ބޭސްފަރުވާއަށް ރާއްޖެއިން ބޭރަށް ވަޑައިގެންނެވި ކުރީގެ ނައިބް ރައީސް އަހުމަދު އަދީބް ޢަބްދުލް ޢަފޫރު އެނބުރި ރާއްޖެ ވަޑައިގެންފިއެވެ.
އަދީބް ނިސްބަތްވާ އެމްޓީޑީން ދެންމެ ނެރުނު ބަޔާނެއްގައި ބުނެފައިވަނީ ފަރުވާ އަށް ސިންގަޕޫރުގައި ހުރުމަށް އިތުރު މުއްދަތު ދީފައި އޮއްވައި ވެސް، އެނބުރި އައީ ފަރުވާގެ ފުރަތަމަ ފިޔަވަހި ނިމިފައި ވާތީ ކަމަށެވެ. ޑޮކްޓަރުންގެ ލަފާގެ މަތިން އަދީބުގެ ފަރުވާގެ ދެވަނަ އަދި އެންމެ ފަހު މަރުހަލާ 2023 ވަނަ އަހަރުގެ އޮކްޓޯބަރު މަހު ކުރިއަށް ގެންދާނެކަމަށް އެމްޓީޑީން ވަނީ ބުނެފައެވެ.
އަދީން ރާއްޖެ ވަޑައިގެންނެވުމުން އެއާރޕޯޓުން އަދީބު އަށް މަރުހަބާ ދެންނެވީ އެންމެ އަރިސް އެކުވެރިންނެވެ. ސަރުކާރުން އަދީބުގެ ބޭސްފަރުވާގެ ހުއްދަ ދެއްވައި، އެކަމުގައި ދެއްވަމުންދާ އެއްބާރުލުމަށް އެމްޓީޑީ އިން ވަނީ މަރުޚަބާ ކިޔާފައެވެ.
އަދީބު ނިސްބަތްވެވަޑައިގަންނަވާ މޯލްޑިވްސް ތާޑްވޭ ޑިމޮކްރެޓްސް، އެމް.ޓީ.ޑީން ބުނީ އަދީބު ގެންދަވަނީ ފުރާނައަށް ނުރައްކާވާފަދަ ނާރުގެ ބައްޔަކަށް ފަރުވާ ހޯއްދަވަމުންކަމަށެވެ. އަދި އޭނާގެ ހާލު ރަނގަޅު ނޫންކަމަށްވެސް އަދީބުގެ އާއިލާއިން ބުނެފައިވެއެވެ.
އެމް.އެމް.ޕީ.އާރު.ސީގެ ކޮރަޕްޝަންގެ މައްސަލަ އަދީބުގެ މައްޗަށް ސާބިތުވެ، 20 އަހަރުގެ ޖަލު ޙުކުމެއް އިއްވާ، 2 މިލިއަން ރުފިޔާގެ ޖޫރިމަނާގެ ޙުކުމެއް އަދީބުގެ މައްޗަށް އިއްވާފައިވަނީ 2020 ވަނަ އަހަރުއެވެ. އެހެންނަމަވެސް، އަދީބުގެ ސިއްޙީ ހާލަތު ހުރި ގޮތުން، މޯލްޑިވްސް ކަރެކްޝަނަލް ސާރވިސްއިން ވަނީ އޭނާ ގޭބަންދަށް ބަދަލުކޮށްފައެވެ.
