ރާއްޖެ ޓްރާންސްޕޯޓް ލިންކް (އާރުޓީއެލް) ގެ ހިދުމަތް މި އަހަރު ނިމުމުގެ ކުރިން ނ. އަތޮޅަށް ފެށިގެންދާނެ ކަމަށާއި އެ ހިދުމަތުން އެ އަތޮޅަށް ހީނުކުރާ ވަރުގެ ކުރިއެރުމެއް ލިބިގެންދާނެ ކަމަށް ރައީސް އިބްރާހިމް މުހައްމަދު ސޯލިހް މިއަދު ވިދާޅުވެއްޖެއެވެ.
ނ. އަތޮޅުގެ ރަށްތަކަށް ރައީސް ސޯލިހް ފެއްޓެވި ކެމްޕެއިން ދަތުރުފުޅުގައި ނ. ޅޮއްސަށް ވަޑައިގެން އެ ރަށުގައި ތިބި އެމަނިކުފާނުގެ ސަޕޯޓަރުންނާ ބައްދަލު ކުރައްވައި ވިދާޅުވީ ކަނޑުމަގުންނާއި ވައިގެ މަގުން ރާއްޖޭގެ ރަށްތައް ދަތުރުފަތުރުގެ ނިޒާމަކުން ގުޅާލުމަކީ މި ސަރުކާރުގެ ވައުދެއް ކަމަށެވެ. އެގޮތުން އާރުޓީއެލްގެ ހިދުމަތް ބޮޑުތިލަދުންމައްޗާއި ހުވަދު އަތޮޅުގައި ފެށުނު އިރު، އެ ހިދުމަތް ދެން އަންނާނީ ނ. އަތޮޅަށް ކަމަށް ރައީސް ސޯލިހް ވިދާޅުވިއެވެ.
"މިހާރު ވަނީ އެކަމަށް ބޭނުންވާ ލޯންޗުފަހަރު، ކޮންޓްރެކްޓް ކުރެވިފައި. އަޅުގަނޑުމެންގެ އުންމީދަކީ މި އަހަރު ނިމުމުގެ ކުރިން އެ އަތޮޅުގައި އެ ހިދުމަތް ފެށިގެން ދިއުން. އިރާދަކުރެއްވިއްޔާ އެކަން ކުރެވިގެންދާނެ،" ރައީސް ވިދާޅުވިއެވެ.
އާރުޓީއެލް ހިދުމަތުން ބޮޑުތިލަދުންމައްޗާއި ހުވަދު އަތޮޅުން ހީނުކުރާ ވަރުގެ ކުރިއެރުމެއް ލިބެމުންދާ ތަން ފެންނަމުންދާ ކަމަށް ވެސް ރައީސް ވިދާޅުވިއެވެ.
"ސިއްހީ ހިދުމަތެއް ހޯދަން ކަމަށްވިޔަސް، ނުވަތަ ވިޔަފާރީގެ ދަތުރެއް ކަމުގައި ވިޔަސް ހެނދުނު ފުރައިގެން ގޮސް އެނބުރި އަމިއްލަ ރަށަށް އާދެވޭނެ ކަމުގެ ޔަގީންކަން ލިބޭ. ހިތްހަމަޖެހިގެން ދަތުރު ކުރެވޭނެ ލޯންޗުތަކެއް މި ހޯދައި ދެނީ،" ރައީސް ވިދާޅުވިއެވެ.
