އޮލިމްޕަހުގައި މިހާރު ދައްކަމުން އަންނަ ޑާކް ކޮމެޑީ ފިލްމު "ޖޯކަރު" ގެ ޕްރޮމޯޝަނަލް ލަވަ ޔޫޓިއުބަށް ދޫކޮށްލައިފި އެވެ.
ރާއްޖޭގެ މަޝްހޫރު އެކްޓަރު/ޑައިރެކްޓަރު ޔޫސުފް ޝަފީއު (ޔޫއްޕެ)ގެ "ޖޯކަރު" ޕްރޮމޯޝަނަލް ލަވަ "ވަގުންގެ ޖަގަޑާ" ގައި ފެނިގެން ދަނީ ޔޫއްޕެގެ ކުރީގެ އަންހެނުން ފާތުމަތު ފަރީލާ އާއި ބެކް ޑާންސަރުންތަކެއްގެ ނެށުންތަކަކާ އެކީގަ އެވެ.
"ޖޯކަރު" ޕްރީމިއާކުރީ މި މަހުގެ 5 ގަ އެވެ. ޔޫއްޕެ ލިޔެ، ޑައިރެކްޓް ކޮށްފައިވާ މި ކޮމެޑީގެ ކާސްޓްގައި ތަޖުރިބާކާރުން ތަރިން ކަމަށްވާ ޝީލާ ނަޖީބާއި އަހުމަދު ނިމާލާއި އަހުމަދު ސައީދުގެ އިތުރުން އަލީ އާޒިމް ދޮން (އައްޔަ) އާއި ނާޝިދާ މުހައްމަދާއި އިބްރާހީމް ރަޝީދު (ބްރޯ) އާއި ހަމްދާމް ފާރޫގާއި އަހުމަދު ރިފްޝާނާއި ޝަހީދާ އަހުމަދާއި މޫސާ އަލީފް ހިމެނެ އެވެ.
"ޖޯކަރު" އަކީ ޔޫއްޕެއާ ގުޅިގެން "ދައުވަތު" އާއި "ނޯޓީ 40″ އަދި "ފޯޓީ ޕްލަސް" ފަދަ ފިލްމުތައް ގެނެސްދިން ޕްރޮޑިއުސަރު އިސްމާއީލް ޝަފީގާއި މިދިޔަ މެއި މަހު އޮލިމްޕަހުގައި އެޅުވި އަލީ ސީޒަންގެ "ލޯބިވެވިއްޖެ" ގެ ޕްރޮޑިއުސަރު ޝާނީޒް އަލީ ޕްރޮޑިއުސްކޮށްފައިވާ އެއްޗެކެވެ.
