ދިވެހިރާއްޖޭގެ ޝަރުއީ ނިޒާމަކީ މިނިވަން އަދުލުވެރި އިންސާފުވެރި ނިޒާމަކަށް ހައްދަވާނެކަމަށާ، މަޤާމުގެ ނުފޫޒު ބޭނުންކޮށްގެން ޝަރުއީ ނިޒާމަށް ބާރު ފޯރުވާ މީހަކު ހުރިނަމަ ސަރުކާރުން ވަކިކުރައްވާނެކަމަށް ޕީއެންސީގެ ރިޔާސީ ކެންޑިޑޭޓް ޑރ. މުޙައްމަދު މުއިއްޒު ވިދާޅުވެއްޖެއެވެ.

ޑރ. މުއިއްޒު މިހެން ވިދާޅުވީ، ގަލޮޅު ކަންމަތީގައި އެމަނިކުފާނުގެ ސަޕޯޓަރުންނާ ބައްދަލުކޮށްލެވުމަށް ބޭއްވި ކަންމަތީ ޖަލްސާގައި ވާހަކަފުޅުދައްކަވަމުންނެވެ. ޑރ. މުއިއްޒު ވިދާޅުވީ، ބާރާ ނުފޫޒު ބޭނުންކޮށްގެން އެއްވެސް ކަމެއް ކުރުމުގެ ފުރުޞަތު އެއްވެސް މީހަކަށް އެމަނިކުފާނުގެ ވެރިކަމެއްގައި ނުދެއްވާނެކަމަށެވެ. އަދި އަދުލުވެރި އިންސާފުވެރި ވެރިކަމެއް ކޮށްދެއްވާނެކަމުގެ ޔަޤީންކަން ދެއްވާކަމަށެވެ.

ޝަރީއަތުގެ ތެރެއަށް ސަރުކާރުގެ އެއްވެސް ނުފޫޒެއް ނުފޯރާނެކަމަށާ އަދި ފޯރުވުމުގެ ފުރުޞަތެއްވެސް ނުދެއްވާނެކަަމަށް މުއިއްޒު ވިދާޅުވިއެވެ. އެކަހަލަކަމެއް ކުރާއެއްވެސް މީހަކު އެއްވެސް މަޤާމެއްގައި ހުރެއްޖެނަމަ އެކަން އެނގޭ ހިސާބުން އެމީހަކު ސަރުކާރު ތެރެއިން ބޭރު ކުރާނެކަމުގެ ޔަޤީންކަން ރައްޔިތުންނަށް ދޭކަމަށް ޑރ. މުއިއްޒު ވިދާޅުވިއެވެ.

އަމަލީ ގޮތުން މިނިވަން ޖުޑިޝިއަރީއެއް މި ގައުމަށް އިރާދަކުރެވިއްޔާ ގާއިމްކޮށްދޭނަން، އެއިރުން ރައީސް ޔާމީނަށްވެސް މިނިވަންކަން ލިބިގެން ދާނެ،، ރައީސް ނަޝީދަށް ކުރިމަތިވި އުދުވާނީ ހަމަލާގައި މިހާތަނަށް ނުބެލި އޮތް މައްސަލަ ބެލި، އެމަނިކުފާނަށްވެސް އިންސާފު ލިބޭނެ. އޭރުން ކުޑަ މީހެއް ބޮޑު މީހެއް ބެލުމެއް ނެތި މަގާމުގެ ތަފާތު ކަމެއް ބެލުމެއް ނެތި އިންސާފުން ހަމަހަމަ ކަމާއި އެކީގައި އެ ޖުޑިޝަރީ ތެރެއިން ފޯރުވާދިނުމުގައި ޖުޑިޝިއަރީގައި ތިއްބެވި ފަނޑިޔާރުންނަށް ފުރިހަމަ މިނިވަންކަން ލިބިގެން ދާނެ.

– މުއިއްޒު ވިދާޅުވިއެވެ.

އަދި މިނިވަން މުވައްސަސާތަކަކީ ގާނޫނު އަސާސީގައި އާއި ގާނޫނުތަކުގައި ހަމައެކަނި މިނިވަން ޖަހާފައި އޮންނަ މުވައްސަސާތަކެއްގެ ގޮތުގައި އޮތުމުގެ ބަދަލުގައި، އެ މުވައްސަސާތަކަކީ ހަގީގީ މާނައިގައި މިނިވަން ތަންތަނަށް ހައްދަވާ ދެއްވާނެ ކަަމަށްވެސް މުއިއްޒު ވިދާޅުވިއެވެ. މުއިއްޒު ވިދާޅުވީ ވެރިކަމަކީ ޝަރަފެއް ނޫންކަމަށާއި، ވެރިކަމަކީ ވަރަށް ބޮޑު އަމާނާތެއް ކަމަށެވެ.

ވެރިކަމަކީ ޝަރަފެއް، އިއްޒަތެއް ނޫން. ވެރިކަމަކީ އަމާނާތެއް. އެކަން ތެދުވެރިކަމާއި އަމާނާތްތެރި ކަމާއިއެކު އަދާކުރުމަކީ އަޅުގަނޑުގެ މަސްއޫލިއްޔަތު އަދާކުރާނަން.

– މުއިއްޒު ވިދާޅުވިއެވެ.

މިއަދު ގަލޮޅު ކަންމަތީގައި ބޭއްވި ކަންމަތީ ބައްދަލުވުމުގައި ގިނަ އަދަދެއްގެ ޑިމޮކްރެޓުންނާއި، އެމްޑީޕީއަށް ނިސްބަތްވާ ބޭފުޅުން ވަނީ ޑރ. މުއިއްޒުއަށް ތާއީދުކޮށް ޕީޕީއެމްއާއި ގުޅިފައެވެ.