ނުބައި ކަންތައްތައް އީޖާދު ކުރާ މީހުންނާއި، ނުބައި ކަންތައްތައް ރަގަޅު ކަންކަމަށް ހަދައިގެން މީހުންނަށް ތައާރަފްކޮށްދޭ މީހުންނަށް، އެމީހުންގެ ފާފަތަކުގެ އިތުރުން، އެމީހުންނަށް ތަބާވާ މީހުންގެ ހުރިހާ އެންމެން ކުރާ ނުބައި އަމަލުތަކުގެ ފާފަތައްވެސް އުފުލަން ޖެހޭނެކަމުގައި މިއަދުގެ ހުކުރު ޚުޡުބާގަ ވިދާޅުވެއްޖެއެވެ.
"ހެޔޮކަމުގެ ދަޅުދަނޑި" މިމައުޟޫއަށް ޚާއްސަ ކުރެވިގެންދިޔަ މިއަދު ހުކުރު ޚުޡުބާގައި ވިދާޅުވީ މުސްލިމުން ނަމޫނާއަކަށް ވާންޖެހޭނީ ހެޔޮ ކަންކަމުގައި ކަމުގައެވެ.
އެހެންކަމުން މުސްލިމުންގެ ހައިސިއްޔަތުން އަހަރެމެންގެ އާދަކާދަތަކާއި، ބުނާ ބަސްތަކާއި، ސުލޫކާއި، އަޚްލާގު، އިސްލާމް ދީނުގެ އުސޫލުތަކާއި އެއްގޮތަށް ބައްޓަން ކުރަން ޖެހޭނެއެވެ. އެ ދީނުގެ އުސޫލުތަކާއި، އަސާސްތަކާ ޚިލާފު އެއްވެސް ކަމަކާ ގާތްވެގެން ނުވާނެއެވެ.
މިއަދުގެ ހުކުރު ޚުޡުބާގައި ވިދާޅުވެފައި ވެއެވެ
ޚުޡުބާގައި އިތުރަށް ވިދާޅުވި ގޮތުގައި، ހެޔޮކަންކަމަށް ގޮވާލާ މީހަކަށް ވުމަށް ކޮންމެ މުސްލިމަކުވެސް އެދޭނެކަމުގައެވެ. އަދި އެފަދަ މީހަކަށް ވުމަށްޓަކާ ކަންތައްތައް ކުރަންޖެހޭނެ ގޮތް ބަޔާން ކުރަމުން ޚުޡުބާގައި ވިދާޅުވެފައިވަނީ، އޭގެ ފުރަތަމަ ކަމަކީ ތިމާގެ އަމަލުތަކާއި ބަސްތަކުގައި ﷲއަށް އިޚްލާސްތެރިވުން ކަމުގައެވެ.
ތިމާ ކުރާ ކޮންމެ އަމަލެއް، ބުނާ ކޮންމެ ބަހެއްގައި މާތް ﷲއަށް ޚާލިސް ވުމެވެ. މާތް ﷲއަށް ޚާލިސް ނުކުރުރާ އެއްވެސް ޢަމަލެއް ﷲ ގަބޫލުފުޅެއް ނުކުރައްވާނެތެވެ.
ޚުޡުބާގައި ވިދާޅުވި ގޮތުގައި ހެޔޮ ކަންކަމުގެ ތަޅުދަނޑިއަކަށް ވެވޭނީ މާތް ﷲ ފަރުޟު ކުރައްވާފައިވާ ނަމާދުތަކާއި ދީނުގެ އެހެނިހެން ފަރުޟުތަކާއި ވާޖިބުތައް ބަރާބަރަށް އަދާކޮށް، މުންކަރާތްތަކާއި ފާޙިޝް އަމަލުތަކާއި ދުރުހެލި ވެގެންނެވެ.
ﷲގެ އަމުރުފުޅުތަކާއި އެއްގޮތަށް ޢަމަލުކޮށް، އެކަނލާގެއަށް ވެފައިވާ އަޙުދަށް ވަފާތެރިވާ މީހާ، ހެޔޮކަމުގެ ތަޅުދަނޑިއެއް ކަމުގައި ލައްވާ، ނުބައިކަމުގެ ތަޅެއްކަމުގައި ލައްވާނޭކަން ބަޔާން ކުރަމުން ޚުޡުބާގައި ވިދާޅުވީ އެފަދަ މީހާއަށް ﷲ ދެއްވާނީ ހެޔޮކަމުގެ ހުރިހާ ދޮރުތަކެއް ހުޅުވާލެވޭ މައި ތަޅުދަނޑިކަމުގައެވެ.
