ސަރުކާރުގެ ސޯޝަލް ހައުސިން ސްކީމްގެ ދަށުން އަޅާފައިވާ ފްލެޓްތަކުގެ ކުލި ބޮޑުކޮށްގެން އެ ކުލި ނުދެއްދިގެން ޖޫރިމަނާ ކުރި ފަރާތްތަކުގެ ކުލި މާފްކޮށް ދެއްވާނެ ކަމަށް އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ރޭ ވިދާޅުވެއްޖެއެވެ.
ރިޔާސީ އިންތިހާބުގެ ކެމްޕެއިނަށް ފުވައްމުލަކަށް ވަޑައިގެން، އެ ރަށުގައި ބޭއްވި ޖަލްސާގައި މުއިއްޒު ވިދާޅުވީ ސޯޝަލް ހައުސިންގެ ދަށުން ހުޅުމާލެ އާއި ރާއްޖޭގެ އެކިކަންކޮޅުތަކުގައި އަޅާފައިވާ ހައުސިން ޔުނިޓްތަކުގެ އަގު ބޮޑުވީމަ، ކުލި ނުދެއްކިގެން ޖޫރިމަނާ އަރާފައިވާ ކަމަށެވެ. މިއީ އެއްވެސް އިންސާފުވެރި ކަމެއް ނޫން ކަމަށް މުއިއްޒު ވިދާޅުވިއެވެ.
"ޖޫރިމަނާ ކުރަން ވާނީ ދެއްކޭ ވަރު ކުއްޔެއް ދައްކަން ބުނެގެން ނުދައްކައިފިއްޔާ. އެހެންވީމަ ސޯޝަލް ހައުސިން މަޝްރޫއުތަކުގެ ތެރެއިން ފްލެޓު ލިބިފައިވާ ފަރާތްތަކުގެ ޖޫރިމަނާއަކީ މާފް ކުރެވެން ޖެހޭނެ އެއްޗެއް. އިރާދަކުރެއްވިއްޔާ އެ ޖޫރިމަނާތައް މާފްކޮށް ދޭނަން،" މުއިއްޒު ވިދާޅުވިއެވެ.
މުއިއްޒު ވަނީ ގެދޮރުވެރިކަމުން ރައްޔިތުންނަށް ހިތްފަސޭހަ ދިރިއުޅުމެއް ހޯދައި ދެއްވާނެ ކަމަށް ވިދާޅުވެފައެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ހުޅުމާލޭގައި އިމާރާތް ކުރި ހިޔާ ފްލެޓްތަކުގެ ކުއްޔަކީ 5،600ރ. ކަމަށް ކަނޑައެޅިއެވެ. ނަމަވެސް މި ސަރުކާރުން އައިސް އެ މަޝްރޫއުގެ ދަށުން ފްލެޓުގެ ކުލީގެ ގޮތުގައި މެއިންޓަނަންސްއާ އެކުގައި 8،500ރ. ކަނޑައެޅިއެވެ. އަދި މިދިޔަ މެއި މަސް ތެރޭ ކުލި ވަނީ، މެންޓެއިންނެސްފީއާ އެކު 6،300ރ. އަށް ލުއިކޮށްދީފައެވެ.
