މާލެ ސަރަހައްދުން ދޫކުރާ ގޯތިތައް މި އަންގާރަ ދުވަހު ހަވާލުކުރަން ފަށާނެ ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެއެވެ.

ރައީސް ސޯލިހް އެގޮތަށް ވިދާޅުވެފައި ވަނީ ނ. ކުޑަފަރީގައި ބޭއްވި ކެމްޕެއިން ޖަލްސާގައި ވާހަކަފުޅު ދައްކަވަމުންނެވެ.

ކުރިއަށް އޮތް ރިޔާސީ އިންތިހާބުގެ ކެމްޕޭނަށް ނ. އަތޮޅަށް މިއަދު ފެއްޓެވި ދަތުރުފުޅުގެ ދެވަނަ މަންޒިލެއްގެ ގޮތުގައި ކުޑަފަރީ އަށް ވަޑައިގެން އެ ރަށުގައި ބޭއްވެވި ޖަލްސާގައި ރައީސް ވިދާޅުވީ ބޯހިޔާވަހިކަމެއް ލިބުމަކީ ރާއްޖޭގެ ރައްޔިތުން އެންމެ ބޮޑަށް އެދޭ އެއް ކަންތައް ކަމަށެވެ.

ހާއްސަކޮށް މާލޭގެ ބޯހިޔާވަހިކަމަށް އޮތް ދަތިކަން ފާހަގަ ކުރައްވައި ރައީސް ވިދާޅުވީ ސަރުކާރުން ހެދި ދިރާސާ އިން ދެއްކި ގޮތުގައި 18،000 އާއި 20،000 އާ ދެމެދުގެ އަދަދެއްގެ ބަޔަކު ބޯހިޔާވަހިކަން ބޭނުންވާ އިރު، ފްލެޓަށް އެކަނި ވެސް 19،000 މީހުން ކުރިމަތިލާފައިވާ ކަމަށެވެ. ފްލެޓަށް ކުރިމަތިލައިގެން ޝަރުތު ހަމަވާ ކޮންމެ މީހަކަށް ކުރިއަށް އޮތް ދައުރު ނިމުމުގެ ކުރިން ފްލެޓު ދީ ނިންމާނެ ކަމަށް ވެސް ރައީސް ވިދާޅުވިއެވެ.

މީގެއިތުރުން އިތުރުން މާލެ އިން ދޫކުރަން ނިންމި ގޯތިތަކުގެ އެންމެ ފަހު މަރުހަލާގައި އޮތް އިރު، ޕްލޭނަކީ މި މަހުގެ 15 ވަނަ ދުވަހުން ފެށިގެން ގޯތިތައް ހަވާލު ކުރުމުގެ މަސައްކަތް ފެށުން ކަމަށް ވެސް ރައީސް ސޯލިހް ވިދާޅުވިއެވެ.

"ކޮންމެ ދުވަހަކު، ކޮންމެވެސް ބަޔަކަށް އާއިލާއަކަށް ގޯތި ލިބެމުންދާ ތަން ތިޔަބޭފުޅުންނަށް ފެންނާނެ،" ރައީސް ވިދާޅުވިއެވެ.

ހުޅުމާލޭގައި މިހާރު ހިއްކާފައި އޮތް ބިމުން 2،200 ގޯތި، ގުޅިފަޅުން މަދުވެގެން 2،000 ގޯތި އަދި ގިރާވަރު ފަޅު ހިއްކައިގެން ވެސް 2،000 ގޯތި ދިނުމަށް ސަރުކާރުން ވަނީ ނިންމައިފައެވެ. ސަރުކާރުން މިހާރު ވަނީ ގޯތި ލިބޭ މީހުންގެ ވަގުތީ ލިސްޓު އިއުލާންކޮށްފައެވެ. ލިސްޓުގައި ގޯތި ލިބޭ މީހުންގެ އަދަދު 10،000 އަށް ވުރެ ގިނަ އިރު، ސަރުކާރުން ވަނީ ގޯއްޗަށް ޝަރުތު ހަމަވާ އެންމެންނަށް ގޯތި ދިނުމަށް ނިންމައިފައެވެ.

ސަރުކާރުން ފުރަތަމަ އިއުލާންކުރީ 5،000 ގޯތި ދޫކުރުމަށެވެ. ނަމަވެސް، ފަހުން ރައީސް ވިދާޅުވެފައި ވަނީ ޝަރުތު ހަމަވާ އެންމެނަށް ގޯތި ދޭނެ ކަމަށެވެ.