ރޭ ދަންވަރު މާލެއަށް މެދުކެނޑުމެއްނެތި ވެހުނު ބޯ ވާރޭގެ ސަބަބުން މާލޭގެ އެކި ސަރަހައްދުތަކުގައި ފެން ބޮޑުވުމާ ގުޅިގެން، އެމްއެންޑީއެފް ފަޔަރ އެންޑް ރެސްކިޔު ސަރވިސްގެ ސިފައިން ދަނީ ފެން ހިންދުމުގެ މަސައްކަތުގައި ހަރަކާތްތެރިވަމުންނެވެ.
އެމްއެންޑީއެފްގެ މަޢުލޫމާތު ދީފައިވާ ގޮތުގައި ހެނދުނު 6:30 އާ ހަމައަށް މާލޭގެ 8 ސަރަހައްދެއްގައި ޕަންޕު ބަހައްޓައިގެން 6835 ޓަނުގެ ފެން ވަނީ ހިންދާފައެވެ. މި މަސައްކަތް ކުރިއަށްދަނީ ވެސްޓް ޕާކު، އައިޖީއެމްއެޗް، ވިލިމާލެ ފެރީ ޓާމިނަލް، ސަލްމާން މިސްކިތް، ބޮޑުވަޅު، ދަރުބާރުގެ، ހަވީރީހިނގުން އަދި ސޯޝަލް ސެންޓަރު ސަރަހައްދުގައެވެ. މީގެ އިތުރުން ވެލިބަސްތާ ޖެހުމުގެ މަސައްކަތްވެސް ދަނީ ކުރެވެމުންނެވެ.
މި ވިއްސާރައާ ގުޅިގެން ހެނދުނު 7:00 އާ ހަމައަށް 58 ގެއަކަށް އެހީތެރިކަން ފޯރުކޮށްދެވިފައިވާ ކަމަށް އެމްއެންޑީއެފްއިން ވަނީ ހާމަކޮށްފައެވެ. މިއީ މިމަހުގެ ތެރޭގައި މާލެއަށް ދިމާވި ދެވަނަ ބޮޑު ވިއްސާރައެވެ. ޖެނުއަރީ 3 ވަނަ ދުވަހުވެސް މާލެއަށް ބޯކޮށް ވާރޭވެހި، 24 ގަޑިއިރުގެ ތެރޭގައި 161.9 މިލިމީޓަރުގެ ވާރޭ ރެކޯޑްކުރެވުނު ކަމަށް މޫސުމާބެހޭ އޮފީހުން ވަނީ ހާމަކޮށްފައެވެ.
އެދުވަހުގެ ވިއްސާރައިގައި ފެންގަނޑު ކޮންޓްރޯލްކުރުމަށް މާލޭ ސިޓީ ކައުންސިލުން 20،000 ބަސްތާ ވެލި ފޯރުކޮށްދިނެވެ. އަދި 740 ފަރާތަކުން އެހީތެރިކަމަށް އެދުނު ކަމަށާއި، 27 ގޭބިސީއެއްގެ 226 މީހުންނަށް ވަގުތީ ބޯހިޔާވަހިކަން ފޯރުކޮށްދިން ކަމަށް އެންޑީއެމްއޭއިން ވަނީ ހާމަކޮށްފައެވެ. އެދުވަހުގެ އޮޕަރޭޝަނަށް 61،500 ރުފިޔާ އަދި ހާލުގައި ޖެހުނު މީހުންނަށް އެހީތެރިކަން ފޯރުކޮށްދިނުމަށް ދެ ލައްކަ ރުފިޔާ ހޭދަކުރެވުނެވެ. މިއީ މިހާތަނަށް ހިންގުނު މިބާވަތުގެ އެންމެ ބޮޑު އޮޕަރޭޝަން ކަމަށް އެންޑީއެމްއޭއިން ވަނީ ފާހަގަކޮށްފައެވެ.
މިހާރު ކުރަމުންދާ ވިއްސާރަ މުޅި ރާއްޖެއަށް ކުރާނެކަމަށް މޫސުމާބެހޭ އޮފީހުން ލަފާކުރާއިރު، ބ. އަތޮޅުން ފެށިގެން ދ. އަތޮޅާ ހަމައަށް ރީނދޫ ސަމާލުކަން ނެރެ، މިސަރަހައްދުތަކަށް ގުގުރުމާއެކު ބޯކޮށް ވާރޭވެހޭނެ ކަމަށް ވަނީ އަންގާފައެވެ.
