ރައްޔިތުން ކުރެއްވި ތާޢީދާއެކު ކުރިއަށް ދެވޭނެކަމުގެ އުއްމީދު އައު ވެއްޖެކަމަށް އަމިއްލަގޮތުން އިންތިޚާބުގައި ވާދަކުރެއްވި ކެންޑިޑޭޜް އަލްއުސްތާޛް ޙަސަން ޒަމީލް ވިދާޅުވެއްޖެއެވެ.
އިއްޔެ ބޭއްވި ރިޔާސީ އިންތިޚާބުން އެންމެ މަދުން ވޯޓު ލިބިވަޑައިގަތީ ޒަމީލަށެވެ. 8 ކެންޑިޑޭޓުން ވާދަކުރެއްވި މި އިންތިޚާބުން ޒަމީލަށް ލިބިވަޑައިގަތީ 325 ވޯޓެވެ. އެއީ އިންތިޚާބުގައި ވޯޓުލީ މީހުންގެ ނިސްބަތުން 0.15 އިންސައްތައެވެ. އެއީ އިންތިޚާބުގެ ބާޠިލު ވޯޓަށްވުރެވެސް މަދު ޢަދަދެކެވެ.
ވަގުތީ ނަތީޖާއިން ފެންނަގޮތުން، ދެވަނަ ބުރަށް ވަޑައިގަތް ދެ ކެންޑިޑޭޓުންނަށް ތަހުނިޔާ ދަންނަވަން.
ﷲ سبحانه وتعالي ދިވެހި ޤައުމަށް ހެޔޮގޮތް މިންވަރު ކުރައްވާށި. آمين.— Hassan Zameel (@zameelhassan) September 9, 2023
އިންތިޚާބުގެ ނާކާމިޔާބީއަށްފަހު ޒަމީލް ވަނީ އެމަނިކުފާނަށް އިތުބާރު ކުރައްވައި ވޯޓު ދެއްވި އެންމެހައި ފަރާތްތަކަށް އިޚްލާސްތެރި ޝުކުރު ދަންނަވާފައެވެ. ޒަމީލް ވިދާޅުވީ އިންތީޚާބުގައި ވާދަކުރެއްވުމަށްޓަކައި ރައްޔިތުން ދެއްވި ތާއީދުގެ ސަބަބުން، ތެދު ކުރިއަރާނެކަމަށް ކުރެވޭ އުންމީދު އައުވެއްޖެކަމަށް ޒަމީލް ވިދާޅުވިއެވެ.
މި އިންތިޚާބަށް ޒަމީލް ނިކުމެވަޑައިގަތީ ރަނިންމޭޓެއްގެ ގޮތުގައި އަނބިކަނބަލުން މަރްޔަމް ޢަމީލެވެ.
