ކުރިއަށް އޮތް ރިޔާސީ އިންތިޚާބުގައި ރައީސް އިބްރާހިމް މުހައްމަދު ޞާލިހު ނިސްބަތްވާ ހިއްނަވަރުން މެޖޯރިޓީ ލިބުމަކީ ދެކެން ވަރަށް ބޭނުންވާ މަންޒަރެއް ކަމުގައި ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒު ވިދާޅުވެއްޖެއެވެ.
ރިޔާސީ ކެމްޕޭންގައި ޅ.ހިންނަވަރަށް ޑރ.މުއިއްޒުއާއި ޓީމު ވަޑައިގެންނެވުމުން އެރަށުން ވަނީ ގިނަ ބަޔަކު ނިކުމެ ހޫނު މަރުޚަބާއެއް ދަންނަވާފައެވެ. މުއިއްޒު ވަނީ ހިންނަވަރުން ގިނަ ބަޔަކު ނިކުމެ ހޫނު މަރުޚަބާއެއް ދެންނެވި ކަމަށްޓަކައި ވަރަށް ބޮޑަށް ޝުކުރު ދަންނަވާފައެވެ.
ހިންނަވަރަކީ ރައީސް ޞާލިހުގެ ރަށަށްވާއިރު، އެރަށުން މުއިއްޒުއަށް ތާއީދުކުރާ ގިނަ މީހުން ތިބީ އެރަށުން މެޖޯރިޓީ ނެގުމުގެ އަޒުމުގައެވެ. މުއިއްޒު ވިދާޅުވީ މިފަސް އަހަރަކީ ހިންނަވަރަށް އެއްކަމެއްވެސް ނުވި ފަސް އަހަރުކަމަށެވެ. ރަށުގެ ތަރައްޤީ މިފަސް އަހަރުގައި ފަހަތަސް ގޮސްފައިވާއިރު ތަރައްޤީއާއި ކުރިއެރުން ގެނެވޭނީ އެކަން ކުރެވޭނެ ޤާބިލްކަން ތިބި ބަޔަކަށް ކަމަށް މުއިއްޒު ވިދާޅުވިއެވެެެ.
އެއްބުރުން އިންތިޚާބު ކާމިޔާބު ކުރުމަށް ދިވެހި ރައްޔިތުން ކުރާ މަސައްކަތުގައި މިރަށުން މެޖޯރިޓީ ލިބުމަކީ އަޅުގަނޑު ވަރަށް ދެކެން ބޭނުންވާ ކަމެއް. އެއީ ވަރަށް ބޮޑު ޗެލެންޖެއް. އިރާދަކުރެއްވިޔާ ވާނެ. ހިންނަވަރށް ރައްޔިތުން ބޭނުންވާ ކަންކަން ހަގީގަތުގައިވެސް ކުލަ ޖައްސާނަން.
– މުއިއްޒު ވިދާޅުވިއެވެ.
ހިންނަރުގެ މަގު ހެދުމާއި ސިއްޚީ ކަންކަމާއި، ފެނާއި ނަރުދަމާވެސް ނޭޅި އޮތް އޮތުމަށް ހައްލު ގެނެސް ހިންނަވަރު ތަރައްޤީ ކޮށްދެއްވާނެކަމަށް މުއިއްޒު ވިދާޅުވިއެވެ.
