ޚާރިޖީ ސިޔާސަތުގައި އެއްވެސް ޤައުމަކާއި ދުޝްމަންވެ، އެއްވެސް ޤައުމެއް ދުރުކޮށް ބާކީ ކުރުމަކީ ކުރާނެ ކަމެއް ނޫންކަމުގައި ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެއެވެ.
މިއަދު ހުޅުމާލޭގެ ފުރަތަމަ ފިޔަވަހީގައި އޮތް ކަންމަތީ ބައްދަލުވުމެއްގައި ވާހަކަ ދައްކަވަމުން މުއިއްޒު ވިދާޅުވީ އޭނާގެ ވެރިކަމެއްގައި ރާއްޖޭގެ ޚާރިޖީ ސިޔާސަތަކީ ވަކި ޤައުމަކަށް އެކަނި ބަރޯސާ ވާނެ ކަމެއް ނޫންކަމަށެވެ. ކިތަންމެ ކުޑަ ޤައުމެއް ވިޔަސް، އަދި ކިތަންމެ ބޮޑު ޤައުމެއް ވިޔަސް ގާތްކަން ފަމަހައްޓާނެ ކަމަށާއި، އަދި ގާތް އެކުވެރި ޤައުމުތަކާއި ޢަރަބި އިސްލާމީ ޤައުމުތަކާއި އޮތްނަން ގުޅުން އިތުރަށް ހަރުދަނާ ކުރާނެ ކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ ދިވެހިންގެ މިނިވަންކަމާއި ސިޔާސަތާއި އިސްތިޤުލާލު ރައްކާތެރި ކުރުމަކީ ކޮންމެ ދިވެހި ރައްޔިތެއްގެ ޒިންމާއެއް ކަމަށެވެ. އަދި ދިވެހިންގެ މިނިވަންކަމަށް އެހެން ޤައުމުތަކުންވެސް އިހުތިރާމް ކުރުމަކީ ކުރަންޖެހޭ ކަމެއްކަމަށެވެ. މިހާރުވެސް ރާއްޖޭގައި މިނިވަންކަމާއި ގުޅޭ އެތައް ކަންބޮޑުވުމެއް އޮތްއިރު އެކަންކަން ބަދަލުކޮށް މިނިވަން މުސްތަގިއްލު ޤައުމަކަށް މިޤައުމު ހަދާނޭކަމުގެ ޔަގީންކަން މުއިއްޒު ވަނީ ދެއްވާފައެވެ.
ފުރަތަމަ ދުވަހުން ފެށިގެން ޚާރިޖީ ސިޔާސަތު ބައްޓަން ކުރާނެ. އަޅުގަނޑުމެން މިނިވަން ކަމާއި އިސްތިޤުލާލަށް ހުރިހާ ޤައުމަކުންވެސް އިޚުތުރާމް ކުރާނެކަމަށެވެ. އަޅުގަނޑުމެންގެ ސިޔާސަތުގެ ތެރެއިން ހުރިހާ ޤައުމަކާއިއެކުވެސް ޤާތް ގުޅުން އޮންނާނެ. އެގޮތުގަ އަޅުގަނޑުމެން ކުރިއަށްދާނީ.
– މުއިއްޒު ވިދާޅުވިއެވެ.
މުއިއްޒު ވިދާޅުވީ ޤައުމަށް ހަމަޖެހުން ގެނައުމުގައި އެކަކު އަނެކަކަށް އިހުތިރާމް ކުރާ އަޚުލާގީ ސިފަ ގާއިމް ކުރަންޖެހޭކަމަށެވެ. ޤައުމުގެ ހަމަޖެހުން ގާއިމް ކުރުމަކީ ޤައުމުގެ ތަރައްޤީއަށް އޮތް އެންމެ މުހިންމު މަސައްކަތް ކަމަށާއި ގައުމަށް ހަމަޖެހުން ކުރާ މަސައްކަތުގައި އެންމެހާ ރައްޔިތުންގެ އެއްބާރުލުންނ ބޭނުންވާކަމަށް މުއިއްޒު ވިދާޅުވިއެވެ.
މުއިއްޒު ވަނީ ބައްދަލުވުމުގައިވެސް މުޅި ރާއްޖޭގައި ހުރި ސޯޝަލް ހައުސިންއަށް ދައްކަންޖެހޭ ޖޫރިމަނާ މަޢާފްކޮށްދޭނެކަމަށް ވިދާޅުވެފައެވެ. އަދި މާލެެއާއި މުޅިރާއްޖޭގެ ބޯހިޔާވަހިކަމުގެ މައްސަލަތަކަށް ހައްލު ކޮށްދެއްވާނެކަމަށް މުއިއްޒު ވިދާޅުވިއެވެ.
