މިސަރުކާރުން ރައްޔިތުންނަށް ދީފައިވާ ގޯތިތައް ހަގީގަތަށް ހައްދަވައި ދެއްވައި، ފެނު އަޑީގައި ހުރި ގޯތިތައް ފެނުން މައްޗަށް ނަގައި ބޯހިޔާވަހިކަން ކަށަވަރު ކޮށްދެއްވާނެކަމަށް ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެއެވެ.
ރިޔާސީ ކެމްޕޭންގައި މާލެ ސިޓީގައި "މުއިއްޒު ދަރުބާރު" ޖަގަހަ ހުޅުވައި ދެއްވުމަށްފަހު ވާހަކަ ދައްކަވަމުން ޑރ. މުއިއްޒު ވިދާޅުވީ މާލެއާއި ރާއްޖޭގެ ހުރިހާ ރައްޔިތުންނަށްވެސް ދިމާވެފައިވާ އެންމެ ބޮޑު މައްސަލައަކީ ބޯހިޔާވަހިކަމުގެ މައްސަލަކަމަށެވެ. މިމައްސަލަ ހައްލު ކޮށްދެއްވާނެ ސިޔާސަތާއި ތަސައްވަރު މިހާރު ރައްޔިތުންނާއި ހިއްސާ ކުރައްވާފައިވާކަމަށެވެ. އެސިޔާސަތުގެ ދަށުން ވެރިކަމުގެ ފަސް އަހަރު ނިމިގެންދާއިރު ރާއްޖޭގެ ބޯހިޔާ ވަހިކަމަށް ބޭނުންވާ ރައްޔިތުންނަށް ހިޔާ ވަހިކަން ކަށަވަރު ވެގެންދާނެ ކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ މިސަރުކާރުން ވެރިކަމަށް އައުމުގެ ކުރިން މާލޭ ރައްޔިތުންނަށް ގޯތިދޭންވީ ވައުދު ދައުރު ނިމެން އިންތިޚާބާއި ކައިރިވެފައި ވަނިކޮށް ދިން ގޯތިތައް ފެނުން މައްޗަށް ނަގައި ހަގީގީ ކުލަ ޖައްސާލަ ދެއްވާނެކަމަށެވެ. އެއްވެސް ރައްޔިތަކަށް ދީފައިވާ ގޯއްޗެއް އަތު ނުލައްވާނެ ކަމަށާއި، ކުރައްވާނެ ކަމަކީ އެބޭފުޅުންނަށް އިންސާފުވެރިކަމާއިއެކު ގޯތިތައް ފެނުން މައްޗަށް ނަގައިދީ ދިރިއުޅެވޭނެ މަގު ފަހިކޮށް ދެއްވުންކަމަށް މުއިއްޒު ވިދާޅުވިއެވެ.
ރައްޔިތުން ނިންމާނީ ނަތީޖާ ނެރެދޭނެ ފަރާތަކާއި ހަވާލު ކުރާނީތޯ ނުވަތަ ނަތީޖާ ނުނެރެވި ކުރާނަމޭ ކިޔާބަޔާއި ހަވާލު ކުރުމުގައި ގޮތް ނިންމާނީ ރައްޔިތުން. ޕީޕީއެމް، ޕީއެންސީ ޓީމު ވަރުބައްޔެއް ނުވާނެ. ދަންވަރު ތިނެއް ޖަހާއިރު ގުޅާލިޔަސް މަސައްކަތް ކުރެވޭ ވަރުގެ ޓީމެއް އޮތީ.
– ޑރ. މުއިއްޒު ވިދާޅުވިއެވެ.
މުއިއްޒު ވިދާޅުވީ ވެރިކަމާއި ހަވާލުވާ ފުރަތަމަ ދުވަހުން ފެށިގެންވެސް އެންމެ އިސްކަންދޭނެ ސިޔާސަތަކީ ބޯހިޔާ ވަހިކަމުގެ ސިޔާސަތު ކަމަށެވެ. ވެވަޑަިއގެންފައިވާ ވައުދާ އެއްގޮތަށް ފުރަތަމަ ފަސް އަހަރުގެ ތެރޭގައި 65،000 ހައުސިން ޔުނިޓް، ފުށި ދިއްގަރު ފަޅު، ގިރާވަރު ފަޅު، ގުޅީފަޅު ހިމެނޭހަން ކަށަވަރު ކޮށްދޭނެކަމުގެ ޔަގީންކަން މިރޭވެސް މުއިއްޒު ވަނީ ދެއްވާފައެވެ.
