ދެވަނަ ދައުރަކަށް ހޮވިވަޑައިގެންފި ނަމަ، ކުރިއަށް އޮތް ފަސް އަހަރު، ރާއްޖޭގެ އެކި ދާއިރާތަކުން ފުރިހަމަކޮށްދެއްވުމަށް ވައުދުވެވަޑައިގަންނަވާ ކަންކަމާ ގުޅޭ ސިޔާސަތުތައް މިރޭ ހާމަކުރައްވަން ފައްޓަވާނެ ކަމަށް ރައީސް އިބްރާހިމް މުހައްމަދު ސޯލިހް ވިދާޅުވެއްޖެއެވެ.
ދ. އަތޮޅުގެ ރަށްތަކަށް މިއަދު ފެއްޓެވި ކެމްޕެއިން ދަތުރުފުޅުގައި ދ. މީދޫ އަށް ވަޑައިގެން ރައީސް ވިދާޅުވީ އެމަނިކުފާނުގެ ފުރަތަމަ ސިޔާސަތުތައް ހާމަކުރެއްވުން އޮންނާނީ މިރޭ ދ. ކުޑަހުވަދޫގައި ބާއްވާ ބޮޑު ޖަލްސާގައި ކަމަށެވެ. އެ ސިޔާސަތުތަކުގެ ތެރޭގައި ރައްޔިތުންނަށް ފައިދާ ހުރި އަދި ކުރައްވަން ހަމަޖެހިފައިވާ ކަންތައްތައް ހާމަކުރެވިގެންދާނެ ކަމަށް ވެސް އެމަނިކުފާނު ވިދާޅުވިއެވެ.
"ފުރަތަމަ ސިޔާސަތު މިރޭ ކުޑަހުވަދޫގައި ހާމަކުރުން އެބައޮތް. އޭގެ ތެރޭގައި ރައްޔިތުންނަށް ފައިދާ ހުރި ކުރިއަށް ރާވާފައި ހުރި ކަންތައްތައް ހާމަކުރެވިގެންދާނެ. މަސްވެރިކަމާއި އިގްތިސާދީ ސިޔާސަތު ހާމަކުރެވިގެންދާއިރު މަސްވެރިންގެ ތި ކަންބޮޑުވުންތަކަށް އަޅުގަނޑުމެން ގެންނަން ނިންމާފައި ހުރި ހައްލުތައް ތިޔަބޭފުޅުންގެ ވިސްނުމާ އެއްގޮތަށް އެ ހާމަކުރާ އިރު، އެކަން އޮޅުން ފިލުވައިދޭނަން،" ރައީސް ވިދާޅުވިއެވެ.
ރައީސް ސޯލިހް ވިދާޅުވީ މީދޫއަކީ ވެސް މަސްވެރިން ދިރިއުޅެމުން އަންނަ އަމިއްލަ މަސައްކަތުން ދިރިއުޅުން ބިނާ ކުރާ ރަށެއް ކަމަށެވެ. އަދި ކުރީއްސުރެ، މިއަދާ ހަމައަށް އައިއިރު ވެސް މި ރަށަކީ މަސްވެރި ރަށެއް ކަމަށް ރައީސް ވިދާޅުވިއެވެ.
"މިހާރު ވެސް މި ރަށުގެ ރައްޔިތުން އެންމެ ގިނަ އިން ކުރަނީ މަސްވެރިކަން. ހާއްސަކޮށް ބޮޑު ކަންނެލީގެ މަސައްކަތަށް އެންމެ މަޝްހޫރު އެއް ރަށް މިހާރު މި ރަށަކީ" ރައީސް ވިދާޅުވިއެވެ.
ރައީސް ވިދާޅުވި ގޮތުގައި މީދޫ އާއި ރާއްޖޭގެ އެހެން ކަންކޮޅުތަކުގައި ތިއްބެވި ރައްޔިތުންގެ އެންމެ ބޮޑު ޝަކުވާއަކީ މަސް ނުކިރެވުމާއި މިޔަރުގެ އުނދަގުލާ ހެދި އެނދަމަން ނުފޭބޭ ވާހަކަ ކަމަށެވެ. އަދި މިޔަރުގެ އުނދަގުލާ ހެދި ފަރުމަސް ނުބޭނޭ ވާހަކަ އާއި އައިސް ޕްލޭންޓެއްގެ މުހިންމު ކަމުގެ ވާހަކަ ވެސް ހިއްސާ ކުރެއްވި ކަމަށް ރައީސް ވިދާޅުވިއެވެ.
ރައީސް ވިދާޅުވީ ކުރިއަށް އޮތް ފަސް އަހަރު އެކުލަވާލައްވާފައިވާ ސިޔާސަތުތައް އިއުލާން ކުރައްވާ އިރު، އެ ސިޔާސަތުތަކުގެ ތެރޭގައި މަސްވެރިކަމާ ގުޅޭ ސިޔާސަތުތައް ވެސް ހިމެނޭ ކަމަށެވެ.
