ހެއްވާ މަޖާ ފްރެންޗައިޒް "ވެލްކަމް ގެ 3 ވަނަ ފިލްމް އަންނަ އަހަރު ޑިސެމްބަރުގައި ސިނަމާތަކަށް ގެންނަން ނިންމައިފި އެވެ.
ބައެއް ނޫސްތަކުން ރިޕޯޓްކޮށްފައިވާ ގޮތުގައި، އެ ފިލްމުގެ ނަމަކަށް "ވެލްކަމް ޓު ދަ ޖަންގަލް" ކިޔަން ވެސް ވަނީ ނިންމައިފަ އެވެ. ބޮޑު ކާސްޓެއް ހިމެނޭ "ވެލްކަމް" ގެ ކާސްޓުގައި އަނިލް ކަޕޫރު، ނާނާ ޕަޓޭކަރް، ޕަރޭޝް ރާވަލް، މަލިކާ ޝެރާވަތު އަދި ކެޓްރީނާ ކައިފް ވެސްމުހިންމު ރޯލުތަކުން ފެނިގެން ދެއެވެ.
"ވެލްކަމް 3″ ގައި ވެސް ލީޑު ރޯލު ކުޅޭނީ ފުރަތަމަ ފިލްމުގައި ވެސް ލީޑުން ފެނުނު އަކްޝޭ ކުމާރެވެ. ދެވަނަ ފިލްމުގައި އޭނާ ނޫޅެވެ. މި އަހަރު ކުރީ ކޮޅުގައި މި ފިލްމު އިއުލާންކުރީ އޭގެ ޕްރޮޑިއުސަރު ފިރޯޒް ނަޑިއާޑްވާލާ އެވެ.
2007 ވަނަ އަހަރު "ވެލްކަމް" ގެ ނަމުގައި ރިލީޒް ކުރި މި ފިލްމް އަކީ ވަރަށް ކާމިޔާބު ފިލްމް އެކެވެ. އޭގެ ފަހުން 2015 ވަނަ އަހަރު ރިލީޒްކުރި "ވެލްކަމް ބެކް" ގެ ސީކުއެލްގައި އަނިލް ކަޕޫރާއި ނާނާ ޕަޓޭކަރް އަދި ޕަރޭޝް ރާވަލްގެ އިތުރުން ޝްރޫތީ ހަސަން، ޖޯން އަބްރަހަމް، ޝައިނީ އަހޫޖާ، ޑިމްޕަލް ކަޕާޑިއާ އަދި ނަސީރުއްދީން ޝާހް ވެސް މުހިންމު ރޯލަތަކުން ފެނިގެން ދިއައެވެ.
މީގެ ކުރިން "ވެލްކަމް ޓު ދަ ޖަންގަލް" ގެ ނަމުން ނަން ދީފައިވާ ކުރިއަށް އޮތް ބައިގެ ނަމަކީ "ވެލްކަމް 3″ އެވެ. ޓައިމްސް އޮފް އިންޑިޔާގެ ރިޕޯޓެއްގައި ވާގޮތުގައި ކުރިއަށް އޮތް ފީރޯޒް ނަދިއަދްވާލާ ޕްރޮޑިއުސްކުރާ މި ފިލްމުގައި އަކްޝޭ ކުމާރާ އެކު ސަންޖޭ ދަތާއި އަރުޝަދު ވަރްސީ ލީޑް ރޯލުން ފެނިގެންދާނެ އެވެ.
