ސްރީލަންކާގައި ދިވެހިން އެކިބޭނުންތައް ފުއްދުމަށްޓަކައި ގާއިމްކޮށްފައިވާ ސޯސަން ވިލާއަށް މިސަރުކާރުން ވަނީ ވަރަށް ބޮޑަށް އިހުމާލު ވެފައިކަމަށާއި، އެތަނަށް ހަގީގީ މާނާގައި ތަރައްޤީ ގެނުވައި ހެޔޮބަދަލު ތަކެއް ނެގުވާނީ ޕީޕީއެމް/ޕީއެންސީގެ ވެރިކަމެއްގައި ކަމަށް ޕީއެންސީގެ ނައިބް ރައީސް އިބްރާހިމް ޝުޖާ ވިދާޅުވެއްޖެއެވެ.
ރިޔާސީ އިންތިޚާބުގެ ދެވަނަ ބުރުގެ ކެމްޕޭންގައި ރޭ ލަންކާގައި ތިބި ދިވެހި ރައްޔިތުންނާއި ބައްދަލު ކުރައްވާ ވާހަކަ ދައްކަވަމުން ޝުޖާ ވިދާޅުވީ ސޯސަން ވިލާއަކީ ރައީސް ޔާމީންގެ ވެރިކަމުގައި ބޮޑެތި ކުރިއެރުން ގެނުވި ތަނެއް ކަމަށެވެ. ނަމަވެސް މިސަރުކާރު ވެރިކަމަށް އައިގޮތަށް އެތަނަކީ ދިރުމެއްނެތް ހުއްޓިފައި އޮތްތަނަކަށް ވެފައި ވާކަމަށެވެ.
ސޯސަން ވިލާގައި ތައުލީމާއި، ކުޅިވަރާއި، ޚާއްސަ އެހީއަށްބޭނުންވާ ފަރާތްތަކަށް ސްޕީޗްތެރަޕީފަދަ ޚިދުމަތް ފުޅާދާއިރާއެއްގައި ލިބޭނެ އިންތިޒާމު ހަމަޖައްސައި ދިނުމަށް މެނިފެސްޓޯގައި އޮންނާނެކަމަށް ޝުޖާ ވިދާޅުވިއެވެ. މިބަދަލުތަކަކީ ގެނެވޭނެ އަދި ލަންކާގައި ދިރިއުޅޭ ދިވެހި ރައްޔިތުންގެ ކަންބޮޑުވުން ކަންކަމަށްވާއިރު މިކަންކަމަށް ހެޔޮ ބަދަލުތަކެއް ގެނެވިގެންދާނެކަމަށް ޝުޖާ ވިދާޅުވިއެވެ.
ޝުޖާ ވިދާޅުވީ ކޮންމެ ރައްޔިތަކުވެސް އެއީ ޤައުމުން ބޭރުގައި ތިއްބަވައިގެން ވޯޓުލާ ދިވެހިންވެސް ތިމާމެންގެ ހާލަތާއިމެދު ވިސްނައި، ހާލަތު ބަދަލު ކުރުމަށް ވޯޓު ދެއްވުމަކީ މުހިންމު ކަމެއްކަމަށް ވިދާޅުވިއެވެ. ބޭރުގައި ތައުލީމް ހާސިލްކުރުމަށްފަހު ކުރާ ހޭދަތައް ދެކޮޅު ޖެއްސޭ ވަރުގެ ވަޒީފާއެއް ރާއްޖެއިން ނުލިބޭ ކަމީ މިއަދު އޮތް ހަގީގަތް ކަމަށާއި އެކަން ބަދަލު ކުރެވޭނީ ޒުވާނުންގެ އެއްބާރުލުމާއި ބޮޑު ތާއީދަކާއި އެކުގައި ކަމަށް ޝުޖާ ވިދާޅުވިއެވެ.
މިސަރުކާރުން ކޯވިޑް މެނޭޖް ކުރުމުގައި ވަރަށް ބޮޑު ކާމިޔާބީއެއް ލިބިފައިވާކަމަށް ބުނާއިރު، ލުބުނު ފައިސާއާއި، ގެނައި މާސްކާއި، އޯޑަރުދިން ވެންޓިލޭޓަރުތަކަށް އަދާއި ހަމައަށްވެސް ވީހަމަ އެއްވެސް ގޮތެއް ނޭގޭ ކަމަށް ޝުޖާ ވިދާޅުވިއެވެ. ކޮވިޑުގެ ތެރޭގައި މިސަރުކާރުން ކުރިހާވެސް ކަމަކީ ބައި އަޅައިގެން ވައްކަން ކުރުންކަމަށް ޝުޖާ ވިދާޅުވިއެވެ.
ކޮމެންޓު ފޮނުވާ