ވެރިކަމާއި ހަވާލުވެ ރާއްޖޭގައި މިހާރު އޮތް ޒާތީ ހަސަދައާއި، އަނިޔާވެރި ކަމާއި ބަދަލު ހިފުމުގެ ސަގާފަތް ނައްތަލައި އަމާން އަދުލުވެރި ވެރިކަމެއް ކޮށްދެއްވާނެ ކަމުގެ ޔަގީންކަން ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ދެއްވައިފިއެވެ.

"ޚަބަރު އޮންލައިން" އަށް ޑރ. މުއިއްޒު ދެއްވި ޚާއްސަ އިންޓަރވިއުގައި މުއިއްޒުވަނީ މަލްޓިޕާޓީ ނިޒާމު ރާއްޖެއަށް ތަޢާރަފްވި ފަހުން ކޮންމެ ވެރިކަމެއްގައިވެސް ނިމޭ ވެރިކަމުގެ ރައީސުލްޖުމްހޫރިއްޔާއާއި އާއި ދައުލަތުގެ ވެރިންނަށް އެކި ގޮތްގޮތަށް އަނިޔާކޮށް ޖަލަށްލައި ބަދަލު ހިފުމުގެ ރޫހު އޮންނަ އޮތުމާއި ގުޅޭގޮތުން ތަފްސީލީ ގޮތެއްގައި ވާހަކަ ދައްކަވާފައެވެ.

މުއިއްޒު ވިދާޅުވީ އޭނާގެ ވެރިކަމެއްގައި ބަދަލު ހިފުމުގެ ސަގާފަތް ނިމުމަކަށް ގެންނާނެކަމަށެވެ. އެއްވެސް މީހަކަށް ނުހައްގުން އަނިޔާކޮށް އަދުބުދީ ޖަލަށްލައި ހެދުމަކީ ކުރައްވާނެ ކަމެއް ނޫންކަމަށެވެ. މިކަން މިހެން މިހާތަނަށްވެސް ހިނގާފައިވާ އެންމެ ބޮޑު ސަބަބަކީ ޝަރުއީ ދާއިރާގެ މިނިވަންކަން ނެތުމުން ކަމަށް މުއިއްޒު ވިދާޅުވިއެވެ. އަދި މިހާރުގެ ސަރުކާރުންވެސް ވަނީ ޖުޑީޝަރީއަށް އިންތިހާއަށް ނުފޫޒު ފޯރުވައި، ކޯޓުތަކަށް ސަރުކާރުގެ މުށުތެރެއަށް ލާފައި ކަމަށެވެ. އަނިޔާވެރިކަމާއި ބަދަލު ހިފުން ނިމުމަކަށް ގެނެވޭނީ ޖުޑީޝަރީ މިނިވަން ވެގެން ކަމަށް މުއިއްޒު ވިދާޅުވިއެވެ.

އަޅުގަނޑަކީ އެއްވެސް މީހަކާއި ޒާތީވާނެ މީހެއް ނޫން އިނގޭތޯ. އެއްވެސް މީހަކަށް އަނިޔާއެއް ނުކުރާނަން. އެކަކަށްވެސް، އެކަކަށްވެސް އަނިޔާއެއް ނުކުރާނަން. ބަދަލުހިފުމެއް ނޯންނާނެ އަޅުގަނޑުގެ އިނގޭތޯ. ދެން މިނިވަން ކަމާއިއެކީ ޖުޑީޝަރީ ހިންގުމުގެ ފުރުސަތު ދޭނަން ހަގީގީ މާނާގަ. ޖުޑީޝަރީ އަކީ މިވަގުތު ސަރުކާރުގެ އެކި ކަހަލަ ނުފޫޒު ފޯރާތަނެއް. އެކަން ހުއްޓުވާނަން ފުރަތަމަ ދުވަހުން ފެށިގެން.

– މުއިއްޒު ވިދާޅުވިއެވެ.

މުއިއްޒު ވިދާޅުވީ ޖުޑިޝަރީގައި ތިއްބެވި ފަނޑިޔާރުންނާއި މުވައްޒިފުން އަބުރުވެރި ދިރިއުޅުމެއް އުޅެވޭނެ ގޮތް ހަދާ ދެއްވާނެ ކަމަށެވެ. އެބޭފުޅުންނަށް މިހާރު އެންމެ ބޮޑު ދައްޗަކަށް އޮތް ހައުސިންގެ މައްސަލަތަކާއި އެލަވެންސު ތަކުގައި ހުރި މައްސަލަތަކާއި އެގިވަޑައި ގަންނަވާ ކަމަށާއި އެކަންކަމަށް ހެޔޮ ބަދަލުތަކެއް ގެނެސް ދެއްވައި ޖުޑީޝަރީ މިނިވަންކަންކޮށް ހިންގުމުގެ ޖާގަ ދެއްވާނެކަމަށެވެ.

ހަމަ މިއާއެކު މުއިއްޒު ވިދާޅުވީ ރާއްޖޭގެ ޝަރުއީ ދާއިރާގެ މިނިވަންކަން އެންމެ ބޮޑަށް ދެމެހެއްޓޭނީ ދައުލަތުގެ ޕްރޮސެކިއުޓާ ޖެނެރަލަކީ މިނިވަން އަދުލުވެރި މީހަކަށް ވެގެން ކަމަށެވެ. އެމީހަކީ ރައީސުލްޖުމްހޫރިއްޔާ ނުވަތަ ސަރުކާރުގެ ނުފޫޒު އޮތް މީހަކަށް ވެއްޖެނަމަ ޝަރުއީ ދާއިރާގެ މިިވަންކަމެއް ނޯންނާނެކަމަށެވެ.

އޭރު ދެން ފެނިގެންދާނީ ދެންހުރި ހުރިހާ މިނިވަން މުވައްސަސާތައްވެސް ޕީޖީވެސް، ޕީޖީއަކަށްވެސް އަޅުގަނޑު ނުފޫޒެއް ނުފޯރުވާނަން. ޕީޖީ ވަންޖެހޭނީ މިނިވަން މީހަކަށް. އެއީ މުދައުލަތުގެ ޕްރޮސެކިއުޓާ ޖެނެރަލް. އޭނާގެ މައްޗަށް އަޅުގަނޑު ނޫނީ ސަރުކާރުގެ ނުފޫޒު ފޯރުވުމަކީ އެއީ ކުރާނެ ކަމެއްނޫން. ޕީޖީ މިނިވަންކޮށް މަސައްކަތް ކޮސް ޖުޑީޝަރީ މިނިވަންކޮށް މަސައްކަތް ކުރަންޏާ އަޅުގަނޑަކަށް ނުފެނޭ އެއްވެސް މީހަކަށް އަނިޔާވެރިވާނެ ތަނެއް.

– މުއިއްޒު ވިދާޅުވިއެވެ.

ރައީސް ޔާމީންގެ މައްސަލާގައި މުއިއްޒު ވިދާޅުވީ އެމަނިކުފާނަށް ނުހައްގުން އެތައް އަނިޔާއްދީ ޝަރީއަތްތައް މަޑު ޖައްސައި ކަން ހިނގާ ބޭއިންސާފު ގޮތަކީ ދިވެހި ހުރިހާ ރައްޔިތުން ހެކިވާނެ ކަމެއް ކަމަށެވެ. އެމަނިކުފާނުގެ މައްސަލައަށް އެންމެ ބޮޑު ނުފޫޒެއް ފޯރުވަނީ ރައީސް އޮފީހުން ކަމަށާއި ވެރިކަމާއި ހަވާލުވެ ފުރަތަމަ ދުވަހު ރައީސް އޮފީހުގައި އޮތް އެނުފޫޒު ނިމުމަކަށް ގެނެސް ރައީސް ޔާމީނަށް ދެމުންދާ އަނިޔާވެރިކަންވެސް ނިމުމަކަށް ގެންނާނެކަމަށް މުއިއްޒު ވިދާޅުވިއެވެ.

ރައްޔިތުން ނިންމަވާނެ އަޅުގަނޑާއި މިހާރު ތިއްބެވި ބޭފުޅުންނާއި، ކުރިން ތިއްބެވި ބޭފުޅުންނާއި ހުރި ތަފާތަކީ ކޮބައިކަން. އަޅުގަނޑަކީ ޢަމަލާއި ބަހާއި ދިމާވާނެ މީހެއް މިއަދާއި ހަމައަށްވެސް ފެންނަން ހުންނާނީ އެތަން. އަޅުގަނޑު މިދަންނަވަނީ އަޅުގަނޑުގެ ހިތުން ގަބޫލުކޮށް އެކަން ކުރާނަމޭ. އިރާދަކުރެއްވިއްޔާ ޤާނޫނީ ހަމަތަކުގެ މަތީން ރައީސް ޔާމީން މިނިވަން ކުރާނަން. އެކަމަކު ކުރެވޭނީ ޖުޑީޝަރީއަށް މިސަރުކާރުން ފޯރުވާފައިވާ ނުފޫޒުތައް ހުއްޓާލެވިގެން. އެހެންވީމާ ފުރަމަ ދުވަހުން ފެށިގެން ރައީސް އޮފީސް ތެރެއިންނެއް ކޯޓު ތެރެއަށް ނުފޫޒު ފޯރުވާގެނެއް އެމަނިކުފާނު ހިފަހައްޓައިގެން ނޫޅޭނެ.

– ޑރ. މުއިއްޒު ވިދާޅުވިއެވެ.

މުއިއްޒު ވިދާޅުވީ ރައްޔިތުން ހަވާލުކުރާ ވެރިކަމުގެ މަސްއޫލިއްޔަތަކީ ވަރަށް ބޮޑު އަމާނާތެއް ކަމަށެވެ. ވެރިކަމަކީ އަނިޔާވެރި ވުމެއް ނޫންކަމަށާއި، ވެރިކަމަކީ ހުރިހާ ރައްޔިތުންނަށްވެސް އަދުލުވެރި ކަމާއިއެކު ޚިދުމަތް ދިނުން ކަމަށެވެ. އެކަން ކުރުމުގައި އެއްވެސް ތަފާތެއް ނެތި ހުރިހާ ރައްޔިތުންނަށް ހަމަހަމަ އުސޫލުން އުދުލުވެރި ވެރިކަމެއް ކޮށްދެއްވާނެ ކަމުގެ ޔަގީންކަން ޑރ. މުއިއްޒު ވަނީ ދެއްވާފައެވެ.