އިދިކޮޅު އެންމެ ބޮޑު ޕާޓީ ޕީޕީއެމްއަކީ ވަކި މީހަކު ފަހަތުން އެނބުރޭ ޕާޓީއަކަށް ވެފައިވާ ކަމަށް ރައީސް އިބްރާހިމް މުހައްމަދު ސޯލިހް ވިދާޅުވެއްޖެއެވެ.
ދ. އަތޮޅުގެ ރަށްތަކަށް ކުރައްވަމުން ގެންދަވާ ކެމްޕެއިން ދަތުރުފުޅުގައި ދ. މީދޫ ރައްޔިތުންނާ ބައްދަލު ކުރައްވާ ރައީސް ސޯލިހް ވިދާޅުވީ ކުރިއަށް އޮތް ރިޔާސީ އިންތިހާބަށް 33 ދުވަސް އޮތް އިރު، ސިޔާސީ މަސްރަހު ބަދަލުވަމުންދާ ގޮތުން ކަންބޮޑުވެވަޑައިގަންނަވާ ކަމަށެވެ. ހާއްސަކޮށް އެމްޑީޕީއާ ވާދަވެރި ޕީޕީއެމަށް އެންމެ ފަހު ވަގުތާ ޖެހެނު އިރު ވެސް ކެންޑިޑޭޓު ކަނޑަނޭޅި އޮތުމަކީ އެ ޕާޓީގެ މެމްބަރުންނަށް ލިބިގެންދާ ދެރައެއް ކަމަށް ރައީސް ވިދާޅުވިއެވެ.
"ރާއްޖޭގައި އޮތް އެންމެ ބޮޑު އެއް ސިޔާސީ ޕާޓީ، އަޅުގަނޑުމެންގެ ވާދަވެރި ސިޔާސީ ޕާޓީ އަށް އެންމެ ފަހު ވަގުތާ ޖެހުނު އިރު ވެސް ކެންޑިޑޭޓަކު ކަނޑަނޭޅި އޮތުމަކީ އެ ޕާޓީގެ މެމްބަރުންނަށް ލިބިގެންދާ ދެރައެއް. މުޅީ ގައުމަށް ވެސް ލިބިގެންދާ ދެރައެއް." ރައީސް ވިދާޅުވިއެވެ.
ރައީސް ސޯލިހް ވިދާޅުވީ ވާދަވެރި ސިޔާސީ ހަރަކާތް ހިންގޭނީ ވާދަވެރިކަމާ އެކީގައި ހުރިހާ ޕާޓީއަކުން މަސައްކަތްކޮށްގެން ކަމަށެވެ.
އަންނަ މަހުގެ 9 ގައި އޮންނަ ރިޔާސީ އިންތިހާބުގައި ރާއްޖޭގެ އެންމެ މެމްބަރުން ގިނަ އެއް ސިޔާސީ ޕާޓީ، ޕީޕީއެމުން ވަނީ ރިޔާސީ ކެންޑިޑޭޓަކު ނެރުމުގެ ވިސްނުން ދޫކޮށްލައިފައެވެ. އެއީ ޕީޕީއެމްގެ ކެންޑިޑޭޓު، ކުރީގެ ރައީސް އަބްދުﷲ ޔާމީނަށް ވާދަ ނުކުރެއްވޭތީއެވެ.
ޔާމީންގެ ކެންޑިޑެސީ ފޯމް އިލެކްޝަންސް ކޮމިޝަން (އީސީ) އަށް ފޯމް ހުށަހެޅުއްވުމުން އެ ކެންޑިޑެސީ ބަލައިގަތުމަށް ކޮމިޝަނުން ދެކޮޅު ހެދިއެވެ. އެ މައްސަލަ ސުޕްރީމް ކޯޓަށް ހުށަހެޅުއްވުމުން ސުޕްރީމް ކޯޓުން ހުކުމް ކުރީ ޔާމީންއާ ދެކޮޅަށެވެ. އެހެންވެ، ޔާމީން ވަނީ އިންތިހާބު ބޮއިކޮޓް ކުރައްވަން ޕީޕީއެމާއި ޕީއެންސީ އަށް އަންގަވައިފައެވެ. އެކަމަކު، ފަހުން އެ ވިސްނުން ޔާމީން ބަދަލު ކުރެއްވި ކަމަށްވެއެވެ. ޕީއެންސީން ވަނީ އެ ޕާޓީގެ ރިޔާސީ ކެންޑިޑޭޓަކަށް މާލޭގެ މޭޔަރު ޑރ. މުހައްމަދު މުއިއްޒު ހަމަޖައްސަވައިފައެވެ.
ރައީސް ސޯލިހް ވިދާޅުވި ގޮތުގައި ޕީޕީއެމުން މަސައްކަތް ކުރައްވަނީ އިންތިހާބު ބޮއިކޮޓް ކުރައްވާށެވެ. އެއްވެސް ބޭފުޅެއްގެ ނަން ފާހަގަ ނުކުރައްވައި އެކަމަކު، ޔާމީނަށް އިޝާރާތް ކުރައްވައި ރައީސް ވިދާޅުވީ ޕީޕީއެމް މިއަދު ފެންނަނީ ވަކި މީހެއްގެ މަސްލަހަތު ހިމާޔަތް ކުރުމަށް މަސައްކަތް ކުރާ ތަން ކަމަށެވެ.
"މިއަދު މަސައްކަތް ކުރަމުން އެ ގެންދަނީ އިންތިހާބު ބޮއިކޮޓް ކުރަން. ވަކި މީހެއްގެ މަސްލަހަތު ހިމާޔަތް ކުރުމަށް ވަކި މީހެއްގެ ފަހަތުގައި އެނބުރޭ ސިޔާސީ ޕާޓީގެ ގޮތުގައި އަޅުގަނޑުމެންނަށް ފެނިގެން މިދަނީ." ރައީސް ވިދާޅުވިއެވެ.
ރައީސް ސޯލިހް ވިދާޅުވީ މީގެކުރިން އެމްޑީޕީން ވެސް އެކަން ކަޑައްތުކޮށްފައިވާނެ ކަމަށެވެ. އެމަނިކުފާނު އެ އިޝާރާތް ކުރެއްވީ އެމްޑީޕީގެ ތެރޭގައި ކުރިން އޮތް ނުފޫޒެވެ. އޭރުގައި އެ ޕާޓީ ކޮންޓްރޯލް ކުރައްވަމުން ގެންދެވީ ރައްޔިތުންގެ މަޖިލިހުގެ ރައީސް އަދި ކުރީގެ ރައީސް މުހައްމަދު ނަޝީދެވެ. އެކަމުން އަރައިގަނެވުނީ އެމްޑީޕީގައި ތިއްބެވި އިސް ބޭފުޅުން ނުކުމެވަޑައިގަތުމުގެ ސަބަބުން ކަމަށް ވެސް ރައީސް ވިދާޅުވިއެވެ.
ރައީސްގެ ވާހަކަފުޅުގައި ވަނީ ޕީޕީއެމާއި ދިވެހި ހުރިހާ ރައްޔިތުން އެމްޑީޕީ ފަހަތަށް އަރާ ވަޑައިގަތުމަށް އެދިވަޑައިގެންފައެވެ.
