ރާއްޖޭގެ ރައީސުލް ޖުމްހޫރިއްޔާ އަދި އެމްޑީޕީގެ ރިޔާސީ ކެނޑިޑޭޓް އިބްރާހިމް މުހައްމަދު ސޯލިހުގެ އުފަން ރަށް ކަމަށްވާ ޅ. ހިންނަވަރުން އެމަނިކުފާނަށް ހޫނު މަރުހަބާއެއް ދަންނަވައިފިއެވެ.
ބަނދަރުމަތީގައި ސަފު ހަދާލައިގެން އެތައް ބަޔަކު ތިއްބެވެ. ސަފުގެ ވީޑިއޯ ކޮޅެއް ނަގަން ސަފުގެ އެންމެ ކޮޅާ ހިސާބަށް ހިނގައިގަތީ އެ ނިމުނީ ކަމަށް ހީކޮށެވެ. އެކަމަކު ބަނދަރުން ފައިބައިގެން އެންމެ ވައަތުން އޮތް ގޯޅިން ލަނބާލާފައި އޮތް ސަފު ފެނިގެން، ސަފު ނިމޭ ހިސާބެއް ބަލަން އަނެއްކާ ހިނގައިގަތީމެވެ. އެ މަގުގެ ވެސް ބޮޑު ބައެއް ހިނގި ފަހުން، ކަނައަތުން އެ ތެރެއަށް ވަންނަން އޮތް ގޯޅިއާ ހަމައަށް އާދެވުނުއިރު، އެ ސަފު އަދިވެސް ކޮޅުން ނުލާކަން އެނގުނެވެ. އެ ގޯޅިން ސަފު ދަމާފައި އޮތީ އެމްޑީޕީގެ މައި ޖަގަހައާ ހަމައަށެވެ.
ރައީސް އިބޫގެ އުފަން ރަށަށް ޅ. ހިންނަވަރުން ވަޑައިގަތުމުން އާދަޔާ ހިލާފު ހޫނު ތަރުހީބެއް. 🫶🫶🫶🫶#IbuAslam2023 #UfaaveriAmaanRaajje pic.twitter.com/LbBsixW9hI
— Mohamed Areesh (@iarysh) August 31, 2023
ރައިސް ސޯލިހު ކެމްޕެއިނަށް ރަށްތަކަށް ވަޑައިގަންނަވާއިރު، އެ ޓީމަށް މަރުހަބާ ދެންނެވުމަށް ރާއްޖޭގެ ހުރިހާ ރަށަކުންވެސް ބަނދަރު މައްޗަށް މީހުން އެއްވެއެވެ.
ރަައީސްގެ ކެމްޕެއިން ދަތުރުފުޅުގެ ތެރެއިން މިހާރު ރާއްޖޭގެ 100 އަށްވުރެ ގިނަ ރަށްރަށަށް ވަނީ ވަޑައިގަންނަވާފައެވެ. މި ރަށްތަކަށް ވަޑައިގެން ދެވަނަ ދައުރަކަށް އެމަނިކުފާނު ހޮވަންވީ ކީއްވެގެންތޯ ކިޔާދެއްވާއިރު، އެމަނިކުފާނު ދެވަނަ ދައުރަކަށް ހޮވިވަޑައިގެންފިނަމަ ކޮށްދެއްވާނެ ކަންކަމުގެ ވާހަކަތައްވެސް ހިއްސާ ކުރައްވާފައި ވެއެވެ.
އަދި ބައެއް ރަށްރަށުގައި އެމްޑީޕީގެ މެނިފެސްޓޯގެ ބައިތައްވެސް އިއުލާނު ކުރައްވާފައި ވެއެވެ.
