ގދ. ފަރެސްމާތޮޑާގެ ބިން ހިއްކައި އެ ރަށާ ކައިރީގައި އޮންނަ ގދ. ކަޅައިދޫ ގުޅާލައްވާނެ ކަމަށް ރައީސް އިބްރާހިމް މުހައްމަދު ސޯލިހް ވިދާޅުވެއްޖެއެވެ.
ދެވަނަ ދައުރެއް ހޯއްދެވުމަށް ރައީސް ކުރައްވާ ކެމްޕެއިން ދަތުރުފުޅުގައި ފަރެސްމާތޮޑާ އަށް ވަޑައިގެން ރައީސް ވަނީ އެ ރަށަށް ކުރިއަށް އޮތް ފަސް އަހަރު ދުވަހުގެ ތެރޭގައި ފުރިހަމަކޮށް ދެއްވާނެ ކަންކަމުގެ ވަރަށް ދިގު ލިސްޓެއް ހާމަކޮށް ދެއްވައިފައެވެ.
ރައީސް ސޯލިހް ފަރެސްމާތޮޑާ އަށް ވެވަޑައިގެންނެވި ވައުދުތައް:
– ފަރެސްމާތޮޑާގެ މަގުތައް ޒަމާނީ ފެންވަރަކަށް ތަރައްގީ ކުރުން.
– ވަސީލަތްތަކާ އެކުގައި ޒުވާނުންގެ މަރުކަޒެއް ގާއިމު ކުރުން.
– ބަނދަރު ބޮޑުކޮށް، ނެރު ފުންކޮށް، ރައްޔިތުން މޫދަށް އެރޭނެ ތަނެއް ހެދުން.
– ހެލްތު ސެންޓަރަށް ބޭނުންވާ އާ އިމާރާތް އަޅައި ދިނުން
– އައިސް ޕްލާންޓެއް ބެހެއްޓުން.
– ބޮޑު ހުކުރު މިސްކިތެއް އެޅުން.
– އެއާޕޯޓު ކައިރީގައި ސިޓީ ހޮޓަލެއް އެޅުން.
– ކައިރީގައި އޮތް ކަޅައިދޫ އާއި ފަރެސްމާތޮޑާ ހިއްކައި ގުޅާލުން
– ފްލެޓު ނުވަތަ ރޯހައުސް ހިއްކި ބިމުގައި އެޅުން.
ރައީސް ސޯލިހް ވިދާޅުވީ ރާއްޖޭގެ ކޮންމެ ރަށަކަށް ބޭނުންވެފައި ހުރި ކަންކަން އެބަހުރި ކަމަށެވެ. ރައްޔިތުން ބޭނުންވާ އެ ބަދަލު ކުރިއަށް އޮތް ފަސް އަހަރު ދުވަހުގެ ތެރޭގައި ގެންނަވާނެ ކަމަށް ވެސް ރައީސް ވިދާޅުވިއެވެ.
"އަޅުގަނޑުމެން ބޭނުން ވަނީ އުފާވެރި އަމާން ރާއްޖެއެއް ރާއްޖޭގެ ހުރިހާ ކަންކޮޅުތަކުގައި ތިބި ރައްޔިތުންނަށް ހޯދައި ދިނުން." ވަކި ރަށެއް އަދި ރައްޔިތެއް ތަފާތު ނުކުރާނެ ކަން ފާހަގަ ކުރައްވައި ރައީސް ވިދާޅުވިއެވެ.
