ އެކަން ކޮށްދެއްވާނީ ވަރަށް ހާމަކަންބޮޑުކޮށް ރައްޔިތުންނަށް ފޮރުވަން ޖެހޭ އެއްވެސް އެއްޗެއްނެތި ރައްޔިތުން އެދޭ ގޮތަށް ކަމުގައި ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެއެވެ.

ރިޔާސީ އިންތިޚާބުގެ ދެވަނަ ބުރުގައި މިރޭ ހައްދުން މަތީ ގަމުގައި ބޭއްވި ބޮޑު ޖަލްސާގައި ވާހަކަ ދައްކަވަމުން މުއިއްޒު ވިދާޅުވީ ރައީސުލްޖުމްހޫރިއްޔާގެ މަޤާމަކީ ޝަރަފެއް ކަމަށް ނުދޭކަމަށެވެ. ރައީސް ކަމުގެ މަޤާމަކީ އެއީ ބޮޑު އަމާނާތެއް ކަމަށް ދެކި ޚިދުމަތް ކުރާނީ ވަރަށް ތެދުވެރި ކަމާއިއެކުގައި ކަމަށް މުއިއްޒު ވިދާޅުވިއެވެ.

މުއިއްޒު ވިދާޅުވީ ސަރުކާރު ހިންގުމުގައި ރައްޔިތުންނަށް ފޮރުވައިގެން ކުރާނެ ކަމެއް ނޯންނާނެކަމަށެވެ. އެއްވެސް ސިއްރު އެއްބަސްވުމެއް އެއްވެސް ސިއްރު ލިޔުމެއް ރައްޔިތުން ބަލަން ބޭނުންވެގެން ކަންބޮޑުވެގެން އުޅޭ ހާލަތަށް ދާން ނުޖެހޭނެކަމަށް މުއިއްޒު ވިދާޅުވިއެވެ. ހާމަ ކުރެވެން އޮތް ހުރިހާ އެއްޗެއް ހާމަކަން ބޮޑުކޮށް ރައްޔިތުންނަށް ހާމަ ކުރައްވާނެކަމަށް މުއިއްޒު ވިދާޅުވިއެވެ. ހަމަ މިއާއިއެކު ކޮރަޕްޝަނަކީ ޤައުމުގައި މިހާރު އޮތް އެންމެ ބޮޑު މައްސަލަ ކަމަށާއި، އެކަން ނައްތާލުމަކީ އަމާޒު ކަމަށެވެ.

މުއިއްޒު ވިދާޅުވީ ކެބިނެޓްގައިވެސް އަދި އެހެން ދިމާލެއްގައިވެސް މަސައްކަތް ކުރާ އެއްވެސް މީހަކު ކޮރަޕްޝަން ހިންގާކަމުގެ އެއްވެސް މައުލޫމާތެއް ލިބިއްޖެނަމަ އެމީހަކާއިމެދު އަޅަންޖެހޭ ފިޔަވަޅު އަޅާނެކަމަށެވެ. ރައްޔިތުންގެ ފައިސާއަށް މިސަރުކާރުން ވާހެން ހިޔާނާތް ވާން ޖާގަ ނުދޭނެކަމަށް މުއިއްޒު ވިދާޅުވިއެވެ.

ކެބިނެޓަށް ނަގާނީ ފަސްބައި ފާހު ޚިދުމަތް ކުރެވޭ. އަޅުގަނޑު އެދޭ ސްޕީޑުގައި މަސައްކަތް ކުރެވޭ، ތައުލީމީ ގާބިލް ބޭފުޅުން އަޅުގަނޑުގެ ޓީމަށް ނަގާނީ. އަޅުގަނޑު ބޭނުންވަނީ ތެދުވެރި އިހުލާސްތެރި މަސައްކަތްތަކެއް ކުރަން. ނަތީޖާ ފުރަތަމަ ދުވަހުން ފެށިގެންވެސް ނެރެން. އިރާދަ ކުރެއްވިއްޔާ އެކަން އަޅުގަނޑު ރައްޔިތުންނަށް ދައްކާނަން.

– މުއިއްޒު ވިދާޅުވިއެވެ.

މުއިއްޒު ވިދާޅުވީ އޭނާގެ ސަރުކާރުގައި ރައްޔިތުންގެ ޚިދުމަތަށް ނިކުންނަ ކޮންމެ މީހަކީ ޖަވާބުދާރީވާންޖެހޭނެ މީހެއް ކަމަށެވެ. އެއްވެސް މީހަކަށް ޖަވާބުދާރީނުވެ ނުހުރެވޭނެ ކަމަށާއި، ހާމަކަން ބޮޑު ވެރިކަމެއް ކޮށްދެއްވާނެ ކަމުގެ ޔަގީންކަން މުއިއްޒު ވަނީ ދެއްވާފައެވެ. މުއިއްްޒު ވަނީ މިރޭ ގަމުގެ އިތުރު ފަރާތުގައި އިތުރު ބަނދަރެއް ހަދާނެ ކަމުގެ ޔަގީންކަން ދެއްވާފައެވެ.

މިރޭ މުއިއްޒުއަށް ތާއީދުކޮށް ޕީޕީއެމްއަށް ސޮއިކުރި ގިނަ އަދަދެއްގެ ރައްޔިތުންނަށް މުއިއްޒުވަނީ ވަރަށް ޚާއްސަ ޝުކުރެއް ދަންނަވާފައެވެ.