ރިޔާސީ އިންތިޚާބުގައި އަމިއްލަ ގޮތުން ވާދަކުރައްވާ ކުރީގެ ހޯމް މިނިސްޓަރ އުމަރު ނަސީރަށް މަރުގެ އިންޒާރު ދީފިއެވެ.
އުމަރަކީ މި ރިޔަސީ އިންތިޚާބުގައި ވާދަކުރައްވާ ކެންޑިޑޭޓުންގެ ތެރެއިން އެންމެ ފާޅުގައި ކޮރަޕްޝަނާއި، ޑްރަގާއި ގޭންގުތަކާއި ދެކޮޅަށް މަސައްކަތް ކުރައްވާނެ ކަމުގެ ވައުދުވެ އެކަން ތަންފީޒު ކުރައްވާނެ ގޮތް ހުށަހަޅަމުންދާ ކެންޑިޑޭޓެވެ. އުމަރު ނަސީރަށް މަރުގެ އިންޒާރު ދީފައިވަނީ ސޯޝަލް މީޑިއާގައެވެ. އެ އިންޒާރުތަކުގެ ސްކްރީންޝޮޓް ހިއްސާކޮށް އުމަރު ނަސީރު ވިދާޅުވީ މަރުގެ އިންޒާރު ލިބެމުންދާތީ އެކަން އެމްއެންޑީއެފްގެ ސަމާލުކަމަށް ގެނެސްފައިވާ ކަމަށެވެ.
ކުރިން ހޯމް މިނިސްޓަރުކަންވެސް ކުރެއްވި އުމަރު ނަސީރަށް މަރުގެ އިންޒާރުދީފައިވާއިރު ރިޔާސީ އިންތިހާބުގެ ކެމްޕޭންގައި އުޅުއްވަނިކޮށް އުމަރަށް މީހަކު ވަނީ ހަމަލާދީފައެވެ.
އުމަރު ރޭ ދަންވަރު ކުރި ޓްވީޓެއްގައި ވިދާޅުވީ، ޑްރަގް ލޯޑްސްގެ ފަރާތުން މަރުގެ އިންޒާރު ލިބެމުން އަންނަ ކަމަށެވެ. އޭނާ ހިއްސާ ކުރެއްވި ޓްވީޓެއްގައި ފެނިގެން ދަނީ ޓިކްޓޮކްގައި އާއްމު ކޮށްފައިވާ އޭނާގެ ވީޑިއޯއަކަށް ކޮށްފައި ހުރި ކޮމެންޓްތަކެއްގެ ސްކްރީންޝޮޓެކެވެ.
އުމަރު ވިދާޅުވީ އޭނާ އަށް ހަމަލާ ދިނީ ޑްރަގް ވިއްކާ މީހެއް ކަމަށް ތުހުމަތު ކުރެވޭ މީހެއް ކަމަށެވެ. މިމައްސަލަ ފުލުހުން ބަލަމުންދާ ކަމެއް އަދި ހާމަކޮށްފައި ނުވެއެވެ.
