ކުރީގެ އެސްޓީއޯ މެނޭޖިން ޑިރެކްޓަރ ހުސައިން އަމްރު، ގިނަ ދުވަސްތަކެއް ޑިމޮކްރެޓްސް ޕާޓީގައި ހޭދަކުރެއްވުމަށްފަހު އަލުން އެމްޑީޕީއާ ގުޅިވަޑައިގަތުމަށް ނިންމަވައިފިއެވެ. މި މަޢުލޫމާތު ހާމަކުރެއްވީ ހުޅުމާލެ ދާއިރާގެ ކުރީގެ މެންބަރު އަދި އެމްޑީޕީގެ އިސް މެންބަރެއް ކަމުގައިވާ އަލީ ނިޔާޒެވެ.
އެކްސް މެދުވެރިކޮށް ކުރެއްވި ޕޯސްޓެއްގައި ނިޔާޒު ވިދާޅުވެފައިވަނީ ސިޔާސީ އިސްލާހީ މަސައްކަތުގައި އެންމެ މުހިއްމު މަސައްކަތްތައް ކުރެވޭނެ ޖާގަ އޮންނާނީ އެމްޑީޕީގައި ކަމަށާއި، ސިޔާސީ ކުރިމަގު ހޯދަން އެދޭ ކޮންމެ މީހަކަށް އެމްޑީޕީގެ ދޮރު ހުޅުވިފައިވާ ކަމަށެވެ.
އަމުރުގެ ވިސްނުން ބަދަލު ކުރުމާއި ގުޅޭގޮތުން މީޑިއާގައި އޭނާ އަދި މައުލޫމާތެއް ހިއްސާ ކޮށްފައެއް ނުވެއެވެ.
އަމްރު ޕާޓީ ބަދަލުކޮށްފައި މިވަނީ ޑިމޮކްރެޓްސް ޕާޓީގެ ހަރަކާތްތައް މުޅިން މަޑުޖެހި، ރައްޔިތުންގެ މަޖިލިސް އިންތިޚާބުން އެއްވެސް ގޮނޑިއެއް ނުލިބި، ޕާޓީގެ ސިޔާސީ ހަރަކާތްތައް ވަރަށް ބޮޑަށް މަޑުޖެހިފައިވާ ދަނޑިވަޅެއްގައެވެ. އަދި ޕާޓީ އުފެއްދެވުމުގައި އިސްކޮށް ހަރަކާތްތެރިވި ގިނަ މެންބަރުން ވެސް މިހާރު ސިޔާސީ މައިދާނުން ފެންނަން ނެތްކަން ފާހަގަކުރެވެއެވެ.
ޑިމޮކްރެޓްސްއަކީ އެމްޑީޕީގައި އުފެދުނު ޚިޔާލު ތަފާތުވުންތަކާ ގުޅިގެން، ކުރީގެ ރައީސް މުޙައްމަދު ނަޝީދަށް ތާއީދުކުރައްވާ މެންބަރުން އުފެއްދެވި ޕާޓީއެކެވެ. އެމްޑީޕީން ވަކިވުމަށްފަހު، ޑިމޮކްރެޓްސްއާ ގުޅިވަޑައިގެންނެވި މެންބަރުން ވަނީ އޭރުގެ ސަރުކާރަށް ވަރަށް ބޮޑަށް ފާޑުކިޔުއްވާފައެވެ. އަދި ނިމިދިޔަ ރިޔާސީ އިންތިޚާބުގައި އެ ޕާޓީން މަސައްކަތްކުރެއްވީ އެމްޑީޕީ "ފެއިލްވެއްޖެ" ކަމަށް ވިދާޅުވަމުންނެވެ.
