އަންނަ މަހުގެ 9 ގައި އޮންނަ ރިޔާސީ އިންތިހާބުގައި އެމަނިކުފާނަށް އެންމެ ބޮޑު އަޣުލަބިއްޔަތެއް ލިބިވަޑައިގަންނަވާނެ އަތޮޅަކީ ނ. އަތޮޅު ކަމަށް ރައީސް އިބްރާހިމް މުހައްމަދު ސޯލިހް ނ. މާޅެންދޫގައި މިއަދު ވިދާޅުވެއްޖެއެވެ.
ކުރިއަށް އޮތް ރިޔާސީ އިންތިހާބުގެ ކެމްޕޭނަށް ނ. އަތޮޅަށް މިއަދު ފެއްޓެވި ދަތުރުފުޅުގެ ފުރަތަމަ މަންޒިލެއްގެ ގޮތުގައި މާޅެންދު އަށް ވަޑައިގެން ރައީސް ވިދާޅުވީ ރިޔާސީ އިންތިހާބުގެ ވޯޓުލުން މަހަކަށް ވުރެ މަދު ދުވަސްކޮޅަކަށްވެފައިވާ ކަމަށެވެ.
މިފަހަރުގެ ރިޔާސީ އިންތިހާބުގައި ނ. އަތޮޅުގެ ރައްޔިތުން ރިކޯޑު އަދަދަކަށް ތިބޭ ތަން ފެނިގެންދާނެ ކަމަށް ރައީސް ވިދާޅުވިއެވެ.
"ސިޔާމްގެ އެހީތެރިކަމާއި އަދާލަތުގެ ސަޕޯޓާއި އަދި އެމްޑީޕީގެ ބޮޑު ތާއީދެއް އޮތް އަތޮޅަކަށްވާތީ އަޅުގަނޑަށް ފެންނަނީ މި އަހަރުގެ ރިޔާސީ އިންތިހާބުގައި އެންމެ ބޮޑު އަޣުލަބިއްޔަތެއް ލިބޭނެ އަތޮޅެއްގެ ގޮތުގައި މިއަތޮޅު ވެގެންދާނެ ކަމަށް،" ރައީސް ވިދާޅުވިއެވެ.
ރައީސް ވިދާޅުވީ ކެމްޕެއިން ކުރިއަށް ގެންދިއުމަށް ވާން ޖެހޭ ހުރިހާ އެހީތެރިކަމެއް ދެއްވުމަށް ތައްޔާރަށް ހުންނެވި ކަމަށެވެ.
އަދި އެއްވެސް ކަމެއް ނުވެގެން، މިވެނި ވޯޓެއް ގެއްލުނު ކަމަށް ބުނާ ވަރަށް އެހީތެރިކަން ފޯރުކޮށް ދެއްވާނެ ކަމަށް އެމަނިކުފާނު ވިދާޅުވިއެވެ.
"ވަކިވަކި ކޮންމެ ފަރުދަކާ ބައްދަލު ކުރައްވާ. ކޮބައިތޯ މައްސަލައަކީ ހައްލު ކުރަންވީ ކޮން ކަމެއްތޯ ދެނެވަޑައިގަންނަވާނެ. އަޅުގަނޑާ ހިސާބަށް އެކަން ގެނެސް ދެއްވާ. އެ ހުރިހާ ކަމެއް އަޅުގަނޑުމެން ކޮށްދެމުން ގެންދާނަން،" ރައީސް ވިދާޅުވިއެވެ.
އެމްޑީއޭގެ ރައީސް އަދި ނ. އަތޮޅުގެ ބޮޑު ތާއީދެއް އޮންނަ އަހުމަދު ސިޔާމް މުހައްމަދަށް ތައުރީފުކުރައްވަމުން ރައީސް ވިދާޅުވީ ސިޔާމަކީ ރާއްޖޭގެ ފަތުރުވެރިކަމުގެ ދާއިރާގައި އެންމެ ފުންނާބު އުސް އެއް ބޭފުޅާ ކަމަށާއި، ފަތުރުވެރިކަމުގެ ދާއިރާއަށް އޭނާ ތަފާތު ކަންކަން ތައާރަފުކުރައްވަމުން ގެންދަވާ ކަމަށެވެ. އަންނަ ދައުރަށް އެކުލަވާލާ އިގްތިސޯދީ ޕްލޭނުގައި ސިޔާމުގެ ހިއްސާ ވަރަށް ބޮޑު ވެގެންދާނެ ކަމަށް ވެސް ރައީސް ވިދާޅުވިއެވެ.
"ކުރިއަށް މި އޮތް ދައުރުގައި އިގްތިސޯދީ ސިޔާސަތު ބައްޓަންވެގެން ދާއިރު، ޓޫރިޒަމް ދާއިރާ އަށް އުއްމީދު ކުރާ ވަރަށް ވުރެ ބޮޑު ބަދަލުތައް ފެންނާނެ،" ރައީސް ވިދާޅުވިއެވެ.
