މިސަރުކާރުން ވެރިކަމަށް އައި ދުވަހުން ފެށިގެން ތުލާދޫރައްޔިތުންނަށް ދައްކަމުންދިޔަ ދަޅައަކީ އެއާޕޯޓެއްގެ ދަޅަ ކަމަށާއި ވެރިކަމާއި ހަވާލުވެ މިސަރުކާރުން ހެދިހެން ކުރަންކުރަން ނުތިބެ އެއާޕޯޓް އަޅާދީ ނިންމައި ރައްޔިތުންނާއި ހަވާލު ކުރާނެކަމަށް ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެއެވެ.
ރިޔާސީ ކެމްޕޭންގައި ބ.ތުޅާދޫއަށް މުއިއްޒު މިއަދު ވަޑައިގެންނެވުމުން އެރަށުން ވަނީ ވަރަށް ހޫނު މަރުހަބާއެއް ދަންނަވާފައެވެ. މުއިއްޒު ވިދާޅުވީ ރިޔާސީ އިންތިޚާބަށް 9 ދުވަސްވުމުން ރައްޔިތުންގެ ލޮލުގައި އަނދުން އެޅުމަށް ބިން ހިއްކުމަށް ހައިމާކެއް ގެނައުމުން އެއާޕޯޓް ނޭޅޭނެކަމަށެވެ. އިހުލާސްތެރި ކަމެއް ހުރިނަމަ ވެރިކަމުގެ ފަސް އަހަރުގެ ތެރޭގައި މިކަން ނުކުރީ ކީއްވެތޯ ރައްޔިތުން ރައްޔިތުން އަހަންޖެހޭކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ ވެރިކަމާއި ހަވާލުވެ އެއާޕޯޓްގެ މަސައްކަތް ނިންމައި ރައްޔިތުންގެ އުންމީދު ހަގީގަަތަކަށް ހަދާދޭނެކަމަށެވެ. އަދި މިއާއިއެކު ޒުވާނުންނަށް އެތައް ވަޒީފާއެއް އިތުރުވެގެން ދާނެކަމުގެ ޔަގީންކަން އޮތްކަމަށްވެސް މުއިއްޒު ވިދާޅުވިއެވެ.
ރައްޔިތުންނަށް ހުސް ވައުދެއް ނުވާނަން. ކަންކުރާނެ ގޮތާއި ފައިސާ ހޯދާނެ ގޮތާއި ކުރާނެ ގޮތް ރައްޔިތުންނަށް ދައްކާނަން. އަޅުގަނޑުމެން މިރަށުގެ އެއާޕޯޓް ކުރަން ކުރަން ނުތިބެ މަސައްކަތް ނިންމާ ރައްޔިތުންނަށް ދައްކާނަން.
– ޑރ.މުއިއްޒު ވިދާޅުވިއެވެ.
ތުޅާދޫއަށް މުއިއްޒު ވެވަޑައިގެންވި ވައުދުތައް:
– އެއާޕޯޓްގެ މަސައްކަތް ނިންމަދޭނަން
– ތުޅާދޫ ބިން ހިއްކައި ބޯހިޔާވަހިކަން ކަށަވަރު ކޮށްދޭނަން
– ރައްޔިތުން އެދޭ ތަނެއްގައި ހޮސްޕިޓަލް އަޅާދޭނަން
– މަގުތައް ޒަމާނީ ފެންވަރަށް ހަދާދޭނަން
– ޒުވާނުންނަށް ބޭނުންވާ ކުޅިވަރު ވަސީލަތްތައް ތަރައްޤީ ކޮށްދޭނަން
މުއިއްޒު ވިދާޅުވީ ތުޅާދޫއަށް ބޭނުންވަނީ 100 ހައުސިން ޔުނިޓު ނޫންކަމަށެވެ. ހޮސްޕިޓަލު އަޅަން ދީފައިވާ ބިމަކީ އެންމެ ރަނގަޅު ސަރަހައްދު ނޫންކަން ރައްޔިތުންގެ ފަރާތުން އެނގިފައިވާކަމަށާއި، ރައްޔިތުން އެދޭ ތަނެއްގައި ހޮސްޕިޓަލު އަޅާދޭނެކަމަށް މުއިއްޒު ވިދާޅުވިއެވެ. މިސަރުކާރުން ކަންކަން ކުރަނީ ރައްޔިތުންނާއި އެއްވެސް މަޝްވަރާއެއް ނުކޮށް ސަރުކާރުން ބޭނުންވާހާ ގޮތަކަށް ކަމަށާއި، ނަމަވެސް ދެން އަންނަ ވެރިކަމެއްގައި ރައްޔިތުންގެ މަޝްވަރާގެ މަތިން ނޫނީ އެއްވެސް ކަމެއް ނުކުރާނެކަމަށް މުއިއްޒު ވިދާޅުވިއެވެ.
