ކުރިއަށް އޮތް ރިޔާސީ އިންތިޚާބު ޕީޕީއެމް/ޕީއެންސީގެ ރިިޔާސީ ކެންޑިޑޭޓް ޑރ.މުހައްމަދު މުއިއްޒު ކާމިޔާބު ކުރައްވާނީ 60 އިންސައްތައްވުރެ މަތީ ޢައުލަބިއްޔަތަކުން ކަމަށް ޕްރޮގްރެސިވް ކޮންގްރެސް ކޯލިޝަން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް ވިދާޅުވެއްޖެއެވެ.

ރިޔާސީ ކެމްޕޭންގައި މިރޭ ލ.ގަމުގައި ބޭއްވި ފޯރިގަދަ ޖަލްސާގައި އަދުރޭ ވިދާޅުވީ މިހާތަނަށް ޑރ.މުއިއްޒު ކެމްޕޭނަށް ވަޑައިގެންނެވި ކޮންމެ ރަށަކުން ސާފު މެޖޯރިޓީ އޮތްކަން ދިވެހި ކޮންމެ ރައްޔިތަކަށް ސާފުވާނެކަމަށެވެ. އެމްޑީޕީގެ ކެމްޕޭން ޓީމަށާއި، ކެމްޕޭންގެ ހިސާބު ހައްދަވަމުން ގެންދަވާ ފައްޔާޒު އިސްމާއިލަށް މިއިންތިޚާބު 56 އިންސައްތައިން ރައީސް ޞާލިހަށް ކާމިޔާބުވާތަން ފެންނަ އިރު، މިއިންތިޚާބު ޑރ.މުއިއްޒުއަށް ކާމިޔާބުވާތަން ދިވެހި ރައްޔިތުންނަށް ފެންނަނީ 60 އިންސައްތައަށް ވުރެ މަތީ ޢައުލަބިއްޔަތަކުން ކަމަށް އަދުރޭ ވިދާޅުވިއެވެ.

އޭނާ ވިދާޅުވީ އެމްޑީޕީއަށް ރައްޔިތުންގެ ތާއީދު ނެތްކަން ހާމަވުމުން މިހާރު ކުރާ މަސައްކަތަކީ އެންޓި ކެމްޕޭންކޮށް ދޭތެރެ ޖެއްސުންކަމަށެވެ. މިކަމުގައި އެންމެ އިސްކޮށް ހަރަކާތްތެރިވަނީ ޝައިޚު އިމްރާން ކަމަށާއި، އިމްރާނަކީ ދޮގެއް ހެދެން އޮއްވާ ތެދެއް ހަދާނެ މީހެއް ނޫންކަމަށް އަދުރޭ ވިދާޅުވިއެވެ.

އޭނާ ވިދާޅުވީ އެމްޑީޕީގެ ތެރޭގައި މިހާރު އުޅެނީ މައްސަކަތަކުންނ އަރައި ނުގަނެވިގެންކަމަށެވެ. މިނިސްޓަރ ފައްޔާޒާއި، މިނިސްޓަރ ޝާހިދާއި ދެބޭފުޅުން މޫނާއި މޫނު ދިމާނުވާއިރު ކެމްޕޭންގެ ތެރޭގައި މަސައްކަތް ދާގޮތުން އެއްބޭފުޅަކު އަނެއް ބޭފުޅަކަށް ފާޑުކިޔައި ބޮޑެތި ހިންހަމަ ނުޖެހުން ހުރިކަމަށެވެ. މިކަންކަން ސީދާ އެބޭފުޅުންގެ އިސްބޭފުޅުން ކިޔަދެމުންދާކަމަށް އަދުރޭ ވިދާޅުވިއެވެ.

އަދުރޭ ވިދާޅުވީ މިއިންތިޚާބަކީ ދިވެހިންގެ މިނިވަންކަމާއި ސިޔާދަތާއި ގުޅިފައިވާ އިންތިޚާބަށް ވުމުން، މިނިވަންކަން ދިފާއުކުރުމަށް ދިވެހި ރައްޔިތުން މިވޯޓު ޑރ.މުއިއްޒަށް ދެއްވަން ޖެހޭކަމަށެވެ.