ބަތަލާ ނިއުމާ މުހައްމަދު ޕްރޮޑިއުސްކޮށްފައިވާ ބިރުވެރި ފިލްމު "ކަޅަކި" އަންނަ މަހުގެ 7 ގައި އޮލިމްޕަހުގައި ޕްރީމިއާކުރާ ގޮތަށް ނިންމައިފިއެވެ.
ސްރީ ލަންކާގައި 2020 ގެ ކުރީކޮޅު ޝޫޓްކުރި "ކަޅަކި" އަކީ ކުރީގެ މަޝްހޫރު ބަތަލާ ނިއުމާ މުހައްމަދު ޕްރޮޑިއުސްކޮށް، މަޝްހޫރު އެކްޓަރު ޔޫސުފް ޝަފީއު (ޔޫއްޕެ) ޑައިރެކްޓްކޮށް، ރޯލެއް ވެސް ކުޅެފައިވާ ފިލްމެކެވެ.
އޮލިމްޕުގައި މިހާރު ވެސް ދައްކަމުން އަންނަނީ ޔޫއްޕެ ޑައިރެކްޓްކުރި ކޮމެޑީ ފިލްމު "ޖޯކަރު" އެވެ. އޭނަ ކުރިން ގެނެސްދިން ބިރުވެރި ފިލްމުތަކުގެ ތެރޭގައި ފުރަތަމަ ޑައިރެކްޝަން "އެ ދަތުރު" ގެ އިތުރުން "ދައުވަތު" ހިމެނެ އެވެ.
"ކަޅަކި" ގައި ދައްކުވައި ދޭނީ ޗުއްޓީއަކަށް ދާ ގްރޫޕަކަށް އެ މީހުން ތިބޭ ގެއިން ކުރިމަތިވާ ބިރުވެރި ހާދިސާތަކަކާ ގުޅިގެން، ޗުއްޓީ ދަތުރު ހަރާބުވެގެންދާ ގޮތެވެ. މި ފިލްމްވެސް ބޮޑު ކާސްޓެއް ފެނިގެންދާނެއެވެ.
އޮކްޓޯބަރު މަހު ފިލްމް އަޅުވާނެ ކަން ކުރިންވެސް ހާމަ ކުރި ނަމަވެސް އަޅުވާނެ ވަކި ތާރީހެއް އޭރުގައި އިއުލާނެއް ނުކުރެއެވެ. ނަމަވެސް މިހާރު މިވަނީ އޮކްޓޯބަރު މަހުގެ 7 ވަނަ ދުވަހަށް ފިލްމް ގެނެސްދިނުމަށް ނިންމައި އެކަން އިއުލާން ކޮށްފައިއެވެ.
ބިރުވެރި ފިލްމު "ކަޅަކި" ގެ ސްކްރީންޕްލޭ ލިޔެ ޑައިރެކްޓްކުރަނީ ޔޫސުފް ޝަފީޢު (ޔޫއްޕެ)އެވެ. ކެމެރާކުރީ ތަޖުރިބާކާރު އަދި ގިނަ ފިލްމުތަކެއް ކެމެރާކޮށްފައިވާ އިބްރާހީމް މޫސާ (ދަބަ) އެވެ.
ފިލްމުގެ ކާސްޓުގައި ހިމެނެނީ ޔޫސުފް ޝަފީޢު (ޔޫއްޕެ)، ޢަލީ ސީޒަން، މުޙައްމަދު މަނިކް، ރިޝްފާ، ލަހޫގެ އިތުރުން ޝިޔާ އެވެ.
