ސިޔާސީ ގޮތުން ކިތަންމެ ވަރަކަށް ޚިޔާލް ތަފާތުވިޔަސް އެއްވެސް މީހަކު ޖަލަށްލައި އަނިޔާ ނުކުރާނެކަމަށް އެމްޑީޕީގެ ރިޔާސީ ކެނޑިޑޭތް ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.

ރައީސް ޞާލިހު މިހެން ވިދާޅުވީ ށ.އަތޮޅަށް ކުރައްވާ ދަތުރުފުޅުގައި އެއަތޮޅު ބިލަށްފަހީގެ ރައްޔިތުންނާއި މުޚާތަބުކޮށް ވާހަކަ ދައްކަވަމުންނެވެ. ރައީސް ޞާލިހު ވަނީ ނިމިދިޔަ ރައީސް ޔާމީންގެ ވެރިކަމުގައި ސިޔާސީ ފަރާތްތަކަށް ކުރިމަތިކުރުވި ގޮންޖެހުންތަކުގެ ހަނދާން އާކުރައްވައި އެވާހަކަތައް ހިއްސާ ކުރައްވާފައެވެ.

ރައީސް ވިދާޅުވީ ރައީސް ޔާމީންގެ ވެރިކަމުގައި ޚިޔާލު ފާޅު ކުރުމާއި ފާޑުކިޔުމަކީ މުޅިންހެން މަނާ ކަމެއްކަމަށެވެ. އޭރުގެ ވެރިކަމުގައި ސިޔާސީ ގިނަ ލީޑަރުންނާއި ސިޔާސީ ގިނަ ބޭފުޅުން ތިއްބެވީ ރިޔާސީ އިންތިޚާބުގެ މިހިސާބުގައި ޖަލުގައި ކަމަށެވެ. އޭގެ ތެރޭގައި ވަކިވަކި ނަންތައް ހާމަކުރައްވަމުން ރައީސް ވިދާޅުވީ، ޝައިޚު އިމްރާނާއި، ރައީސް ނަޝީދާއި، ކާނަލް ނާޒިމްއާއި، ފާރިސް މައުމޫންނާއި، އަމީތުފަދަ ބޭފުޅުން ތިއްބެވީ ޖަލުގައި ކަމަށެވެ.

ތިބޭފުޅުންނަށް ފެނިވަޑައި ގަންނަވާނެ އެދުވަހު އަޅުގަނޑުމެން ސިޔާސީ މީހުން އުޅުނު ހާލު. އެންމެން ތިބީ ޖަލުގަ. އަޅުގަނޑު ޔަގީންކަން މިދެނީ ސިޔާސީ ގޮތުން ޚިޔާލް ތަފާތުވެގެން އަޅުގަނޑު އެއްވެސް މީހަކު ޖަލަށްނުލާނެކަމަށެވެ. އެއްވެސް މީހަކަށް ނުހައްގުން އަނިޔާއެއް ނުދޭނެކަމަށް.

– ރައީސް ޞާލިހު ވިދާޅުވިއެވެ.

ރައީސް ވިދާޅުވީ މިނިވަން ކަމުގެ ތެރެއިންވެސް ޚިޔާލްފާޅު ކުރަން ޖެހޭނީ އޮންނަ މިންގަނޑުގެ ތެރެއިން ކަމަށެވެ. ރަށްރަށަށް ކެމްޕޭނަށް އަރާއި އިރުގައާއި، ބެނާ ދެމުމުގައާއި، އެނޫންވެސް ހަރަކާތްތަކުގައި އަޚުލާގީ މިންގަނޑުގެ ތެރެއިން ކަންކަން ކުރަންޖެހޭ ކަމަށެވެ. އަދި ނޫސްވެރިކަމުގެ މިނިވަން ކަމުގެ ތެރެއިން ގޭގޭގެ ސިޓިން ރޫމްތަކުގައި ބަލަން ނުކެރޭވަރަށް އަޚުލާގީ މިންގަނޑު ބޭރު އެތައް ވާހަކަ ދައްކަވައި، ހައްދަވަމުންދާކަމީ ހިތާމަ ހުރި ކަމެއްކަމަށެވެ.

މިސަރުކާރުން ނޫސްވެރިކަމުގެ މިނިވަންކަމަށް ހުރަސް އަޅައި ނޫސްވެރިންވެސް ޖަލަށްލައި އަނިޔާ ނުކުރާކަމަށް ރައީސް ވިދާޅުވިއެވެ. ނަމަވެސް ނިމިދިޔަ ފަސް އަހަރު ރައީސް ޔާމީންގެ ވެރިކަމުގައި ގިނަ ނޫސްވެރިންވެސް އުޅުނު ހާލު އެގިވަޑައި ގަންނަވާނެކަމަށް ރައީސް ވިދާޅުވިއެވެ.

ރައީސް ވަނީ މިއަދު އޮތް ހަމަޖެހުމާއި މަސްލަހަތު ނަގާލުމަށް އިތުރު ފުރުސަތެއް ނުދެއްވުމަށް ރައްޔިތުންގެ ކިބައި އެދިފައެވެ. އަދި އޭރު ތަޖުރިބާކުރި އަނިޔާވެރިކަން އިތުރަށް ރަހައްމަލު ކުރަން ރައްޔިތުން ބޭނުން ނުވާކަމަށްވެސް ރައީސް ޞާލިހު ވިދާޅުވިއެވެ.