ޝަރީއަތްތައް އަވަސް ކުރުމަށް ބާރު އަޅުއްވާއިރު، ޝަރީއަތްތައް އަވަސްވާނީ، ޝަރީއަތްތައް ކުރިއަށް ގެންދެވޭނެ ޖާގަވެސް އޮވެގެން ކަމުގައި ދިވެހި ރާއްޖޭގެ ހައިކޯޓުގެ ފަނޑިޔާރު އަލް އުޘްތާޒު މުހައްމަދު ނިޔާޒު ވިދާޅުވެއްޖެއެވެ.
ހައިކޯޓަށް ހުށައެޅުނު އިސްތިއުނާފީ މައްސަލައެއްގެ އަޑުއެހުމުގައި ދައުލަތުގެ ވަކީލު ވަނީ ކްރިމިނަލް ކޯޓުގެ އިމާރާތުގެ ދަތިކަމާއި އިތުރު ސަބަބުތަކަށް ބަލައި ދައުވާލިބޭ މީހާ ބަންދުން ދޫކޮށްލަން ނިންމީ ރަނގަޅަށް ނޫންކަމަށް ވިދާޅުވެފައެވެ. ކްރިމިނަލްކޯޓް ހިންގަމުންދާ އިމާރާތަކީ ބޭނުންކުރަން ރައްކާތެރި ތަނަކަށް ނުވާތީ އެ އިމާރާތުގައި މަސައްކަތް ނުކުރުމަށް ޖުޑިޝަލް ސަރވިސް ކޮމިޝަން (ޖޭއެސްސީ) ނިންމީ މިއަހަރު ފެބްރު އަރީ މަހުގެ ތެރޭގައެވެ.
ޑްރަގުގެ މައްސަލައެއްގައި ހައްޔަރު ކުރި މީހަކު ބަންދު ދޫކޮށްލުމުގައި ކްރިމިނަލް ކޯޓުން ޢަމަލުކުރި ގޮތަށް ދައުލަތުގެ ވަކީލް ދެއްކެވި ވާހަކާއި ވިދާޅުވީ ޖާގައިގެ ދަތިކަމާިއ ހެދިކަމަށްބުނެ އޭނާ ބަންދުން ދޫކޮށްލުމަކީ ބަލައި ގަނެވޭނެ ކަމެއްނޫންކަމަށެވެ.
ދައުލަތުން ފާހަގަކުރެއްވި ވާހަކަތަކާއި ގުޅިގެން ފަނޑިޔާރު ނިޔާޒު ވިދާޅުވީ ޤާނޫނުގައި އަވަސް ޝަރީއަތެއް ކުރަން ބާރު އަޅައި، އަދި ޕީޖީ އޮފީހާއި އެނޫން އިދާރާތަކުންވެސް ޝަރީއަތް އަވަސް ކުރުމަށް އެދޭއިރު ކޯޓު ތަކުގެ ހާލަތަށްވެސް ރިޢާޔަތް ކުރަންޖެހޭކަމަށެވެ. ކްރިމިނަލް ކޯޓުގެ ޙާލަތަކީ ޕްރޮސެކިއުޓަރ ޖެނެރަލްގެ އޮފީހާއި، ދައުލަތުގެ އެހެނިހެން އިދާރާތަކަށްވެސް އޮޅިފައިވާނެކަމެއްނޫންކަމަށް ފަނޑިޔާރު ވިދާޅުވިއެވެ. ފަނޑިޔާރު ވިދާޅުވާ ގޮތުގައި އަވަހަށް ޝަރީއަތް ހިންގަންޖެހޭކަމުގެ ވާހަކަ ދައްކަވާއިރު، ފުރަތަމަ ޝަރީއަތް ކުރާނެ ތަނެއްވެސް ދެއްކެން ޖެހެއެވެ.
އެތަނުގައި ކިހިނެއްތޯ މަސައްކަތް ކުރަނީ. އަޅުގަނޑަކަށް ހިއެއް ނުވޭ އެއީ ތިޔަ ބޭފުޅުންނަށް ވެސް އަދި ދައުލަތުގެ އެހެން އިދާރާތަކަށް ވެސް އޮޅިފައި އޮތް ކަމެއްހެން. އެހެންވީމަ އެކަންކަން ހައްލު ކުރެވެން ޖެހޭނީ. ހައްލުކޮށްގެން ތިގޮތަށް ވާހަކަ ދެއްކޭނެ ކަމަށް އަޅުގަނޑަށް ގަބޫލުކުރެވެނީ.
– ނިޔާޒު ވިދާޅުވިއެވެ.
ފަނޑިޔާރުންގެ މަސައްކަތްތަކާއި ޝަރީއަތްތައް އަވަސްވާނީ އެކަން ކުރާނެ މާހައުލެއް ނުވަތަ ޖާގަ ލިބިގެންކަމަށް ފަނޑިޔާރު ފާހަގަ ކުރެއްވިއެވެ. މިކަމަކީ ދައުލަތުގެ ކަމާއި ގުޅުންހުރި އިދާރާތަކުން ސީރިއަސް ކަމެއްގެ ގޮތުގައި ދެކި ހައްލު ހޯދައިދޭންޖެހޭ ކަމެއްކަމަށް އޭނާ ވިދާޅުވިއެވެ.
ފަނޑިޔާރު ނިޔާޒު ވަނީ، ބަންދުގައި މީހުން ބައިތިއްބަންޖެހޭކަމަށް ދައުލަތުން ބުނި ނަމަވެސް، އެމީހުންގެ ޝަރީއަތް ހިންގޭނެ ގޮތް ދެއްކުމަކީވެސް ދައުލަތުގެ ޒިންމާއެއްކަމަށް ވިދާޅުވެ، ކޯޓުތައްވެސް އިމާރަތް ކުރައްވަންވީ ފަނޑިޔާރުންތޯ ސުވާލު ކުރައްވާފައެވެ. ކްރިމިނަލް ކޯޓަށް ދިމާވެފައިވާ ޖާގައިގެ ދަތިކަން ޙައްލު ކުރުމުގެ މަސައްކަތް ކުރަމުންދާއިރު، ކޯޓު އިމާރަތް ބާވުމާއި، އިމާރާތުގެ ޝަރީއަތްކުރާ މާލަންތަކުގެ ފާރުތަކުގައި ބޮޑެތި ރެނދުތައް ލާފައިހުރުމާއި ގުޅިގެން ބައެއް މަރާމާތުތައްވެސް ވަނީ ކުރަން ޖެހިފައެވެ.
ކްރިމިނަލްކޯޓުން މިހާރު ހިންގަމުން ގެންދާ އިމާރާތައް އެ ކޯޓު ބަދަލުކުރީ 2015 ވަނަ އަހަރުގެ ތެރޭގައެވެ. އޭގެކުރިން އެކޯޓް ހިންގަމުން ގެންދިޔައީ ޖަސްޓިސް ބިލްޑިންގައެވެ. އޭރުވެސް ކޯޓް ރޫމްތައް ކުޑަވުމާއި މައްސަލަތައް ފުނިޖެހުމުގެ ޝަކުވާ ބޮޑެވެ.
One Response
ގޭތެރޭގައި އަންހެންވެރިންގެ ކަންތައް ގޯސްވިޔަސް މީނާ ޝަރީޔަތް ކުރާއިރު އެކަންކަމަށްވެސް ރިއާޔަތް ކުރަން ޖެހެއެވެ. މިވަރުގެ ފަޑިޔާރުން ކޯޜޓްތަކުގައި ތިބީމާ އަދުލު އިންސާފު ލިބޭނެ ހެއްޔެވެ؟