އައްޑޫ ސިޓީގައި ވަކިން ޚާއްސަކޮށް އައްޑޫ މީދޫ އަދި މަރަދޫގައި ރައީސް ޞާލިހުގެ ތާއީދު އިތުރުވަމުންދާކަމީ ރައީސް ނަޝީދަށް ކެތް ކުރެވޭނެ ވަރުގެ ކަމެއް ނޫންކަމަށް އެދާއިރާގެ މަޖިލިސް މެމްބަރު ރޮޒޭނާ އާދަމް ވިދާޅުވެއްޖެއެވެ.
އޭނާ މިހެން ވިދާޅުވީ ރައީސް ނަޝީދާއި، ދަ ޑިމޮކްރެޓްސްގެ ރިޔާސީ ކެނޑިޑޭޓް އިލްޔާސް ލަބީބް އައްޑޫއަށް ކުރެއްވި ދަތުރުފުޅުގައި މީދޫއަށް ވަޑައިގެން ރައީސް ނަޝީދު ދެއްކެވި ވާހަތަކަށް ރައްދު ދެއްވައި ކުރެއްވި ޓުވީޓުގައެވެ. ރައީސް ނަޝީދު ވަނީ ރޮޒޭނާ މަޖިލީހަށް ހޮވުމަކީ ހެއްދެވުނު ބޮޑު ގޯހެއްކަމަށް ވިދާޅުވެފައެވެ.
ރޮޒޭނާ ވިދާޅުވީ އައްޑޫ ސިޓީގައި އަދި ވަކިން ޚާއްސަކޮށް އައްޑޫ މީދޫ، އަދި މަރަދޫގައި ރައީސް ޞާލިހުގެ ތާއީދު އިތުރުވަމުންދާކަމީ ރައީސް ނަޝީދަށް ކެތްވާނެ ކަމެއް ނޫންކަމަށެވެ. އަދި ނަޝީދު ސިޔާސީ ގޮތުން ދިމާކުރާ ދިމާކުރުންތަކަކިީ މިކަންކަމާއި ކެތް ނުކުރެވިގެން ދިމާކުރާ ދިމާކުރުންތަކެއް ކަމަށް ރޮޒޭނާ ވިދާޅުވިއެވެ.
މީދޫއާއި، މަރަދޫ ފޭދޫގައި އުފާވެރި އަމާންރާއްޖޭގެ ކެމްޕެއިން ހަރަކާތް ފަތުއަޑު ކިޔާފަ ބާރަށް ކުރިއަށް އެބަދޭ. ރައީސް ޞާލިހު މިދާއިރާ ބޮޑުކޮށް ނަގާނެ! އެހެންވީމާ ރައީސް ނަޝީދަށް އަޅުގަނޑާއި ބެހިނުލާ ހަމަ ނުހުރެވެނީ! މިޓީމްގެ ވަރުގަދަކަން ފެނިފަ!
– ރޮޒޭނާ ވިދާޅުވިއެވެ.
ރައްޔިތުންގެ މަޖިލީހުގެ މެންބަރުންގެ ތެރެއިން ނަޝީދަށް އެންމެ ބޮޑަށް ފާޑުވިދާޅުވާ ބޭފުޅުންގެ ތެރޭގައި ރޮޒައިނާ ހިމެނެއެވެ. ނަޝީދު ރޮޒައިނާ އަށް ފާޑުވިދާޅުވަމުން ވިދާޅުވީ ނަޝީދު ވިދާޅުވީ ރޮޒެއިނާ އާއި ޑީއާރުޕީގައި ކުރިން އުޅުއްވި ބޭފުޅުންނަކީ ކުރީގެ ރައީސް މައުމޫން އަބްދުލްގައްޔޫމްއާ ދުރަށް ޖެހި، ޑީއާރުޕީ ބައިބައިކުރުމަށް ފަހު، "ބަގާވާތަށް ފަހުގައި ރައީސް ވަހީދޭ ޒައީމޭ ކިޔުއްވަމުން" ގެންދެވި ބޭފުޅުންތަކެއް ކަމަށެވެ.
މިއަދު ރޮޒައިނާގެ ފިރިކަލުން ނާޝިޒް އެހުންނަވަނީ ރައީސުލްޖުމްހޫރިއްޔާގެ ކެމްޕޭން އޭޖެންޓަކަށް. މިއަދު ރައީސުލްޖުމްހޫރިއްޔާގެ މެސެޖިން، ރައީސުލްޖުމްހޫރިއްޔާ ކެމްޕޭނުގައި ދައްކާނެ ވާހަކަ، ވިދާޅުވާނެ ބަސްތައް، ވިދާޅުވާން އެ ތިއްބެވީ މި ބޭބޭފުޅުން. އެ ބޭފުޅުން އެ ތިއްބެވީ ރައީސުލްޖުމްހޫރިއްޔާ ވަށާލައްވާފަައި، ރައީސުލްޖުމްހޫރިއްޔާއެއް ނުއެއްނެތް. އަޅުގަނޑުމެންގެ ހުރި އެއްޗަކީ އަންނަން އޮތް ރައީސުލްޖުމްހޫރިއްޔާ، އޮނަރަބަލް އިލްޔާސް ލަބީބް.
– ނަޝީދު ވިދާޅުވިއެވެ.
ޑިމޮކްރެޓްސްގެ ރިޔާސީ ކެމްޕެއިނަށް ނަޝީދު އިލްޔާސް އަރިހުގައި އައްޑުއަށް ވަޑައިގެންނެވީ އިއްޔެގެ ވަގުތެއްގައެވެ. ނަޝީދު ގެންދަވަނީ އައްޑޫގެ އެކި އަވައްތަކުގައި ކެމްޕޭން ބައްދަލުވުންތައް ބާއްވަމުންނެވެ.
